Mizorama Pathian thu zirna inpui leh hlun bera ngaih, Aizawl Theological College (ATC) chuan March 19, 2025 (Nilaini) chawhnu dar 1:30 khan kum 2024-2025 Academic Session chhunga zirlaite thlahna hun an hmang.
Valedictory Service hi ATC Chapel-ah neih niin Rev. Prof. Tlanghmingthanga, Principal-in a kaihhruai a, inkhawm hruaituin kal khawmte chu Pathian be turin a sawm a, Rev. V.L. Krosschhuanmawia’n tawngtaia bul a tan zawhah, Rev. Lalhlimpuia kaihhruaiin sual thupha chawina hun hman a ni a, tawngtainaa inhlan a nih hnu hian zirlai thlah turte mipui hriatah an hming lama din tir an ni.
Rev. R.C. Lalnghakliana, Synod Moderator-in Valedictory Address a sawi a, ATC Principal kaihhruaiin zirlai kal chhuakten an thiamna leh an hriatna te Pathian ropui nan an hlan a ni. Thlahna thuchah Faculty aiawhin Rev. Lalduhawma Ralte leh zirlai aiawhin David Lalramthara ten an sawi bawk. Upa Vanlalsawma Siakeng, Synod Secretary-in Prize hrang hrang – Upa R. Zobela Memorial Prize, Rev. Liandova Memorial Prize in Homiletics, Rev. J.M. Lloyd’s Prize in Preliminary Greek, Rev. Dr. & Mrs. C. Vanlalhruaia’s Prize in Preliminary Hebrew, Upa Prof. C. Lalkima’s Prize in Library Knowledge, Rev. Dr. Zaihmingthanga’s Prize for Best Bible Readers, Chalthluaii Memorial Prize for duly completed Doctoral studies in Pastoral Care and Counselling te chu zirlai ti thate hnenah a hlan a, Rev. V.L. Luaia Hranleh, Senior Executive Secretary-in zirlai kalchhuak turte hnenah Certificate a hlan bawk. ATC Male Voice te tum hnih an zai a, hun tawpah Prof. Lalrindiki Ralte-in lawmthu sawiin Rev. C. Lalsangliana, TEB Member-in malsawmnain a tin a ni.
Zirlai thlahte hi B.D 29; M.Th 31; D.Th 12 leh D.C.P.C. 5, an vaiin mi 77 an ni a, Valedictory Service hi ATC-a thawktute leh zirlaite bakah, Synod hotu pawimawh te, Theological Education Board member te leh he hun hmanpui tura sawm bik mi thahnem tak an tel a ni.