Vawiin (June 2, 2017) zing dar 7:00 khan Synod Bookroom thar, Khatla North Biak In hnuai a mi chu Rev. P.C. Pachhunga, Executive Secretary i/c PRESCOM Department chuan a hawng.
Bookroom thar hawnna inkhawm hi Upa R. Lalmalsawma, General Manager, PRESCOM Department chuan kaihruaiin Pu Lalniliana, Synod Bookroom Manager hnen atangin report tawi ngaihthlak a ni a. Khatla North Kohhran aiawh atangin thusawi ngaihthlak a nih hnuah Rev. P.C. Pachhunga, Executive Secretary i/c PRESCOM Department chuan mitin dawr theih turin a hawng ta a ni.
Synod Bookroom Headquarters chu sak that tura tih a nih avangin Showroom sawnna atan Khatla North Biak In hnuai hi April thlatir atang khan chei hna thawh tan a ni a. Ngawrh taka buatsaih hna thla hnih chhung thawh a nih hnuah hawn theiha peih fel a ni ta a ni. He bookroom thar hi a dung feet 38 a sei niin a vâng lam hi feet 30 a zau a ni a, stockroom feet 16 a sei feet 8 a zau a nei bawk. Hemi buatsaih nan hian Rs. 20,48,310/- zet sen a ni.
Khatla Bookroom thar hi Synod Bookroom showroom zingah chuan a mawi ber leh changkang ber a ni a. Tunlai hmanraw tha leh thar hmanga a theih anga thuam a ni bawk. Headquarters Building sak zawh a nih hunah pawh khar lova Branch anga ding tlang zel tura ngaih a ni a. Heti hian Synod Bookroom chuan Branch 13 leh Distributor 32 a nei mek a ni.