April 23, 2026 (Ningani) khan Missionary Training College (MTC) chuan Bachelor of Missiology (B. Miss.) zir zo mi 14 te thlahna hun (Graduation Service) vawi 14-na chu Golden Jubilee Hall, Mission Vengthlang Kohhranah an hmang.
Programme hi chawhnu dar 2-ah tan a ni a, Rev. Lalfakzuala, Principal MTC-in inlawmna leh inhmelhriattirna hun a hmang a. Rev. Vanlalsawma, Registrar MTC-in zirlai chhuak turte inhmelhriattirna hun a hmang a. Synod Moderator, Rev. John Raldosanga’n College Annual Magazine a tlangzarh bakah Graduation Day thuchah a sawi. Rev. V.L. Luaia Hranleh, Senior Executive Secretary-in zirchhuakte hnenah Certificate a hlan a, Rev. Dr. Rosiamliana Tochhawng, Executive Secretary i/c Mission-in zirlaite hnenah lawmman chi hrang hrang a sem a, Rev. B. Zohmangaiha, Synod Secretary-in zirlaite intiamkamna hun a hman pui a. Synod Mission Choir te tum hnih an zai bawk. Rev. R. Lalhmingsanga, Secretary Synod Mission Board chuan zir chhuakte tawngtaisakna hun a hmang a, Rev. Dr. K. Lalrinkima, ATC Principal-in malsawmnain programme a khar a ni.
Zirlai ti tha lawmman (College Awards 2026) hetiang hian hlan an ni:
i) R. Dala award for biblical studies - Lalmuanpuia
ii) Rohmingthangi Award for Theological Studies - Lalmuanpuia
iii) Tirhkoh Chhingtei Award for Mission and Historical Studies - Lalmuanpuia
iv) M.Suaka Award for Religious and Cultural Studies - Lalmuanpuia
v) Tirhkoh Thangzawna Award for Christian Studies - Lalmuanpuia
vi) Rev. Dr. Lalsawma award for languages studies - Lalmuanpuia
vii) Upa Thangkima Ralte Award for Field Work and Project - Lalmuanpuia
viii) Lalbiakchhungi Award for Academic Excellence - Lalmuanpuia
ix) Robuanga Award for Best Outgoing Student - Lalfakawma
Missionary Training College hi kum 1978 khan Missionary Training Department tiin Aizawl Theological College-ah bul tan a ni a. Kum 1996 atang khan Aizawl Theological College (ATC), Durtlanga sawn chhoh a nih hnuin Synod Multipurpose Training Centre (SMTC) nen a kal kawp leh a, chumi hnuah chuan Synod Multipurpose Training Centre (SMTC) atangin lak hran niin Missionary Training Centre tih a lo ni ta a. Kum 2007 Synod chuan College-a hlan kai a remti a, Synod thurel angin June 4, 2010 khan Missionary Training College (MTC) chu a lo piang ta a, Senate of Serampore College hnuaiah chuan B. Miss zirna hmasa ber a ni. MTC-ah hian B. Miss zirna bakah missionary training chi hrang hrang neihpui thin a ni bawk.
For more Pics Click Here