Mizorama Thalai Inkhawmpui lian ber Kristian Thalai Pawl (KTP) General Conference vawi 61-na, Saitual Public Playground, Saitual-a nghah chu nizan (Feb. 26, 2026) atang khan tan a ni ta. Conference hian March 1, 2026 (Pathianni) zan thleng a awh ang.
General Conference thupui tur chu ‘Pathian tana mi hlang’ (sam 119:1-3) niin Speaker chu Rev. P.C. Lalropuia a ni. Nizan (Feb. 26, 2026) khan Palai lawm inkhawm neih a ni a, Rev. B. Zohmangaiha, Synod Secretary-in KTP kumpuan thupui ‘Chhungril takna (Sam 51:6)’ tih chu Pathian hnenah hlanin a tlangzarh a, Rev. John Raldosanga, Synod Moderator hnen atangin Pathian thuchah ngaihthlak a ni.
Vawiin (Feb. 27, 2026) chawhmaah Rawngbawlna Report inkhawm neih a ni a, chawhnuah Variety Programme-in hun hman a ni a, zan Pathian biak inkhawmah Rev. Dr. Rosiamliana Tochhawng, Executive Secretary i/c K|P-in Pathian thuchah a sawi ang.
February 28, 2026 (Inrinni) chawhma dar 10-ah Saitual Kohhran Biak Inah Rorel Inkhawm neih a ni ang a, rorel hlan hian Pandal-ah Variety Programme a awm ang a, Zan inkhawmah Speaker hnen atangin Pathian thuchah ngaihthlak a ni ang. Zan inkhawm banah hian Concert neih chhunzawm a ni ang.
March 1, 2026 (Pathianni) chawhma leh chawhnu inkhawmah Speaker hnen atangin Pathian thuchah ngaihthlak leh a ni ang a, zanah Central KTP Leader kal chhuak tur, Rev. H, Lalawmpuia ‘n Pathian thuchah a sawi ang a, kum 2026 - 2028 chhunga CKTP hruaitu thar hlanna neih a ni bawk ang. Zan inkhawm banah Fakna Inkhawm neih chhunzawm a ni ang.
KTP General Conference video coverage hi Synod Information & Publicity (Synfo) thawktuten an buaipui a, inkhawm programme hi Hruaina Eng TV Channel leh Synod Information Youtube Channel-ah te LIVE a tihchhuah thin a ni.
---------------------------------------------------------------------------------
February 28 (Inrinni) khan Saitual Kohhran Biak Inah Rorel a ni a, kum 2026 -2028 chhunga Central KTP hruaitu tur hetiang hian ruat a ni:
Leader : Rev. Dr. K.M. Vanlalpeka (Synod ruat)
Asst. Leader : Pu Nicholas Lalbiakzuala, Tuikual Bial
Gen. Secretary : Upa Lalzarmawia (Synod ruat)
Asst. Secretary : Pu Lalruatpuia, Kulikawn Bial
Treasurer : Upa Lalbiakfela, Zemabawk North Bial
Fin. Secretary : Pu Lalduhawma Chhangte, Khatla Bial
Anni bakah hian Committee Member 29 an awm a ni. Central KTP hruaitute hi Synod Executive Committee (SEC)-in a rel angin Aizawl khawpui chhung bial 34 atangin ruat an ni.
Kristian Thalai Editor atan Pu Rochhingpuia, Chanmari Bial leh Synod Choir Director atan Pu Vanlalremliana, Chanmari West Bial te ruat an ni bawk.
Kum 2026-2027 kumpuan thupui atan ‘Chhungril takna’ thlan a ni a. Kum 2026 chhunga thupui zir ho atan ‘Pathianni serh chungchang inzirtir ni rawh se’ tih chu pawm a ni. Kum 2028 KTP General Conference chu Champhaiah nghah a ni ang a, Ruantlang bial, Champhai Bethel bial leh Champhai Zotlang bialin an thleng ang. Kum 2030 KTP General Conference chu Zawlnuamah nghah a ni ang a, Zawlnuam Bial leh Bawrai Bialin an thleng ang.
................................................................
Kum 2025 Bial KTP Report Khaikhawmna
4. Branch awm zat - 917 (Ramchhung - 865, Rampawn - 52)
5. Member awm zat - 1,81,131 (Mipa – 1,09,456; Hmeichhia – 71,675)
8. Member thi zat 569 (Mipa – 502; Hmeichhia – 67)
9. Member thi awm lohna bial awm zat - 50
14. Bial hminga missionary chawm zat - 581
15. Branch-in missionary a chawm zat - 5387
16. Bial leh Branch Missionary chawm zat belhkhawm - 5968
18. Ram puma Thawhtan zan inkhawm chawhrual - 41,058.15 (22.66%)