Vawiin (March 8, 2017) chawhma dar 11:00 atang khan Synod Literature & Publication Board (SL&PB) buatsaih Literature Seminar chu Pi Zaii Hall, Synod Conference Centre, Aizawl-ah neih a ni a. Seminar-ah hian Aizawl khawpui chhung Pastor & Pro. Pastor, Kohhran tin aiawh mi 2, Mizo Language Committee member leh Synod Literature & Publication Board member-te sawm an ni a, an vaiin mi 350 an kal a ni.
Chawhma lam hun hi Rev. Lalzuithanga, Synod Moderator-in a kaihruai a, Upa H. Ronghaka, SL&PB Jt. Editor in seminar buatsaih chhante a sawifiah a, SAM Hrilhfiahna (Gospel Centenary Project), Rev. Lalawmpuia hauhnar ziah chu Rev. Lalramliana Pachuau, Senior Executive Secretary-in a tlangzarh a. Hemi hnu hian Rev. Dr. C. Chawnghmingliana, Secretary & Editor, SL&PB buatsaih 'Literature pawimawhna leh thu ziak rawngbawlna' tih thupui zirho a ni a, sawihona hun hman a ni bawk. Chawhnu lamah Rev. P. C. Pachhunga, Executive Secretary i/c SL&PB in hun a kaihruai a, Upa Prof. R.L. Thanmawia, BEC Member, SL&PB bautsaih 'Kohhran tawngkam hman leh hla thu lam dan chungchang' tih thupui zirho leh a ni a. Thupui zir zawh hian sawihona hun hman leh a ni a, Rev. Thangzauva, BEC member, SL&PB in lawmthu sawina hun a hmang.