April 30 & May 1, 2025 chhung hian MSSU buatsaihin Bial Sunday School Secretary-te tan Biennial Secretarial Training vawi 19-na chu Aizawl Theological College, Durtlang-ah neih mek a ni.
April 30, 2025 (Nilaini) zanah hawnna inkhawm neih a ni a, Rev. Dr. K. Lallawmzuala, Executive Secretary i/c MSSU-in a kaihhruai a, Rev. R. C. Lalnghakliana, Synod Moderator-in hawnna neiin thuchah a sawi a. Moderator chuan, rawngbawlna hi Pathian khawngaihna a nih thu te, chumi tihlawhtling tura inpekna a pawimawh thu te a sawi a ni.
Zanin (May 1, 2025) hian kharna hun hman a ni ang a, kharna inkhawm hi Upa Vanlalsawma Siakeng, Synod Secretary-in a kaihruai ang a, Rev. Dr. K. Lallawmzuala, Executive Secretary i/c MSSU-in Fuihna thu sawiin training chhuakte hnenah Certificate a hlan ang.
Training chhung hian thupui chi hrang hrang – Sunday School chanchin leh a pawimawhna, Christian Education & Child Evangelism, Sunday School Inrelbawl dan leh inkaihhruaina, Secretary hna leh a mawhphurhna tih te leh Sunday School rawngbawlna atana thupui pawimawh hrang hrangte mi thiam ten an zirtir a, sawi hona te neih thin a ni.
MSSU Secretarial Training hi Bial Sunday School Secretary ruat thar kum apianga neih thin a ni a, Secretary hna leh an rawngbawlna atana thil pawimawh hrang hrangte inzirtirna hun atan hman thin a ni. Kum 1974 atanga kum thum dan zela neih thin chu kum 2018 Synod-in Bial Sunday School Secretary term kum hniha a bithliah tak avangin 2019 atangin kum hnih dan zelah neih thin a ni. Tun tum Secretarial Training-ah hian Bial Sunday School Secretary 177 an tel thei a, an zingah hian hmeichhia 1 a awm a ni.
For more Pics Click Here