MUHCS CHUNGCHANGAH MIZORAM SAWRKAR LEH SYNOD-IN INREMNA ZIAK
October 28, 2025 | NEWS
Vawiin (October 28, 2025) tlai dar 3:00 khan Pi Lalrinpuii, Minister, H&FW Dept. office-ah Mizoram Sorkar leh Mizoram Synod chuan Mizoram Universal Health Care Scheme (MUHCS) chungchangah inremna thuthlung an ziak. Synod Executive Committee vawi 314-na, September 24 - 25, 2025-a ṭhu chuan Synod Hospital, Durtlang leh John Williams Hospital, Lungleiin MUHCS zawm a lo rem ti tawh a. He mi atana thil ṭul leh pawimawhte bawhzuiin, tih fel ngaite tih fel a nih hnuah inremna thuthlung hi an ziak ta a ni.
Inremna thuthlungah hian Mizoram Synod aiawhin Rev. R.C. Lalnghakliana, Synod Moderator-in hming a ziak a; Rev. Dr. K. Lallawmzuala, Exe. Secretary, i/c Hospital leh Upa Vanlalsawma Siakeng, Synod Secretary-ten hriatpuina hming an ziak bawk. Sorkar lam aiawhin Dr. Lalhriatzuali Ralte (IAS), CEO, Mizoram Universal Health Care Scheme (MUHCS)-in hming a ziak a, Dr. R. Lalchuanawma, Dy. CEO leh Dr. C. Vanlalduhsaka, MO ten hriatpuina hming an ziak ve bawk a ni.
Rev. R.C. Lalnghakliana, Synod Moderator chuan, "Hun rei tak indawrna a kal hnuah heti anga inremna thuthlung kan ziak thei ta hi a lawmawm em em a. Kohhran mipui ten ṭangkai taka an hman ngei ka beisei" a ti. MoU ziah programme tawi hi Rev. V.L. Luaia Hranleh, Sr. Executive Secretary, Mizoram Synod chuan lawmthu sawia ṭawngṭaiin a ṭin a ni.
Inremna thuthlung hi November 1, 2025 aṭanga hman ṭan tur a ni ang.
