Kristian Thalai Pawl
January 20, 2026 (Thawhlehni) khan KTP General Conference, vawi 61-na atana inbuatsaihna kal mek leh video coverage dan tur en puiin Central KTP committee eng emaw zat leh Synfo-a thawktute an kal a, Organizing Committee-ten lo dawng sawngin, hmalak tawhna te, hmalak zel dan tur te leh inhmakhua lawk dan tur te an thlirho a ni.
KTP General Conference pual hian mobile apps siam a ni a, Apps chhungah hian Conference thu thar, programme kimchang, mikhual thlenna counter kimchang, lirthei chet dan tur traffic inkaihhruaina, thil bo leh chhar report-na, lehkha pawimawh inpek leh lamna turte bakah, committee peng hrang hrang thu pawimawh te leh Conference thlengtu Saitual khua leh Kohhran chanchin te tarlan a ni. Mobile apps hi January 17, 2026 (Inrinni) khan tlangzarh a ni a, playstore/apps store atanga download mai theih tura duan a ni.
January 23-25, 2026 chhung khan Bial KTP Conference, Bial hrang hrangah hman a ni a, Central KTP hruaitute pawh Bial hrang hrang 10 - Tlabung Chawnpui Bial, Zawlpui Bial, Chawngte ‘P’ Bial, Saitual Bial, Saitual Chhim Veng Bial, Lunglei Venglai Bial, Sumsuih Bial, Zaite Bial, Kanhmun Bial leh Lawngtlai Chanmari Bialah te KTP Conference hmanpuiin an kal.
Campus Ministry
January 23 - 26, 2026 chhung khan Union of Evangelical Students of India (UESI), Mizoram te chuan Discipleship Training Camp an buatsaih a. Mizoram chhunga College hrang hrang atangin zirlai 130 vel an lut a ni.
He hunah hian Doctrinal Class, Synod Campus Ministry atangin Tv. Lalrinchhana, Counselor leh T.Upa Eric Lalhmuthara, Bethlehem Veng ten Paper pawimawh tak, Doctrine of the Holy Spirit in Believers (English) tih leh Doctrine of the Holy Scripture (Mizo) tih hmangin zirtirna hun an hmang a ni.
Mizoram Christian College (MCC)
January 27, 2026 (Thawhlehni) khan Khadi and Village Industries Commission (KVIC) te sponsor-na hnuaiah Mizoram Christian College, Career Guidance and Counselling Cell-te chuan zirlaite tan Debate leh Essay Writing Competition an huaihawt a, hun hlawkthlak tak hman a ni. Essay Writing Competition-ah hian zirlai 8 an tel a, Debate-ah hian zirlai 4 an tel thung. He Programme-ah hian MCC-a Department pathum - Sociology Commerce leh Management zirlaite an tel a ni.
January 27, 2026 (Thawhlehni) khan Mizoram Christian College leh Peipung EduTech te chuan inremna Momorandum of Understanding (MoU) an ziak a. NEP 2020 hnuaiah hian College-in Skill Enhancement Course a kalpui a ngai a, he inremna ang hian MCC zirlaite chuan Financial Literacy Course an kalpui thei dawn a. He course hian zirlaite chu financial skills lamah nasa taka a puih ngei beisei a ni.
Synod Relief Fund
Tun hnaia harsatna hrang hrang tawkte hnenah hetiang hian Synod Relief Fund pek a ni.
Kharzawl khuaa vanduaina tawk chhungkaw pakhat hnenah Rs.20,000/- leh Rawpui khuaa damlo mi pakhat hnenah Rs.10,000/- pek a ni.