Vawiin (May 22, 2026) chawhnu dar 1:30 khan Presbyterian English School (PES) hnuaia HSLC 2026 result tha lawmna chu J.M. Lloyd Hall, Synod Office-ah neih a ni.
Programme hi Pu K. Lallianzuala, Secretary, Synod Education Board-in a kaihruai a, Upa P.C. Vanlalhruaia, Supervisor of Schools-in inhmelhriattirna leh report a pe a. Rev. John Raldosanga, Synod Moderator-in thu sawiin mimal ti thate hnenah lawmman a sem a, Rev. Dr. Rosiamliana Tochhawng, Executive Secretary i/c Education-in thu sawiin School ti thate hnenah lawmman a sem bawk. Rev. Malsawmdawngliana, Synod Education Board Member-in lawmthu a sawi a, he hunah hian Nl. J. Lalruatsangi a zai bawk.
Zirlai ti thate chawimawina hunah hian Distinction-a pass mi 93-te hnenah lawmpuina Rs.10,000/- theuh pek an ni a. PES zirlai zinga HSLC result-a Top 3 te tan Special Award siam a ni a, lawmman hian Cash Award leh Citation a keng tel a ni. Lawmman dawngtute chu :
1. Joici Lalnunkimi, Zemabawk North PES
2. Lalnunhlui Ralte, Zemabawk North PES
3. Maria VL Hriatkimi, Thenzawl PES
PES atang hian HSLC 100% pass School 19 an awm a, chung zinga a titha School pathum te hnenah lawmman – Computer Set, Citation leh Cash Award pek an ni a, chungte chu –
1. Zemabawk North PES
2. Republic Veng PES
3. RamtharVeng, Aizawl PES, te an ni.
Heng bakah hian pass kim vek School dang sawmparuk hnenah Rs.10,000/- theuh pek an ni bawk.
Tun dinhmunah Presbyterian English School (PES) zingah pawl 10 nei chin school 40 an awm mek a, chung zingah chuan school 19-ah fail awm lovin zirlaite an pass vek a ni. PES zirlai HSLC exam zawng zawng hi 885 an ni a, chung zinga zirlai 832-in an pass a. PES pass percentage hi 94.01 % a ni.
For more Pics Click Here