Vawiin (April 26, 2017) chawhnu dar 2 khan Synod Press-ah lehkha chhutna khawl (Web Offset) thar chu Pathian hnenah hlan a ni.
Khawl thar hlanna hun hi Presbyterian Communications General Manager Upa R. Lalmalsawman a kaihruai a, Preass Manager Pu Lalhruaitluanga Ralte-in khawl chanchin a report a, Synod Executive Secretary, Press leh Bookroom changtu Rev. P.C. Pachhunga’n khawl thar hi Pathian hnenah a hlan a ni. He khawl thar hi Samnic Graphic System, Faridabad a siam a ni a, a model hming chu Mudrika Newsliner a ni. Kristian Tlangau phek 32 hi vawi khat chhutah a thlep zo nghalin darkar khatah copy 16,000 a chhu zo thei a ni.
Mizoramah web offset khawl hi a awm nual tawh a, Synod Press-ah hian kum 1998 khan an lo nei tawh a, a nei hmasa an ni a, Vanglaini chanchinbu hi chanchinbu zinga a nei hmasa ber an ni. Web offset khawl hi chanchinbu chhut nana siam a ni ber a, sikul naupang zirlaibu chhut nan an hmang nasa hle bawk. Tuna Synod Press-a web khawl thar hi a danglamna chu lehkhabu chhutna ata bika siam a ni. Mizoram web khawl kan neihte hi chanchinbu chhutna tura siam an nih hlawm avangin a chhut chhuah kha thleh 2-in a lo chhuak a. Chu chu Vanglaini leh Aizawl Post ang tiat hi a ni a. Kristian Tlangau tiata thlep tê leh tur chuan Folding machine, a thlehna khawl hranah barh lehin thleh 2 thleh leh a ngai.
Tuna Synod Press khawl thar hi chuan engkim a chhut hnuah thleh 2 chauh ni lo, thleh 4-a thleh sain a lo chhuak ta thung a. Khawl danga thleh tet leh ngai tawh lovin lehkhabu size tlanglawn ber 1/8 Demy tiatin a thlep zo ta nghal a ni. Technical tawng chuan he web khawl hian 1/8 folder a rawn keng nghal a ni. He web offset khawl thar man hi a bun felna nen chuan Rs. 25,00,000/- zet a ni. Mizoram mipuite tan tangkai takin hman tura ruahman a ni a, chanchinbu, lehkhabu size chi hrang hrang leh poster ang chi tinreng chhutna tur a ni.