Presbyterian Bible School chuan vawiin (April 28, 2017) chawhnu dar 1:00 khan 39th Batch Farewell and Dedication Programme Pi Zaii Hall, Synod Conference Centre-ah an hmang.
Presbyterian Bible School chuan vawiin (April 28, 2017) chawhnu dar 1:00 khan 39th Batch Farewell and Dedication Programme Pi Zaii Hall, Synod Conference Centre-ah an hmang. Programme hi Synod Moderator Rev. Lalzuithanga’n a kaihruai a, Bible chhiar leh tawngtaina te a hman zawhin Rev. Dr. P.B. Lalmalsawma’n inlawmna leh inhmelhriattirna hun a hmang a. PBS Principal Rev. Lalneihvura’n reports a pe. Synod Secretary Rev. Lianhmingthanga Sailo in zirchhuakte hnenah certificate a hlan a, Praise On 2016 pakhatna, Nl. R. Lalrinmawii’n Pathian fakna hla mawi takin a sa bawk.
Moderator-in zirlaite hlanna leh thuchah a sawi a, zirlai titha te leh Class kal kimte hnenah Rev. Vanlalrawna, PBS Committee Member-in lawmman a hlan a, Pu C. Awithanga Award pawh Pu C. Awithanga chhungten hlanna an nei bawk. Upa C. Lalzawnga, PBS Committee Member-in zirlaite tana tawngtaisakna a nei a. Rev. B. Sangthanga, Executive Secretary i/c PBS; Zirlai aiawh leh Pu C. Awithanga chhungten thutawi sawina hun an hmang bawk. Rev. C.M. Zalenthanga'n lawmthu sawina hun a hmang a, Rev. K. Lalhmuchhuaka’n malsawmnain a khar a ni.
PBS-ah hian a din tirh atangin tun thleng hian zirlai 1875 an awm tawh a, chung zinga 1574 ten tha takin an passed a ni. Tuna batch 39-naah hian zirlai 53 an awm a, 46 passed-in fail an awm lova, exam lo 7 an awm. Exam-a titha zual pathumna thlengin lawmman Rs.1000/-, Rs.700/-, Rs.500/- hlan an ni a, chungte chu:-
1st - B. Vanlalawmchhunga S/o Upa Phirthanga, East Lungdar Kohhran Lalliantluangi D/o Liandawla, Leitan South Kohhran
2nd - Lalparmawia S/o Upa C. Lalrinmawia, Salvation Army Church, Edenthar
3rd - Laldinsanga S/o Upa M.S. Dawngliana, Muanna Veng Kohhran
Batch 39-na zirlai zingah hian class kal kim mi 12 lai an awm a, an hnenah lawmman Rs.500/- theuh hlan a ni. Kum 2014 atangin zirlai zinga Christian Theology leh Church Administration & PCI Constitution Subject-a titha ber hnenah Pu C. Awithanga Award hlan thin a ni a, award hian pawisa fai Rs.1,000/- a keng tel a ni.
Tun tumah hian B. Vanlalawmchhunga S/o Upa Phirthanga, East Lungdar Kohhran chuan Christian Theology-ah 85% leh Church Administration & PCI Constitution-ah 95% hmuin titha ber nihna a hauh ve ve a ni. Presbyterian Bible School atanga zir chhuak tam berte hi rawngbawlna tangkai takah an in hmang zui thin a. Sunday School zirtirtu, Missionary, Social Worker hna thawkte an awm nual a. B.D. leh B.Miss. zawm pawh engemaw zat an awm tawh a ni. Synod Revival Speaker leh Team member tam zawkte hi Bible School atanga zir chhuak an ni bawk. Zir tluan chhuak thei lo te erawh hi chu Aizawla awmna tur mumal nei lo te, sawrkar hna an hmuh vangte leh hrisellohna avanga zir tluan thei ta lo te an ni.