May 10, 2025 (Inrinni) khan Tuikual Presbyterian Kohhran Hall-ah Synod Prison Ministry buatsaihin Ex-Prison Inmates follow up programme vawi 5-na hman a ni a, mi 128 an kal.
Programme hi hun hniha hman a ni a, hun khatna hi Rev. Lalhleia, Director, Synod Prison Ministry-in a kaihruai a, Pastor Lallianmawia Pachuau, SPM committee member-in hunserh a hmang a. Rev. Lalhleia, Director-in inhmelhriattirna neiin rawngbawlna report tawi a pe bawk. Pu Lalnghinglova Hmar, Minister of State i/c LESDE-in thu a sawi a. Minister chuan misual deuh te bula thusawi tur anga a in ngaih thu leh ex-prison inmates te a hmuh hnua misual an nih loh zia leh buan hneh loh an neih vanga hetiang dinhmuna ding an nih zawk thu a sawi a. Sam 42-na beh chhanin Sam ziaktu meuh pawh nun beidawnna leh lungngaihna a paltlang hnuah Pathianah beiseina a neih thar thu sawiin, ex-prison inmates te pawh Pathianah beiseina nghat tlat turin a fuih a, kut themthiam takte an nih avangin hma lam pan zel turin a fuih a ni. Pu Lalramnghinglova, Founder, Khawngaihna In pawhin thu sawiin thla kaw chhung Central Jail-a a tan thu leh jail-a a luhpui loh Lal Isua Krista nen jail atanga an chhuah thu sawi a ni. Hun khatnaah hian Nl. J. Lalruatsangi, Sihphir a zai bawk.
Hun hnihna hi Pastor Lalhmuchhuaka, i/c Tuikual Bialin a kaihruai a, Tv. Lalrempuia, counsellor SPM-in hunserh a hmang a. Pastor Malsawmtluanga, SPM Committee member leh Ex-Prison inmates mi pasarih te hnen atangin thusawi ngaihthlak a ni a, Nl. Lalduhsaki, Durtlang leh Nl. Lalrinmawii, Tuikual Branch KTP te an zai bawk.
Kum 2023 atang khan Synod Prison Ministry buatsaihin ex-prison inmates follow up programme hi kum tin vawi hnih hman thin a ni. Kum 2016 atang khan Synod Prison Ministry hian Jail-a rawngbawlna hi a kalpui tan a, thawktu Director pakhat leh Office Assistant (O/A) pakhat bakah Counsellor pakua an awm mek a ni.
For more Pics Click Here