Rev. Lalnghinglova (kum 99) pensioner chu nimin (July 2, 2025) chawhma dâr 10:10 khan City Hospital, Mission Vengah a thi a, vawiin (July 3, 2025) chawhnu dar 1:00 hian Mission Vengthlang Kohhran Biak Inah Rev. K. Lungmuana, Ex-Moderator-in a vui ang.
Pian leh mûrna
Rev. Lalnghinglova hi March ni 25, 1926-ah Tanhril khuaah a lo piang a. A pa chu Thang- savunga, Pu Taia tia hriat lar a ni a; a nu chu Khawliantlingi a ni. A pian tirh hian Tirhkoh atân a pa hian a hlân a ni. February ni 1, 1957-ah Saikungi nen Pastor P.D. Sena kutah Ngopa khuaah an innei a, fapa 2 leh fanu 5 an nei.
Zirna lam
Rev. Lalnghinglova hian Tanhril khuaah Primary School a zo va. Lehkha thiam thei leh nungchang tha, an zirtîrtute rin hlawh tak a ni. Sande Sikul lamah pawh inkhawmpui châng insawisiakah a tel thîn a, lâwmman pawh a dawng ve nual. Kum 1939-a Tanhril leh a chhehvel Naupang Sande Sikul Inkhawmpui, Tanhril khuaa an neih tum pawhin mi mal châng insawisiakah Sam bu mal, a kâwm sen, a sena ‘Sam Bu’ tih chuang a dawng a. He inkhawmpui hi Pu Taia (NPSS Superintendent) sâwmna angin Sande Sikul hotu ber Pi Zaii (Miss Katie Hughes) leh hmeichhe hostel-a awm nula pathum (Mission chawm) – Zolawmi, Biaksiami leh Nuhliri-ten an hmanpui a ni.
A naupan lai hian Pi Zaiin Mission chawma Middle School (ME) zir naupangho zînga awmtîr tûrin Lalnghinglova hi a dil a. Lal leh zirtîrtu fate tân lo chuan Mission châwmna hi hmuh a harsa a, vânneihna ropui tak a ni. Kum 1940-ah Rev. Samuel Davies (Pu Samuela) hnênah lehkha zir tûr chuan a awm ve ta a. Boys’ M.E. School atang chuan Pâwl 4 chu a pass ve ta a ni.
Kum 1941-ah Pâwl 5 a zawm a, a nu leh pate an hrisel that loh avângin a chawlhsan leh rih a. Kum 1945-ah Pâwl 5 a zawm leh thei chauh a ni. Kum 1946-ah Pâwl 6 (M.E.) chu first-ah a zo va, Boys’ M.E. School-ah pakhatna a ni nghe nghe.
Rawngbawlna lam
Kohhran châwma L.Th. (Licentiate in Theology) zirtîr tûrin Pastor Thanga, Dawrpui Vêng Bial vawngtu (Hetih laia Tanhril behna Bial) chuan a pa hnênah a rawn a. Hemi zir tûr hian Synod-in Pâwl 7 atanga Matric thlenga zir tûr châwmna a dawng a, L.Th. zir tur chuan a inbuatsaih ve ta a. Kum 1951-ah Matric a zo va. Cherra-ah L.Th zirturin a chhuk a, kum 1954 April thlaah second class-ah a zo ta a ni.
Cherra-a a zir chhungin Student Christian Movement an din a, Second Year a zir chhungin Secretary a ni nghe nghe. Khasi tawng a thiam viau hman a nih a rinawm a, Khasi tawngin Poems pawh a ziak thin a ni.
Kum 1954 hian Ngopa Biala Pro. Pastor hna thawk tûrin Synod-in a ruat nghal a. Mizoram Synod hnuaia Pro. Pastor hmasa ber pahnih zînga pakhat a ni a, pakhat hi Rev.Lalchama, Leitan a ni. Kum 1956 February thlaah Dawrpui Biak Ina Synod Inkhawmpuiah nemngheh a ni a, Ngopa Bialah hian kum 1958 thleng a awm a ni. Kum 1959–1967 chhûng Saitual Bialah a awm a, zirtîrtu lam indaih lohna avângin Aizawl Theological College-ah kum 1967–1975 thleng a awm a. Kum 1975 atang chuan Bursar hna leh Bible Ralchhan Director hnate thawkin kum 1981 thleng College-ah hian a awm a ni. Hemi hnu hian kum ruk, kum 1982–1986 chhûng Synod Publication Board-ah a thawk leh a. Kum 1987-a pension tûr a ni na a, a thawh hun chhûng kum hnih pawh seisak a ni a, Bungkawn Bial vawntîr a ni. Kum 1989 January thlaah a rawngbawlna chu a chawlhsan ta a, Mission Vengthlanga a inah a khawsa ta a ni.
A thawh chhûng hian Synod Committee hrang hrang – Pastoral, Theological, Education, Music, Literature, Sande Sikulahte a tel a. Synod Secretary-ah vawi hnih (1974, 1975) tangin, Synod Inkhawmpuiah thupui vawi hnih a sawi a, Pastor nemngheh fuihna leh tawngtaisakna vawi khat ve ve a hmang tawh bawk. Presbytery Moderator-ah vawi hnih (Hmarchhak, 1960–1961 leh Aizawl Chhim Presbytery, 1989–1990), Secretary (Hmarchhak Presbytery, 1956–1959) leh a pension hnuah Bial Chairman (Mission Veng, 1994–1995), hna te a chelh tawh bawk. Pastor hna a thawh chhûngin nupa tuak 419 a inneihtîr a, mi 2,859 a baptis bawk.
Thuziak lamah pawh sulhnu a nei nual a. Hêng – Bible Eng (Light of the Bible), Salvation (A Christian concept), Rev. Beiseia (L) nena an ziah dun te, Man and His Nature, Lalpa Ke Bulah I&II, Zoram Nghahchhan, Mi tin tâna Pathian thutiamte, Krismas leh Mihring leh a nihna (1990) te hi a lehkhabu ziah chu a ni. Kristian Tlangau chanchinbu centenary edition-ah thuziak thawh hnem ber lâwmman a lâk bâkah chanchinbu hrang hrangah an sawmna angin thu a ziak nual bawk.
Hun hnuhnung lam
Rev. Lalnghinglova hi pa hrisel pangngai tak niin, natna em em pawh a neih ngai hriat a ni lo va. A kum a lo tam tak hnu erawh hi chuan taksa chak lohna hrang hrang chu a nei ve zel a. In lamah awm deuh chawtin tual pawh a chhuak peih meuh tawh lo va. June ni 28, 2025 (Inrinni) chawhnu lam atang khan a inthiar deuh reng a. Zun lamah harsatna tawkin, nilêng zankhuain a buai a. A tu leh faten duat taka an enkawl laiin July ni 2, 2025 (Nilaini) tukthuan ei kham khân City Hospital, Mission Veng panpui a ni a, chawhma dâr 10:10 khân chatuan ram min pansan ta a ni.
VUINA PROGRAMME
A hmun : Mission Vengthlang Kohhran Biak In
A hun : 3.7.2025 dar 1:00 PM
Vuitu : Rev. K. Lungmuana, Ex- Moderator
Chanchin sawi : Upa Vanlalsawma Siakeng, Synod Secretary
Thlamuanna thuchah : Rev. K. Lungmuana, Ex-Moderator
Tawngtaisaktu : Upa Dr. Vanlalzara, Statistician
Zaipawl : Mission Vengthlang Kohhran Zaipawl
Hla sak ho : ‘Kalvaria hmangaih lo lang kha’ KHB No. 142
Malsawmna : Rev. Dr. Rosiamliana Tochhawng, Executive Secretary
Thlanmual
Hun hmangtu : Rev. Lalnunmawia Pachuau, Bialtu Pastor, Mission Vengthlang