Vawiin (June 18, 2025) chawhnu dar 1:00 khan Presbyterian English School (PES) hnuaia HSLC 2025 result tha lawmna J.M. Lloyd Hall, Synod Office-ah neih a ni.
Programme hi Pu K. Lallianzuala, Secretary, Synod Education Board-in a kaihruai a, Upa P.C. Vanlalhruaia, Supervisor of Schools-in inhmelhriattirna leh report a pe a. Synod Moderator Rev. R.C. Lalnghakliana’n thu sawiin mimal ti thate hnenah lawmman a sem a, Rev. Dr. Rosiamliana Tochhawng, Executive Secretary i/c Education-in thu sawiin School ti thate hnenah lawmman a sem bawk. Upa Lalthanzama, Synod Education Board Member-in lawmthu a sawi a, Rev. Malsawmdawngliana, Synod Education Board Member-in malsawmnain hun a khar a, he hunah hian Nl. Maria Lalmuanpuii a zai bawk.
Zirlai ti thate chawimawina hunah hian Distinction-a pass mi 51-te hnenah lawmpuina Rs.10,000/- theuh pek an ni a. PES zirlai zinga HSLC result-a Top 3 te tan Special Award siam a ni a, lawmman hian Cash Award leh Citation a keng tel a ni. Lawmman dawngtute chu :
1. Vanlalnunpuii, Mamit PES
2. Christy Lalnunhlui, Tlungvel PES
Isak Zairemtluanga, Thingsulthliah PES
3. Lalhriatsanga, Zemabawk North PES
Lallawmzuala, Zemabawk North PES
Lalramdintluangi, Serchhip PES
PES atang hian HSLC 100% pass School 11 an awm a, chung zinga a titha School pathum te hnenah lawmman – Computer Set, Citation leh Cash Award pek an ni a, chungte chu –
1. Khawzawl Vengthar PES
2. Zotlang PES
3. Serchhip PES, te an ni.
Heng bakah hian pass kim vek School pasarih hnenah Rs.10,000/- theuh pek an ni bawk.
Tun dinhmunah Presbyterian English School zingah pawl 10 nei chin school 38 an awm mek a. HSLC exam zawng zawng hi zirlai 892 an ni a, chung zinga zirlai 805-in an pass a. Distinction-ah 57, First Division-ah 275, Second Division-ah 369, Third Division-ah 104, PES pass percentage hi 90.25 % a ni.
For more Pics Click Here