Synod Multipurpose Training Centre (SMTC) buatsaih Lay Leaders’ Training vawi 232-na chu June 16, 2025 (Thawhtanni) zan khan SMTC-ah hawnna inkhawm neih a ni.
Training hawnna inkhawm hi Rev. H. Lalmuanchhana, Director-in a kaihruai a, inlawmna leh report te ngaihthlak a nih hnuah Rev. H. Lalmuanchhana, Director-in training hawngin thuchah a sawi a, he hunah hian Pi Liandingpuii, Mission Vengthlang chu tum hnih a zai bawk.
Tun tum training-ah hian Presbytery pakua - Tuivawl, Aizawl Hmarchhak, Aizawl Central, Aizawl West I, Aizawl West II, Chhimphei, Tuipuiral, Bairabi leh Ramlai Presbytery atangin Upa 36 leh Maturam Synod (Myanmar) atangin Upa pakhat, an vaiin Upa 37 an tel a ni.
Kohhran Upate tana Lay Leaders’ Training hi kum 1996 atang khan neih tan a ni a, training-ah hian Kohhran Upate tan Kohhran enkawl dan leh inrelbawlna lam atana pawimawh chi hrang hrang bakah Kohhran thlarau lam nun enkawl dan te zir thin a ni. Training hi June 20, 2025 (Zirtawpni) zanah kharna hun hman a ni ang.
Synod Multipurpose Training Centre (SMTC) hi kum 1993 Synod-in din tura a rel angin January 12, 1996 khan din a ni a, a tira a hming chu Christian Multipurpose Training Centre tih niin kum 2001 Synod khan a hming hi Synod Multipurpose Training Centre tiin a thlak leh a ni. Synod Multipurpose Training Centre (SMTC) hnuaiah hian thalaite’n mahni kuta eizawnna kawng an lo neih ve theihna tura training chi hrang hrang (Vocational Training) buatsaih thin a ni bawk a, tunah hian trade chi hrang panga – Tailoring, Computer, Mobile repairing, Beauty Culture leh Electrical te kalpui mek a ni a, zir chhuak tawh mi 1885 awmin tunah hian zirlai 103 an awm mek a ni.
For more Pics Click Here