May 13-20, 2025 chhung khan Family Guidance & Counselling Centre (FG&CC) buatsaih, 'Church Leaders’ Pastoral Counselling Training vawi 40-na' neih a ni.
Training-ah hian Teikhang Bial, West phaileng Dinthar Bial, Damparengpui Bial, Zohmun Bial, Chhiahtlang Kawn Veng Bial, Tuidam Bial, Suarhliap Bial leh Dairam Synod atangin kohhran aiawh mi 27 an tel.
May 13, 2025 (Thawhtanni) zan khan training hawnna inkhawm hi Pi Zaii Hall, Synod Conference Centre-ah neih a ni a. Inkhawm hi Rev. K. Lalrinmawia, Resource Person-in a kaihruai a, Rev. Lalthangpuia Fanai, Director-in inlawmna neiin report a pe a, Rev. Dr. K. Lallawmzuala, Executive Secretary i/c FG&CC-in training programme hi hawngin thuchah a sawi a ni.
Training kharna inkhawm hi May 20, 2025 (Thawhlehni) zan khan neih a ni a, Rev. Lalthangpuia Fanai, Director, FG&CC-in a kaihruai a, inlawmna leh lawmthu sawina Rev. Lalsangber, Resource Person-in a nei e, Rev. R.C. Lalnghakliana, Synod Moderator-in training chhuakte hnenah Certificate semin thuchah a sawi. Trainee-te hian an hlawkpui dan a lema an ziak chu entirin an hrilhfiah a, trainee-te aiawhin Upa R. Lalropuia’n thu tawi a sawi bawk. Upa H. Zoliana, committee member-in Trainee-te tana tawngtaisakna hun a hmang a ni.
Synod hian Counselling Centre 9 - Mission Veng, Bawngkawn, Vaivakawn, Champhai, Serchhip, Kolasib, Lunglei, Mamit leh Khawzawlah te a nei a, heng Counselling Centre pakuaah hian March 9, 2025 thlenga pantu (client) an neih tawh zat chu 81,728 a ni a, kumin 2025 bikah mi 2,019 an nei tawh a ni.
FG&CC hian Pastor leh Kohhran hruaitute puala Counselling Training a buatsaih thin bakah Kohhran mal, Bial huap, Presbytery huap leh District khawpuiah te Kristian Chhungkaw Seminar, Campaign leh Counselling Awareness Campaign te a buatsaih thin bawk.