Nimin (June 2, 2025) khan Mizoram Christian College chuan Woodland Hills, Zonuam-ah Graduation Day vawi 3-na an hmang. He hun hi Dr. Lalhlimpuii leh Mangchungnunga ten an kaihruai a, Dr. Rosa Laltlanmawii'n hunserh a hmang.
Kal khawmte lawmna thu sawitu Principal Upa Dr. Tawnenga chuan MCC-in Graduation Day vawi thumna a hmang ve thei ta leh zirna kawnga hma a sawn zel chu lawmawm a tih thu sawiin; zirlai kal chhuak turte chu an chhuahna College-in thlarau, taksa leh rilru lama an chherna hmang tangkai zui zel tur leh anmahni chhungkua, kohhran, khawtlang leh ram tana hmasawnna thlentu ni turin a chah a. College chhuahsana anmahni kawng theuh an zawh hunah, MCC Motto - 'For God and My Country' (Pathian leh kan ram tan) tih chu an nun kaihruaitu atana vawng tlat turin a chah bawk. Principal chuan zirtirtu leh staff ten zirna tha pe chhuak tura hna an thawhna a hlawhtlin zel theih chhan chu Mizoram Synod-in a enkawlna leh a thlawp tlatna vang a ni tih a sawi bawk.
Zirlaite thlahna thuchah sawitu MCC Vice Principal Dr. Benjamin Lalfakzuala pawhin zirlaite chu an kal leh zelna turah MCC an kal laia rilru hrisel pu zel tur leh an thiltihna apianga theih tawp chhuahna thinlung pu zel turin a fuih a. Upa Prof. Lianzela, MCC Governing Board Member pawhin thu sawiin; MCC chu college naupang tê la ni mah se, kawng hrang hranga an hlawhtlinna chu lawmawm a tih thu sawiin, zirlaite chu an hmaa kalte zui mawl tawp lova, mi dangte la tih ngai loh thil tha ti tura ding chhuak ngam turin a fuih bawk.
He huna kal khawmte hi Nl. Zoramchhani'n zaiin a awi a. Graduate tharte aiawhin R. Laldinsanga, Vice President, Students' Body-in thu a sawi a, zirlai chhuak turte atangin Department tin aiawhin mi pakhat theuhin thu an sawi bakah Zosangzuala, President, MCC Alumni Association hnen atangin thusawi ngaihthlak a ni bawk.
Mizoram Christian College atanga Graduate thar thlah takte hi Bachelor of Arts (BA) zirlai 44, Bachelor of Commerce (B.Com) zirlai 17 leh Bachelor of Business Administration (BBA) zirlai 8, an vaiin mi 69 an ni. MCC Graduation Day vawi 3-na hi Principal hmasa ber Rev. Dr. Lalchungnunga leh Upa Lalduhzuala Sailo, MCC Governing Board member ten an hmanpui bawk a. Rev. Dr. Rosiamliana Tochhawng, Synod Executive Secretary, i/c MCC-in zirlaite leh thawktute fuihna thu sawiin, tawngtainain he hun hi a khar a ni.