Synod Social Front chuan vawiin (March 2, 2017) 11:00 a.m. - 3:30 p.m. khan Vanapa Hall-ah Political Education Campaign Kick-off a buatsaih a, he programme-ah hian Aizawl chhunga Pastor, Pro. Pastor te leh Kohhran tin aiawh mi pahnih zel tel tura beisei an ni a, mi 352 an kalkhawm a ni.
Chawhma lam session chu Rev. B. Sangthanga, Executive Secretary i/c Social Front-in kaihruaiin hunserh a hmang a, Upa H. Lalhmingmawia, Social Front Coordinator-in programme buatsaih chhan a sawi zawhin, Synod Moderator Rev. Lalzuithanga’n Thuchah leh Campaign kick-off hun a hmang. Rev. Lalzuithanga chuan, “Lalthuthleng kan inchuh dan hi chanchin tha nen a inmil loh chuan roreltu tha kan nei ngai lovang. Political party ten kohhran rorelna an ngaipawimawh lo a nih chuan an tana tawngtai a nuam lo. Ram rorelna leh kohhran rorelnaah Pathian a lal ber a ngai. Pathian thu nena inhmehin Party Politics hi a kal thei tur a ni”, a ti.
Chawhnu dar 1:30-ah session hnihna tan leh a ni a, Upa Lalzuitluanga, Synod Social Front Commt. Member-in programme a kaihruai a, Revd. Chuauthuama, Ramhlun Vengchhak paper buatsaih ‘Ram rorelnaa sawrkar leh mipui mawhphurhna’ tih thupui zirho a ni a, Inthlan dawnah political party tinin ‘manifesto’ an pho chhuak thin a, party hmathlir leh ram leh hnam hmasawnna tura thil tih an tum an tar lang thin. Lal Isua khan rawngbawl a tan tirh khan Nazareth-ah ‘manifesto’ a puang chhuak a, a tipuitling ta ngei bawk a. Isua thil tih dan kha sawrkar siamtute biblical model ni thei ngei se, tih te, ram hmasawn nan sawrkarna siamtu ‘ministry’ te, sawrkar hnathawkte mawhphurhna te, mipuite pawhin mawhphurhna hrang hrang kan neih vek thu te, rorelna dik lo do ngam a pawimawh thu te leh Kristianten kan tum ber chu rorelna dik dinpui ngam ni zel se, dik leh dik lo kan tehna chu party mit atang ni lovin Pathian leh a Kohhranho zirtirna atangin ni zel thei se, tih te paper-ah hian tarlan a ni a, hemi zawh hian sawihona hun tha tak an hmang bawk.