Synod Bookroom chuan vawiin (July 3, 2017) atanga July 8, 2017 (Inrinni) thleng awh tur Reduction Sale chu Mizoram puma Synod Bookroom Branch zawng zawng leh Churachanpura Synod Bookroomah te a tan leh ta.
Tun tum Reduction Sale-ah hian Synod Bookroom-a lehkhabu zawng zawng, Bible, Kristian Hlabu, Communion thil, Kohhran mamawh chi hrang hrang, Stationery Item zawng zawng leh School Naupang mamawhte 5% - 80% discount-in hralh chhuah a ni a. A tantirh ni atangin mipuiin an hlut hle. Synod Bookroom Reduction Sale hi a rualin Mizoram pumah zing dar 9 khan tan a ni a. Lawngtlaiah chuan Lawngtlai Bialtu Pastor leh Lawngtlai Bookroom Chairman, Rev. R. Lalfakawma’n Pathian hnena hlanin Sale hi a hawngin Sale hi tan nghal a ni a. Lungleiah chuan Lunglei Bookroom Vice Chairman; Pastor C. Lalduhawma’n Pathian hnena hlanin Sale hi a hawng bawk a. Champhaiah chuan Champhai Bookroom Chairman Pastor Lalnunmawia Pachuau-in Pathian hnena hlanin Sale hi a hawng bawk a. Serchhipah Rev. C. Lalrintluanga, Vice Chairman, Serchhip Bookroom Commtt leh Serchhip Vengchung Bialtuin sale hi tawngtainain a hawngin, Kolasib ah Rev. R. Lalhmingsanga, Chairman, Kolasib Bookroom Commtt leh Diakkawn Bialtuin Pathian hnena hlanin Sale hi a hawng a, Churachanpur-ah chuan Rev. Jerry Zoliansanga, Secretary, Churachanpur Bookroom Commtt chuan tawngtainain a hawng bawk.
Synod Bookroom Reduction Sale hi mipuiin lehkhabu tha leina hun remchangah hmangin an hlut hle thin a. Sorkar Office leh Kohhran leh Mimal Library neite pawhin a hlawma lehkhabu leina hunah an lo hmang tawh thin a. Hetiang huna lehkhabu an hralh chhuah thin hi a buatsaihtu, Synod Bookroom lama hotute beisei leh rin ai pawhin a tam thin nia thu dawn a ni.
Tun tum Reduction Sale-ah hian tihtlawm zual bik an nei a. chungte chu:- 1. Mizo Kristian Hla Thar Bu Rs. 100, 90 leh 80 man kha Rs. 30/- 2. Kristian Hlabu lian Hla hruaitu hman chi Rs. 400 kha Rs. 200/- 3. KTP T-Shirt Rs. 280 man kha Rs. 50/- 4. Hei bakah hian lehkhabu hlui tha tak tak Rs 1 man atanga Rs. 1000 chuang man tlawm taka lei tur a awm. Nikum 2016 Reduction Sale-a kar khat chhunga lei chhuah kha Rs. 72,26,974.00/- lai a tling a. Kumin hian kum hmasa lama sale zatte hi khum ngei an inbeisei thu Synod Bookroom lama hotute chuan an sawi.
Tun dinhmunah Synod Bookroom hian Branch 13 neiin Distribution Centre 32 a enkawl mek a. Lehkhabu item hi 5500 chuang zet an nei tawh a ni.