Rev. Lalrindika (kum 50), Badu (Maniktala), Kolkata Bial vawngtu chu November 19, 2025 chawhma dar 10:15 khan Heart Attack avangin a boral a, vawiin (Nov. 21, 2025) chhun dar 12:00 khan ITI Vengchhak Kohhran Biak Inah Rev. R.C. Lalnghakliana, Synod Moderator-in a vui a ni.
Rev. Lalrindika hi Rev. Vanzama (L) leh Pi Laltinthangi te fa panga zinga a naupang ber dawttu niin Kawrthah khuaah August 14, 1975 khan a lo piang a. Pianpui unau hmeichhe pahnih leh mipa pathum a nei.
Kum 2006 October ni 19 khan R. Lalsiamkimi d/o Upa R. Lalthankunga, ITI Vengchhak nen ITI Vengchhak Kohhranah an innei a, fanu pakhat leh fapa pathum an nei.
An fate :
1. Lallawmzela (Kum 18)
2. Lallawmsanga (Kum 17)
3. Lallawmawma (Kum 13)
4. Lawmsangzuali (Kum 11)
Zirna lam
Kawrthah khuaah Primary atanga High School thleng a kal hnuin, Pachhunga University College-ah a zir chhunzawm leh a. P.U. a zir zawhin kum 1996 khan Aizawl Theological College-ah B.Th a zir chhunzawm ta a ni. B.Th a zir zawh hnu hian B.D. a zir leh a, B.D. a zawh hnuah Pastor rawngbawlnaah a lut ta a ni. Pastor a nih lai hian Union Biblical Seminary (UBS), Pune-ah M.Th a zir zawm leh a, kum 2019 khan M.Th hi a zir zo.
Rawngbawlna lam
Rev. Lalrindika hi kum 2003-a ATC atanga BD a zawh hnuin kum 2003 khan Synod Inkhawmpui chuan Pro. Pastor atan a la a, Champhai Vengthlangah a dah a. Kum 2006 khan Pastor atan nemngheh niin Cachar Kahrawt Pastor atan dah a ni. Pastor rawngbawl hna a thawh hun chhung hian Synod Committee pawimawh tak takah a thu thin. Pastor rawngbawl hna a thawh chhunga a awm tawhna leh Committee-a a lo tel tawhnate:
1. 2004 - 2006 : Pro Pastor, Champhai Vengthlang Bial
2. 2007 - 2011 : Cachar Kahrawt Bial
3. 2012 - 2016 : North Hlimen Bial
4. 2017 - 2019 : M.Th, Union Biblical Seminary, Pune
5. 2019 - 2023 : Bilkhawthlir Hmar Veng Bial
6. 2023 : Synod Office (SMB & MSSU) June - Dec
7. 2024 - 2025 : Badu (Maniktala) Kolkata
Synod hnuaia Committee-a a tel tawhnate:-
1. 2010 - 2015 : Synod Executive Committee (SEC)
2. 2016 - 2017 : SL&PB (Board Committee)
3. 2020 : Synod Mission Board (SMB)
A mizia
Rev. Lalrindika hi a naupan lai atang renga nun tha, zakzum tak chunga rual pawl nuam ti ve thin tak a ni a, mi inthlahrung tak, dawt sawi ngai lo, ngainatawm leh a bula awm nuam em em mai a ni a. A pian tirh atanga rawngbawl tura a nu leh pain Pathian hnena an hlan a ni. Tleirawl sual nei lo a ni a, zirna kawngah a thiam thei pawl niin infiamna hrang hrang pawh a ti theiin a tui em em bawk. Mi pawisawi hlau tak fimkhur taka tawng thin a ni a, Pathian thu a zir lai pawhin ngainat a hlawh hle. Pathiana rinna nghat tlat mi niin harsatna leh natna a tawh lai pawhin “Pathianin a rawngbawl zel tura min la duh chuan ka natna te pawh hi min tidam vek thei a, chutah chuan ka innghat tawp mai a ni “ a ti thin.
A nat dan
Kum 2021 khan Bilkhawthlir Hmar Veng Bial a vawn laiin taksa lam harsatna a nei a, phaiah refer niin Birla Heart Research Centre, Kolkata panpui a ni a. A lung a tha lo tih hmuh chhuah niin zai a ni a, Vein block te a lo nasa hmanin Stent te vuahsak a ni bawk. Hetiang a nih tak avangin a hahdam theih deuh beiseiin Synod Office-ah dah a ni a; a dinhmun a ziaawm chhoh tak avangin kum 2023 Synod Inkhawmpui Mission Venga neih chuan Badu (Maniktala) Bial, Kolkata vawng turin a dah a.
Han inenkawl zui ngai em emin a awm lova, amaherawhchu tunhnaiah a lung lamah hian harsatna a neih leh deuh avangin September ni 10 khan Apollo Hospital, Kolkata chu panpui a ni a, kar hnih vel a awm leh a, ICU-ah zan hnih vel dah a ni bawk. Tha takin Hospital atangin a chhuak a, a hnuah insawisel zuina pawh a nei lem lo va, a taksa pawh a chak tha viau a ni.
Ni 19 November 2025 khan a fate sikul kal a hruai a, a lo haw hnuah, Badu Mission Compound-ah Ngopa KTP lo zin tur hmuah dan tur an sawi hova. Chumi hnu chuan an inah kir lehin, Quarters kawtah scooty a dah a, a dah fel hman tihah scooty bawhin nikhawhrelovin a lo awm a. Hmanhmawh takin Narayana Multispeciality Hospital, Barasat panpui nghal a ni nachungin chhan hman a ni ta lo va, November 19, 2025 chawhma dar 10:15 khan Heart Attack vangin chatuan ram a lo pan ta a ni.
VUINA PROGRAMME
A hmun : ITI Vengchhak Kohhran Biak In
A hun : Nov. 21, 2025 (Zirtawpni) chhun dar 12:00
Vuitu : Rev. R.C. Lalnghakliana, Synod Moderator
Chanchin sawi : Upa Vanlalsawma Siakeng, Synod Secretary
Zaipawl : ITI Vengchhak Kohhran Zaipawl
Thlamuanna thuchah : Rev. R.C. Lalnghakliana, Synod Moderator
Tawngtaisaktu : Rev. B. Zohmangaiha, Synod Secretary (Jr)
Zaipawl : ITI Veng Pastor Bial Zaipawl
Hla sak ho : ‘Hla taka khawdur leh ruahpui sur’ KHB NO. 482
Malsawmna : Rev. R. Lalhmingsanga; Secretary, Synod Mission Board
Thlanmual
Hun hmangtu : Rev. Lianhmingthanga Sailo, ITI Veng