Synod Multipurpose Training Centre (SMTC) buatsaih Lay Leaders’ Training vawi 236-na chu April 13-17, 2026 chhung hian neih a ni.
April 13, 2026 (Thawhtanni) zan khan training hawnna inkhawm neih a ni a, he hun hi Rev. H. Lalmuanchhana, Director-in a kaihruai a, inlawmna leh report te ngaihthlak a nih hnuah Rev. John Raldosanga, Synod Moderator-in training hawngin thuchah a sawi a, Nl. Noel Vanlalruatpuii, Tlangnuam a zai bawk.
Tun tum training-ah hian Presbytery 10 – Tuichangral South, Aizawl Hmarchhak, Lunglei West, Dampa, Tuivai, Ramlai, Chhimchhak, Kolasib, Teirei leh Chhimphei atangin Kohhran Upa 49 an tel a ni.
Kohhran Upate tana Lay Leaders’ Training hi kum 1996 atang khan neih tan a ni a, training-ah hian Kohhran Upate tan Kohhran enkawl dan leh inrelbawlna lam atana pawimawh chi hrang hrang bakah Kohhran thlarau lam nun enkawl dan te zir thin a ni.
Training hi April 17, 2026 (Zirtawpni) zanah kharna hun hman a ni ang.
Synod Multipurpose Training Centre (SMTC) hi January 12, 1996 khan din a ni a, a tira a hming chu Christian Multipurpose Training Centre tih a ni a, kum 2001 Synod Inkhawmpui chuan Synod Multipurpose Training Centre (SMTC) tiin a thlak leh a ni. SMTC hnuaiah hian training chi hrang hrang (Vocational Training) buatsaih thin a ni bawk a, tunah hian trade chi hrang panga - Tailoring (Mipa leh Hmeichhia), Computer, Mobile repairing, Beauty Culture leh Electrical te kalpui mek a ni a, zir chhuak tawh mi 2208 awmin tunah hian zirlai 107 an awm mek a ni.
