Vawiin (March 21, 2025) chawhma dar 10 atang khan Synod Campus Ministry buatsaihin “Tleirawl/Thalaite zawhna/Harsatna chungchang” Seminar chu J.M. Lloyd Hall, Synod Office-ah neih a ni.
Seminar hi Rev. H.L. Thianghlima, Director-in a kaihruai a. Rev. Dr. Rosiamliana Tochhawng, Executive Secretary i/c Synod Campus Ministry-in Keynote Address a sawi. Dar 10:30 atanga chawhnu dar 3:30 thleng paper pakua, mi thiam hrang hrangte ziak zir ho a ni a. Chung paper te chu - Social Media leh Thalaite, Artificial Intelligence leh Thalaite, Life Skills, Mental Health, Sex leh Gender, Thalaite leh nu leh pate inkar/chhungkaw inlaichinna, Chhungkaw Din, Kohhran Hlutna leh Thalaite hriat tur Dan kulhpui tih te a ni. Chawhnu dar 3:30 atanga tlai dar 5 thlengin sawi hona neih zui nghal a ni.
Seminar-ah hian pawl leh department hrang hrang - CYMA, CKTP, Central Kohhran Hmeichhia, FG&CC, Social Welfare, MSACS, UESI, MSEU leh NexGen atangin mi panga theuh bakah Campus Ministry Committee, Campus Ministry Resource person leh mimal sawm bik te an tel a ni.
Synod Campus Ministry Committee-in tunlai Tleirawl/Thalaite zawhna/harsatna chungchang hi Pathian thu hmanga chhan tulin a hria a, chumi thu kal zelah chuan paper ziak turin mi thiam thlan bik pakua a sawm a, seminar hi buatsaih a ni ta a ni.