Vawiin (May 31, 2017) khan Presbyterian English School, HSLC result 2017 a ti tha te chawimawina leh lawmman semna Synod Office-a Devotion Hall-ah neih a ni.
Programme hi Rev. B. Sangthanga, Executive Secretary i/c Education in a kaihruai a, Upa Zochungnunga, Member, PES Sub-Committee in hunserh hmangin Pu P.C. Vanlalhruaia, Supervisor of Schools (PES) in inhmelhriattirna neiin report a pe nghal a. Synod Moderator Rev. Lalzuithanga’n thu sawiin lawmman a sem nghal bawk. Hemi hnu hian a duh apiang tan thusawina hun hawn a ni a, Pu Lalvena Hnamte, Secretary Synod Education Board in lawmthu sawina hun a hman zawhah Chairman-in malsawmnain programme a khar a ni. HSLC exam hnuhnung berah khan Presbyterian English School 19 atangin exam beitu an awm a. Chung zinga school 10 chuan 100% pass record an nei thei a, school 6 chuan 80% chin chung lam pass record an nei bawk. Kumin 2017-a zirlai HSLC exam beitu zat chu 360 a ni a, an zinga 332 an passed a, Distinction-ah 40, First division-ah 139, Second division-ah 123, Third division-ah 30 niin a pum puia khaikhawmin pass percentage chu 92.22 a ni. PES result tha lawmna hi kum 2014 atang khan mumal taka neih chhoh a ni a, Synod Education Board in school tha tehna (criteria) a siam atangin school tha thlan thin an ni a, a ti tha 3 te hnenah Special Prize pek thin an ni. Kum 2017 lawmman dawngtute chu-
| Rank | School | Lawmman |
| 1st | PES, East Lungdar | Desktop Computer |
| 2nd | PES, Darlawn | Rs.12,000/- |
| 3rd | PES, Zotlang | Rs.10,000/- |
Consolation Prize (Rs.5,000/- theuh) 1. PES, Khawruhlian 2. PES, Khawzawl 3. PES, Lengpui 4. PES, Thingsulthliah 5. PES, Serchhip 6. PES, Saiha 7. PES, Khawlailung Heng bakah hian mimal ti tha, Distinction a pass zirlaite hnenah Laptop Computer pek thin an ni a, tun tumah hian zirlai 40 laiin Laptop Computer an dawng a ni.