April 23, 2026 (Ningani) khan Presbyterian Bible School (PBS) chuan Batch 63-na pualin Farewell and Dedication Programme, Tuikhuahtlang Kohhran Hall-ah an hmang.
Programme hi Rev. C. Lalduhawma, Principal-in a kaihruai a, Rev. Vanlalchhunga, PBS zirtirtuin report a pe a, Rev. Dr. Rosiamliana Tochhawng, Executive Secretary i/c PBS-in zir chhuakte hnenah Certificate hlanin thuchah a sawi a, exam-a ti thate hnenah Upa C. Lalduhawma, Synod Secretary (Jr)-in lawmman a hlan a, class kai kim te hnenah Rev. Lalsangmuana, Synod Statistician-in lawmman a hlan a, Pu C. Awithanga Award chu Pi Laltanpuiin a hlan a ni.
PBS-ah hian a din tirh atangin tun thleng hian zirlai 2916 an awm tawh a, chung zinga 2450 chuan tha takin an pass tawh a. Tuna batch 63-naah hian zirlai 27 an awm a, zirlai 26 an pass a ni.
Exam-a ti tha zual pathumte hnenah lawmman Rs.1000/-, Rs.700/-, Rs.500/- leh lawmpuina thuziak PBS Committee hminga hlan a ni a, chungte chu:-
1-na - Romel Ramropuia s/o Zomuansanga, Zawlnuam Kohhran
2-na - Vanhmingsanga s/o Lalmuanpuia Sailo, Champhai Venglai Kohhran
3-na - H.T. Roluti d/o Chinhleia (L), Salem Veng Kohhran te an ni.
Batch 62-na zirlai zingah hian class kai kim mi 6 hnenah lawmman Rs. 500/- theuh hlan a ni.
Kum 2014 atangin Christian Theology subject leh Kohhran Inrelbawlna & PCI Danpui subject-a a ti tha ber te hnenah Pu C. Awithanga Award hlan thin a ni a. Batch 63-naah hian Kristian Theology subject-ah H.T. Roluti’n a dawng a, Kohhran Inrelbawlna & PCI Danpui subject-ah Romel Ramropuia, H.T. Roluti leh Zonunsanga ten an dawng a, award hian Rs. 2,000/- a keng tel a ni.