May 30, 2025 (Zirtawpni) khan Synod Lay Workers’ Fellowship (SLWF), Annual General Meeting (Lay Day) chu P.C. Girls’ School, Mission Vengah hman a ni.
Lay Day hi hun hniha then a ni a, chawhma lamah Hun Urhsun hman niin Upa Lalduhawma, Chairman, SLWF-in a kaihruai a, Secretary leh Treasurer report ngaihthlak a ni. Rev. R.C. Lalnghakliana, Synod Moderator-in Lay Day Address a sawi a, kum 2023-2025 chhunga SLWF member chatuan ram pan mi pali sunna hun hman a ni a, chawhma hunah hian Praise On 2024 atangin mi pathum an zai bawk.
Chawhnu programme hi Upa Rochungnunga, Finance Secretary, SLWF-in a kaihruai a, variety programme-a hun hman a ni a, department hrang hrang atangin solo, duet, games, musical drama bakah thiam thil chi hrang hrang an entir a. Chawhnu hunah hian member pension-a chhuak mi 36 hnenah ngaihhruina thilpek hlan a ni bawk.
Lay Day pualin Synod hnuaia Department hrang hrangte tan Futsal Tournament, Mipa leh Hmeichhe tan buatsaih a ni a, mipa team-ah Hospital 2 an champion a, hmeichhe team-ah Rescue Home/MCC inkawp an champion a ni. Synod hnuaia thawktuten Lay Day pual vek hian Hospital Charity Fund atan member tinin Rs.100/- theuh an thawh bawk.
Synod Lay Workers’ Fellowship (SLWF) hi Synod hnuaia thawktu Aizawl-a awm Pastor ni lo zawng te intelkhawmna a ni a, Lay Day hi kumtin May thla Zirtawpni hnuhnung berah hman thin a ni a, kum 2026 atang chuan Synod Executive Committee (SEC) 312-nain a rel angin September thla Zirtawpni vawi hnihnaah hman a ni tawh dawn a ni. Tun dinhmunah Synod Lay Workers’ Fellowship (SLWF)-ah hian member 970 an awm a, kumin 2025 atang hian Lunglei Branch hawn thar a ni bawk.