April 4, 2025 (Zirtawpni) hi Mizorama ‘Harhna thlen Ni’ champha a ni a, kumin hi Harhna thlen kum 119-na a ni. Mizoram Presbyterian Kohhran chuan inkhawm tum khat atan programme a siam a, Thupui inang tlang "Min tiharh leh dawn lo'm ni" Sam 85:1-13 tlawh chhanin zir ho a ni ang.
Mizorama Harhna lo thlen hmasak hun hi Synod chuan uluk taka a zirchian hnuah, kum 1982-a Synod Inkhawmpui chuan April 4, 1906 hi Zorama Harhna lo thlen hmasak ni atan a pawm a, a hman dan tur pawh SEC kutah a dah a. Kum 1984 atangin kum tin April 4 hi Harhna Thlen Ni tiin Kohhran ni pawimawha chhiar a ni ta a ni. Kum 2006 khan Harhna thlen kum 100-na pawh Kohhran hoten ropui takin kan lo lawm tawh bawk a ni.
‘Harhna thlen ni’ hi Kohhran ni pawimawh a nih avangin Synod Office leh Synod hnuaia Department hrang hrang te pawh khar a ni ang.