Vawiin (March 15, 2026) hi Mizorama Chanchin Tha thlen Ni champha a ni a, Kohhran hrang hrangah special programme-a hman a ni ang.
Kum 2012 Synod Inkhawmpui chuan Rev. William Williams-a'n Mizoram a lo luh ni, March 15, 1891 chu Mizorama Chanchin Tha Thlen Ni atan a pawm a. Kum 2014 atang khan March 15 chu Mizorama Chanchin Tha thlen ni atan hman a ni ta a. Kumin hi Chanchin Tha thlen atanga kum 135-na a ni. Kuminah hian Chanchin Tha thlen ni hi Pathianni a nih avangin programme tum hnih - chawhnu leh zan atan siam a ni.
Mizorama Chanchin Tha thlen ni atana kan hman March 15 hi Mizorama Chanchin Tha rawn puang hmasa bertu Rev. William Williams-an Mizoram a rawn thlen ni champha a ni a. Rev. William Williams-a hi Khasi rama Welsh missionary a ni a, Mizote chanchin a hriatin Mizote zinga Chanchin Tha hril a duh hle a, Mizote zingah missionary ni tura a lo kal thei lo chungin Mizoram tlawh hram a tum a, Silchar DC remruatpuinain sipai ho ruala lo kalin Mizoram a rawn lut a, a hmasa ber atan Mizote zingah Krista Chanchin Tha a rawn puang ta a. Chuvang chuan Rev. William Williams-an Mizoram a rawn thlen ni hi Mizoram Presbyterian Kohhran chuan Mizorama Chanchin Tha thlen ni atan a hmang ta a ni.