Vawiin (May 20, 2025) chawhnu dar 2 khan J.M. Lloyd Hall, Synod Office-ah Synod Literature & Publication Board (SL&PB) buatsaihin kum 2024 chhunga Library tha leh Kristian Tlangau thuziak tha lawmman semna programme neih a ni.
Programme hi Upa Vanlalsawma Siakeng, Synod Secretary-in a kaihruai a, Rev. P.B. Zosapthara, Editor SL&PB-in report a pe a, Upa Lalrammawia Ngente, BEC member-in Library chungchang thu tawi a sawi a, Kristian Tlangau thuziak tha lawmman sem a ni a, lawmman hi Rev. R.C. Lalnghakliana, Synod Moderator-in a hlan a ni. Rev. Dr. K. Lallawmzuala, Executive Secretary i/c SL&PB-in Library tha lawmman a sem bawk. Lawmmanah hian Library tha pakhatna Rs.30,000/-, Citation leh lehkhabu, Consolation prize dawngtuten Rs.2,000/- leh lehkhabu an dawng a. Thuziak tha pakhatna Rs.10,000/- leh Citation, Consolation prize dawngtuten Rs.2,000/- an dawng thung a ni.
Lawmman dawngtute chu:
Thuziak tha:
Pakhatna : Rev. Zosangliana Colney, Mission Veng
Thupui : Khawiah nge hmun thianghlim chu
Consolation Prize:
1. Dr. C. Lalengkima, Vaivakawn Vengthlang Kohhran
Thupui : Mizoram Presbyterian Kohhran leh Khawtlang nun siamthat
2. Rev. V.L. Luaia Hranleh, Mission Veng
Thupui : Inpumkhatna
Library tha:
Pakhatna : Vaivakawn Kohhran
Consolation Prize:
1. Mission Veng Kohhran
2. Salem Veng Kohhran
Synod Inkhawmpui 2023-in ‘Lehkhabu tha chhiar lama tan lak thar ni se,’ tia a lo rel tawh chu Synod Executive Committee (SEC) bawhzui turin dah a ni a. SEC chuan a kalhmang tur ruahmanna siam tur mi a ruat a, chung mite chuan an ruahmanna chu SEC-ah bawk thlen lehin SEC chuan a pawm ta a ni. Chung ruahman te chu bawhzui turin SEC chuan SL&PB kutah a dah a, SL&PB chuan SEC-in ruahmanna a lo siam tawh chu a bawhzui ta a ni.