Kristian Thalai Pawl
MSACS leh Association for Voluntary Blood Donation (AVBD) ten World Blood Donor Day puala thisen pe tute chawimawina hun an buatsaihah CKTP aiawhin Rev. H. Lalawmpuia, Leader leh T. Upa Lalremsiama Khiangte, committee member te an tel a. He hunah hian KTP ten thisen pek tam lamah Religious Category-ah Pakhatna leh Overall Category-ah Pahnihna an dawng a ni.
Trust
June 13, 2025 (Zirtawpni) khan Bungtlang Pastor Quarters sak thar tur enfelin Pu Lalramenga Royte, JE a kal.
Campus Ministry
June 13, 2025 (Zirtawpni) khan hmun hrang hrang - Republic Veng PES, Sairang Dinthar PES leh zan lamah College of Nursing, Synod Hospital-ah te hun an hmang a. Republic Veng PES leh Sairang Dinthar PES lamah thuhril rawngbawlnaa hun hman a ni a, zan lamah College of Nursing, Synod Hospital-ah Kristian Hla Bu inzirtirna leh Zai hruai inzirtirnaa hun hman a ni.
Heng hunah te hian Rev. H.L. Thianghlima, Director leh Tv. Lalrinchhana, Counselor-te bakah, Resource person Upa K. Lalengzama, Upa Lalnunsiama Khalthang, Pu C. John Saiparliana, Tv. G.C. Lalremruata leh Pu Lalruatfela te an kal.
SL&PB
June 17-19, 2025 chhung hian Zobawk Bialah Literature Seminar neihpuiin Rev. PB Zosapthara, Editor leh Pu Eric Lalnunmawia, OA te an kal.
Worship
June 18-19, 2025 chhung khan Champhai leh Ruantlang Bialah Zai hruai Training neihpuiin Pu H. Lalrinmawia, Senior Music Instructor leh Pu T. Laldintluanga, Trainer te an kal.
Social Front
Synod Social Front chuan June 18, 2025 (Nilaini) khan Synod Social Front hnuaia Campaigner-te ko khawmin, Briefing & discussion hun an hmang a, Rev. Dr. K. Lallawmzuala, Executive Secretary i/c Social Front-in hun a hmang a, hemi hunah hian campaigner mi 53 an kal.
Tun dinhmunah Synod Social Front hnuaiah hian campaigner 64 an awm mek a, an ni hian thupui chi hrang hrang – Political Education, Ei leh Bar, Kut hnathawh, Intodelh, Moral Reforms, Social Media, Zuk leh hmuam, Corruption, Ramngaw, Nungcha leh Tuihna humhalh leh pianpun chungchang hmangin Kohhran leh Bial hrang hrangah campaign an nei thin a ni.
Synod Relief Fund
Tun hnaia harsatna hrang hrang tawkte hnenah hetiang hian Synod Relief Fund pek a ni.
Barak Area huam chhunga tuilian tuar chhungkaw 77 hnenah Rs.5,51,000, Keitum Dinthar leh Keitumkawna leimin tuar chhungkaw panga hnenah Rs.64,000/-Sialsuk leh Sailama damlo leh leimin tuar chhungkaw paruk hnenah Rs.52,000/-, Lungpho khuaa leimin tuar chhungkaw pathum hnenah Rs.43,000/-, Vaivakawn Vengthlanga in chhia chhungkaw pathum hnenah Rs.39,000/-, Electric Veng leh Electric Vengthlanga damlo leh leimin tuar chhungkaw pathum hnenah Rs.38,000/-, Tualcheng Kohhran leimin dawlna atan Rs.30,000/-, Kawlkulh khuaa in chhia chhungkaw pakhat hnenah Rs.18,000/-, Phullen Vengthara leimin tuar chhungkaw pakhat hnenah Rs.15,000/-, North Lunglenga khawsak harsa chhungkaw pakhat hnenah Rs.10,000/-, Sihhmui khuaa damlo mi pakhat hnenah Rs.10,000/-, Tlangpui khuaa damlo mi pakhat hnenah Rs.10,000/- leh West Phaileng khuaa in kang chhungkaw pakhat hnenah Rs.10,000/- pek a ni.
May thla chhunga harsatna hrang hrang tawkte hnena Synod Relief Fund atanga chhawmdawlna sem zat chu Rs.6,37,000/- a ni.