Rev. Chawnghranga (kum 82) pensioner chu nimin (Sept. 1, 2025) zing dâr 9:05 khan a thi a, vawiin (Sept. 2, 2025) chawhnu dar 1:00 hian Ramhlun Vengthar Kohhran Biak Inah Rev. R.C. Lalnghakliana, Synod Moderator-in a vui ang.
Pian leh mûrna
Rev. Chawnghranga hi March 1943-ah Neihloh khuaah a lo piang a. Thangvunga (L) leh Thangsemi (L)-te fa pakua zinga a pangana a ni. Kum 1973 May thla khan Laltanpuii nen an innei a, fapa 3 leh fanu 2 an nei a ni.
Zirna lam
Rev. Chawnghranga hian Kum 1953-ah Lower Primary a pass a, chhûngkaw harsatna avângin hei bâk chu sikul a kal thei lo va. Kum 1960 atangin sumdâwnna lam a bei tan a. Kum 1963 August thla atangin Aizâwl, Tuikual Vêngah chêngin Bazarah dâwr a nei ve a; sumdâwnna lamah hian a kal tluang hle. Rawngbâwlna lamah rual a awh ve êm avângin Dawrpui Middle School-a zân sikulah pawl sarih a zir chhunzawm a. Zan sikul atang vek hian kum 1965 khan pâwl riat pawh a pass a ni.
Kum 1966-a Mizoram a buai tâk avângin zirna chhunzawm thei ta lovin, Manipur Meitei-ho zîngah rawngbâwl hna a tan a. Tirhkoh hna thawk chung hian private-a Matric exam-in kum 1975 khân a pass a; PUC First year a zawm ve nghâl a. Kum 1976-ah Aizawl Theological College-ah B.Th. zirin kum 1980-ah tha takin B.Th. chu a pass a. Hei bakah hian Sialsûk Biala Pastor hna a thawh laiin kum 1988 khan BD a pass leh bawk.
Rawngbawlna lam
A naupan lai atanga missionary nih tum thin niin a thinlungah Ramthar rawngbâwlna lam veina leh tûlna chu a nung reng a. Kum 1966 Central KTP General Conference Saituala neih tumin Rev. V.L. Zaithanga’n Ramthar rawngbâwlna tûlzia uar taka a sawi chuan a rilru a hneh hle a. Hemi tum hian Pathian tana hun puma rawngbawl turin thutlukna a siam ta a ni.
KTP Conference tâwp zân atang chuan Mizoramah independence puan a ni a, Mizoram pum chu ram buai a lo ni ta a. Aizâwl Bazar pawh kângin a dawr bungraw neih pawh a kang fai vek a. Mi tam takte lungngai leh manganga an kun reng laiin ani chuan, “Hun puma rawngbâwl tûra ka inpêkna min dâl thei thil Pathianin min lâksak ta,” tiin a rilru a thawveng huai ve hlauh thunga, “Lâwmin ka luang liam a ni,” a ti thîn.
Mizoram buai lo zual chho zêlah chuan rawngbâwla chhuak thei lova inhriain, Synod Ramthar Office-ah a kal a, Rev.V.L.Zaithanga chu a rawngbâwlna tûr ngaihtuahpui tûrin a ngên ta chawt mai a. Rev. V.L.Zaithanga chuan Mizoram buai lai a ni a, lehkha thiam lo a ni bawk si nên, thil ruahmanpui mai dân a awm loh thu a lo hrilh a. Mahse, beidawng duh lovin, “Hlawh lam ka beisei lo va, ka thawh vena tûr min kawhhmuh chuan hlawh lovin ka thawk mai ang,” tiin a nawr tlat mai si a. Rev. V.L. Zaithanga pawh chuan chutianga a inhuamna chu hre thiamin Tuithaphai Presbytery leh Vânbâwng leh Phuaibuang Bial KTP-ten Mission hnaa hma an lâk mêkna Manipur rama Moirang chu a kawhhmuh ta a. Meitei zînga thawk tûrin kum 1966 September atangin Moirang-ah a awm ve tan ta a ni.
Kum 1967 July leh August thla chhûng khan NEFA (tûna Arunachal Pradesh ni ta)-a Along-ah Pro. Pastor Rokhûma te rawngbâwlna pui tûrin a kal a. Sawrkâr lamin awm zêl an phal loh avângin a lo kîr leh a, Manipur-ah a awm leh ta a. Moirang-ah te, Ningthoukhong-ah te, Oinam-ah te Tirhkoh hna kum 1976 thleng a thawk a, Pathian thu a zir leh ta rih a ni. Kum 1980 Synod Inkhawmpui chuan Pro. Pastor atan a la a, kum 1983-a Mission Venga Synod Inkhawmpui chuan Pastor atan a nemnghet a. Kum 2004 khan pension-in a chhuak a ni.
A awm tawhna Bialte:
1. 1981 : Mamitah Pro. Pastor-in
2. 1982 July-1983 January : Phuldungseiah Pro. Pastor-in
3. 1983 : Mamit-ah Pro. Pastor-in a awm leh
4. 1984-1989 : Sialsuk Bialah
5. 1990-1993 : Moirang, Manipur
6. 1993 June - 1998 : Manipur Field Secretary, Imphal
7. 1999-2003 : Ramhlun South Bialah
Pastor rawngbawl hna a thawh chhung hian nupa tuak 224 a inneihtîr a, mi 2,081 baptisma a chantîr bawk.
Synod Committee hrang hranga telna:
(1) Synod Mission Board 1983-1984, 1985-1989
(2) Manipur Presbyterian Mission Committee 1985-1989
(3) Synod Executive Committee 1985-1989, 1991-1998
(4) Synod Finance Committee 2001-2003
(5) Synod Hospital Board 2004-2006, 2007-2009,2010-2012
(6) Presbytery Moderator tum thum
Para Church:
(1) Kuki leh Naga buai Peace Mission Treasurer 1993-1998
(2) Kuki leh Paihte buai Peace Mission Chairman 1995-1998
BSI (Bible Society of India):
(1) President, Imphal Branch 1994-1998
(2) Dimapur Auxiliary Exe. Comt. member 1994-1998
(3) Meitei Holy Bible Major Revision Comt. Leader 1994-2000
(4) NEI Translation Consultation Comt. member 1997-2000
(5) President, Aizawl North II Branch 2002-2003
(6) Aizawl Auxiliary Exe. Comt. member 2002-2003
A mizia
Pastor leh Upate nena thawh hona tha neih duh mi a ni a, inringtawn, rilru inhmu tlang leh lungrualna a ngai pawimawh hle. Kohhran enkawl hi a ngai pawimawh em em a. Dan bu te, Inkhawmpuite leh Committee-in kalhmang an lo rel tawhte hriat zui a tum tlat a, chungte chu tihhlawhtlin hram duh mi a ni a, Pastor dangte pawhin hetiang hi ngai pawimawh se a duh thin hle.
Rorelna dik ngai pawimawh mi a ni a, chutihrual chuan, rorelna dik chu khawngaihna, lainatna, hriatthiamna leh hmangaihna tel veka kalpui a tul tih hi a ngaihdan a ni a. Mipui rilru sukthlek ngaichang leh hrethiam tak chungin, mipui duh dan leh nawrna zui mai lova, kawng dik leh ziktluaka hruai tum thin mi a ni.
Kohhran rorelna (Church Court) hi a ngai pawimawh em em a. Pastor anih hnu hian Covid laia Inkhawmpui tura palai thlan bik a nih tum tih lohah chuan Synod leh Presbytery Inkhawmpui a kal kim vek a ni.
Hun hnuhnung lam
Kum 2012 atang khan Lung tha lo a nei tih hriat a ni a, a inenkawl zui ta char char a. Chuti chung chuan kum 2018 Good Friday khan Pulpit-a a thusawi lai chu nikhawhrelovin a tlu a, Civil Hospital-ah admit nghal a ni a. Kumin 2025 June ni 11 zing kar khan Bathroom-a a inthiar chu nikhawhrelovin a tlu leh a, a chal a sawh kak a, Civil Hospital-ah kalpui niin, a lung valve pakhat a lo chhiat belh leh tih hriatchhuah a ni.
August ni 10 atang khan thil a ei tha hlei thei ta lo a, a chauh tak riau avangin August 14-ah Thisen test a ni a, a thisen test result hi August ni 18 khan entir a ni a, a lung lamah chuan that loh belhna a awm lem lo a, thil lo ei tha se a tha leh mai ang an lo ti a. Amaherawhchu thil a ei theih chhunzawm tak si loh avangin a taksa a chak lo chho telh telh a.
August ni 26 chhuna khuma a mu lai chu nikhaw hrelovin a awm leh a, Greenwood Hospital panpui a ni a, hemi zan hian nikhawhrelova awm lehin, HDU-ah luh a ni a. August ni 30 Inrinni chhunah Cabin-a sawn chhuah an dil a. Cabin-a a awm hnu hian that lam a pan zel beisei laiin September ni 1 zing dar 1:30 velah a thawk a hah tan a, Oxygen level sang bera pek a ni chung pawhin hma a sawn thei ta meuh lo a. Doctor leh Nurse ten a nunna chhan tumin theihtawp an chhuah chungin September 1, 2025 zing dar 9:05 khan a rawng a bawl thin Lalpa hnena chawl turin a kal ta a ni.
VUINA PROGRAMME
A hmun : Ramhlun Vengthar Kohhran Biak In
A hun : 2.9.2025 dar 1:00 PM
Vuitu : Rev. R.C. Lalnghakliana, Moderator
Chanchin sawi : Upa Vanlalsawma Siakeng, Synod Secretary
Zaipawl : Ramhlun Vengthar Kohhran Zaipawl
Thlamuanna thuchah : Rev. R.C. Lalnghakliana, Moderator
Tawngtaisaktu : Rev. B. Zohmangaiha, Synod Secretary Jr
Zaipawl : Ramhlun Vengthar Bial Zaipawl
Hla sak ho : ‘Tunah a thar hmangaihna eng nuamah’’ KHB No. 455
Malsawmna : Rev. V.L. Luaia Hranleh, Senior Executive Secretary
Thlanmual hun hmangtu : Rev. Lalrinsanga, Bialtu Pastor, Ramhlun Vengthar