1913 HARHNA

 

            Harhna tum 2 – na hi Champhai, Butpawla Vengah a in tan. Kohhran an chauh em avangin Khawmpui an kova, March 8, 1913 an rorel zawh-ah Harhna hi a lo thleng ta a ni. March 9, 1913 (Inrinni) zanah an inkhawm laiin ruah a sur emaw tih turin ri huau an hria a, pawn an chhuah chuan engmah a lo ni silo. “Thlarauvin a duh angin thawk rawh se” tiin an nghak ta ringawt a ni.

 

            March 10, 1913 (Pathianni) chawhma inkhawmah “Thlarau i nghak ang u” tiin an nghak leh ta a. Darkar khat hnuah an awmna a lum huam huam a, an hmai te pawh a lum huam mai a, Harhna a thleng ta. An hlim em em a, an dawng seng lo a ni ber mai. Hlasak leh tawngtai ringawtin nilengin hun an hmang.

 

            March 10, 1913 – ah Pathian thu – Isua tuarna thu hriat chakna an nei.

            March 11, 1913 – ah Thaw ipikna, Zamna, thatho lohna, chauhna in a thawk.

March 12,1913 – ah Lal Isua kalsana inhriatna Khawharna, Zai peih lohna, Chaw ei thei lo khawp a Isua ngaihna in a thawk.

March 13,1913 – Ngaihdamna an chan zia, Isua thisena sual tlenfai an nih inhriatna – Lawmna leh sual puannain a thawk.

March 14, 1913 – Kross tuarna an hmufiah, Tuarpuina nunah an lut. He Harhna hian kum 3 a awh a, Mizoram bak Tiau ral leh Zampui tlangdung pawh a thleng.

 

A rah:  Hlasak an tui, Lam in a thawk. Kross hlutna an hre thar, Lal Isua lokal lehna hnai-a an hriat avangin an nun an fimkhur.

 

            Kristian pun dan:

                        Kum 1913 – 4882

                        Kum 1914 – 6134

                        Kum 1915 – 7886

 

 

1919 – HARHNA

 

            He Harhna hi Zotlang (Lunglei), Thingsai, Nisapui khuaahte July 26, 1919 ah Ze inang, thawhdan inang, thu ken inang in a thleng rual a ni.

 

Nisapui:           Harhna dilin thahnemngai takin an tawngtai thin. Veng hrang hrangah an inkhawm thin. Pathian thuhrila zin peih apiangte in lam hna tul an thawh sak thin. July 26, 1919 ( Inrinni) zan inkhawm banah nula pathum an tawngtai in hla an sa hova, Krista tawrhna hre thar in an tap vak vak a, an tlaivar zak a ni. Pathian ni Zan inkhawmah Harhna chu nasa takin a lo thleng ta a ni.

 

A thuken leh thawh dan:           Lal Isua tuarna an sawi uar ber a, An hla tuipui pawh, ‘Thisen hlu, thisen hlu’ tih a ni. Lal Isua tuarna tawmpuiin Isua khenbeh entirna te an chang a, Thi tur thawk in an thaw huam huam a, thlan thisen a far pawh an awm hial awm e.

 

 

1930 HARHNA

 

            He Harhna hi thenkhat chuan kum 1935 ah thlengin an sawi a, thenkhat chuan 1930 – ah thlengin an sawi thung. A thlen tan tirhna hi Khawchhak lam (Biate ?) nia sawi a ni. Pastor Chhuahkhama chuan ‘Khurh Harhna’ tiin a sawi. He Harhna hian Kristian tlu leh Kristian ni tha duh lo te-ah a thawk ber. He Harhna thawh dan hi a muang chang deuh a, a daih rei hle bawk.

 

A thuken:         Thlarau Thianghlim hnathawh a ni.

 

A rah chhuah:  He Harhna hian rah chi hrang hrang a chhuah. Lam paha, ‘Si, Si, Si’ tih te, lam te chuan hla an sa meuh lo. Kum 1935 velah Tawnghriatloh a lo chhuak, a uar deuh phei chuan an in zirtir hial awm e.

 

Thlarau lam zenawi:      Thlarau sem, mi lu chunga kut nghata tawngtai, inlarna hmuh leh aw hriat, Thlarau lam nat, nausenna, lam tluk leh inkaihthawh etc,. a chhuak. Lam duh lo chu Thlarau duh lo ang hiala inpuhna-te a hring a ni. Mahse he Harhna hian ring thar a hring chhuak tam hle. Kum 1932 chhung ringawt pawhin mi 4387 an awm a ni.

 

            Mizoram Harhna thlen chanchin kan sawi kim seng loving. Kum 1960 vel lai a pianthar harhna thleng kha tam takin kan hriatphak a rinawm a, Kohhranhoah rah tha tam tak a chhuah laiin thenkhatin an hrethiam chiah lo deuh va, mahse hun kal zel in Ringtu nunah nghehna a siamin tunah phei chuan Kohhranho in zirtirna pui ber a lo ni ta a ni. Kum 1984 ah Harhna Mizoram-ah thlengin a hnu kum ah El-Bethel harhna kan chang leh a. He Harhna hian mi tam tak nun a khawihin a ti danglam nasa hle. Mi lian leh mite a fun kim hle a ni.

 

            Mizorama Harhna thleng tawhte han chhui let hian Pathianin a hun takah, Ram leh hnam, Kohhranin kan mamawh hun takah a thlentir thin a ni.

 

            Kum 1906 – ah Kristian tlemte kan awm lai leh khawhar taka kan awm laiin Harhna a rawn thlentir a, Kristian kan pung nasa hle a ni.

 

            Kum 1913 ah Harhna a rawn thlen hma hian Mizoram-ah Mautam tam, Tampui mitthi a thleng a, mi tam tak mangangin an awm laiin Pathianin Harhna a rawn thlen tir a ni.

 

            Kum 1919 kumtir atangin Mizoram-ah Hripui a leng a, khawtinah lusun mangang tam tak an awm, chutih lai Mizoramin thlamuantu a mamawh lai tak chuan Thlamuantu Thlarau Thianghlim hnathawh ropui tak a lo thleng leh ta.

 

            Kum 1930 harhna thlen hun lai pawh hi Thing tam tam an tuar lai a ni. Mipui mangang taka an awm laiin Pathian Thlarau Thianghlim chuan a rawn fang leh a, Harhna hnathawh avangin an tuar nem leh thei a ni.

               

            Kum 1964 velah Pianthar Harhna in par a chhuang hman a, Pathian hnathawh ropui tak chu Rambuai 1966 lo thlen hmain Thalai rual zingah thleng lose, rambuai pawh kha kan tuar nasa lovang tih a sawi theih loh a ni.

 

            Tunah hian kan ram chuan Harsatna nasa tak, Thalai tam takte suattu Drugs & AIDS in min chenchilh a. Tin, Eirukna leh hlemhletna khawvelah kan cheng mek a ni. Thuthlung Hlui hunah pawh Pathian thinurna an tawng buakna awlsam ber te an ni. Chuvangin tunah hian kan ram hian Harhna hi kan mamawh tak zet zet a ni.

 

            Pathian-in Harhna Centenary min hruai thleng a, he hunah hian Harhna min pe phal ngei ang, he hun tha hi kan ram hian a bawhpelh hlauh chuan a pawi tak zet ang.