March 29, 2026 (Pathianni) zan dar 7 khan College Veng Kohhran Biak Inah Synod Mission Board hnuaia thawk tur Missionary 20 (mipa 5 leh hmeichhia 15) tirh chhuah inkhawm neih a ni.
Tirh chhuah inkhawm hi Rev. R. Lalhmingsanga, Secretary, Synod Mission Board-in a kaihruai a, Pu Albert Lalhmangaiha, Coordinator, Synod Mission Board-in Missionary tirh chhuahte inhmelhriattirna a nei a, Rev. Dr. Rosiamliana Tochhawng, Executive Secretary i/c Mission-in tirh chhuahna hun hmangin thuchah a sawi a, tirh chhuahte aiawhin Laltanpuia Zadeng-in thu tawi a sawi bawk. Upa F. Lalremthanga, BEC Member-in tawngtaisakna hun a hmang. He hunah hian Synod Mission Choir leh Republic Veng Bial Zaipawl te an zai bawk. Kum 2026-a Missionary pension-a chhuak mi 18 hnenah Citation hlan a ni.
Tirh chhuahte hi hetiang hian an hna tur ruat a ni :
Evangelist Teacher - 7
Evangelist - 8
Evangelist cum Health Worker - 1
Evangelist cum Music Instructor - 1
Craft Teacher - 3
Region wise-a an kal dan tur hetiang hi a ni :
Home Mission-ah : 10
North East-ah : 4
Central-ah : 6
Tirh chhuahte hian March 3-25, 2026 chhûng khan Synod Multipurpose Training Centre (SMTC), Mission Vengthlangah Residential Missionary Pre-Service Orientation Training an nei a, Orientation training-ah hian an awmna tur chanchin te, rawngbawl dan tur kal hmang te leh thil pawimawh hrang hrang te an zir a ni. Tirh chhuah te hian April 9, 2026 aia tlai lovah an awmna tur theuh thleng hman tura beisei an ni.