Vawiin (July 5, 2017) chawhnu dar 1:00 khan Women Centre, Phunchawng-a puan thui Third Batch leh Puan Tah First Batch te inlawmna hun hman a ni.
Zirlai tharte lawmna inkhawm hi Central Kohhran Hmeichhe Chairman Pi K. Lalliantluangin a kaihruai a, Central Kohhran Hmeichhe Secretary Pi H. Lalpianthangin report a pe a. Nl. R. Lalrinpuii, Centre Superintendent hnen atangin Hostel Rules ngaihthlak leh a ni a, Kohhran Hmeichhe changtu Executive Secretary Rev. P.C. Pachhunga hnen atangin lawmluhna leh fuihna thuchah ngaihthlak a ni. A duh apiang tan thusawina hun hawn a ni bawk. Puan thui leh puan tah hi thla ruk chhung zir tur a ni a, tun tumah hian puan thui zir tur mi 40 leh puan tah zir tur mi 10 an awm a ni.
Women Centre hi Mizoram Presbyterian Kohhran Hmeichhe din champha kum 100 tlinna (1904-2004) Centenary Project atan kum 2001 Synod Inkhawmpui-in a phalsak a ni a, August 12, 2015 khan hawn a ni. He Centre hi thlarau lama intuaitharna (retreat) neihna leh a huhova Pathian pawlna hmun atan te, mi harsate chhawm chhuah nan leh an dinhmun siamna atana thiam thil zirna leh an thlarau nun kaihhruaina hmun tur atan ruahman a ni.