Vawiin (Feb. 21, 2017) chawhma dar 10 atang khan Mizoram Presbyterian Kohhran hnuaia Committee sang ber, Synod Executive Committee vawi 267-na chu Synod Office-a JM Lloyd Hall-ah a thu a, meeting hian February 23, 2017 thleng a awh ang.
Committee hi Rev Lalzuithanga, Synod Moderator-in a kaihruai a, Synod Secretary-in reports a pe a, Finance Reports ngaihthlak a ni bawk. Meeting-ah hian member 131 an kal a ni. Hun hmasaah member term hmang zo leh lut thar tur inthlakna tihfel hmasak a ni a, Inneihna kawltu, Board leh Committee danga inthlak ngaite pawh tihfel zui a ni bawk.
Tun tumah hian thu ngaihtuah tur pawimawh 59 zet a awm a, chung zingah chuan Kohhran pawimawhna inzirtir uar rawtna te, Ram pum huap social media chungchang zir hona/seminar buatsaih te, Digital media hmanga Synod rawngbawlna changtlung zawka kalpui rawtna te, kum 2018 Beihrual kum 100-na hriatrengna hlawk zawka hman dân tur chungchang te, Mizoram Presbyterian Kohhran din tan ni Synod ni pawimawha telh ve thu te, Myanmar-a Ramthar rawngbawlna tur kawng zawn chungchang te, Synod Hospital-a damlo awmpuitute tana khualbûk sak chungchang te, Pastor/Minister zirna sâng zawk zir tur thlan dan chungchang te, Synod hnuaia Pensioner leh an kawppuite MR Bill chungchang te, Minister/Pastor badge siam thu te, Synod Service Rules enthat chungchang te, Pêm hruai dân enthatna thu te, Mizoram Kohhrante inpumkhatna leh thawh hona chungchang te, Nupa chungchang dân leh Kohhran pâwl dangte nena kan inkungkaihna dân enthatna te, Ruihhlo ngaite hmun khata pawh khâwm chungchang te, Youth Empowerment zir chianna te, Synod Transit Accomodation, Imphal kalpui zel dân tur te, Synod Hospital Doctor-te tana Limited Private Practice kawng hawn rawtna te, Evangelical Presbyterian Theological Seminary-a zir chhuakte Nepal Pastor atana nemngheh dan kawng zawn rawtna te, All India Sunday School Association (AISSA) nena thuthlung siam chungchang te, Unity Carol chungchanga Mizo Theological Association ngenna te, Bible Society of India (BSI) Translator dilna te, UTC Compound-a Biak In sak chungchang te, Daily leh Contract-a mi rawihna rate enthat rawtna te, Kohhran hming ziah dan tur chungchang te, Shillong Mizo Baptist Kohhran nena inremna atana sum mamawh thu te, Siaha Pastor Quarters hmun lei chungchang te, Pastor Quarters furniture grant enthatna te, Synod Office Counter Aizawl hmar lama siam chungchang te, SL&PB Additional Editor Post hnawh khah chungchang te, FG&CC kaihhruaina enthat thu te, Women Centre kaihhruaina enthat thu te, Lawngtlai-a Synod Multipurpose building sak chungchang te, Ram pum huap zai intihsiakna buatsaih dilna te, Synfo Inkaihhruaina enthat dilna te, Synod Sum Vawn Dan 2011 enthat rawtna te, Kohhran Pavalai Pawl din tan hun zir chianna chungchang te chu a langsar zual an ni.