June 2-4, 2026 chhung hian Synod Executive Committee (SEC) vawi 319-na chu J.M. Lloyd Hall, Synod Office-ah neih mek a ni.
Thut khawm hi Rev. John Raldosanga, Synod Moderator-in a kaihruai a, Rev. B. Zohmangaiha, Synod Secretary-in report a pe a, Rev. Dr. K. Lallawmzuala, Finance Officer-in report a pe bawk.
Secretary report-ah hian Pastor zir lehte leh zirna hmuna awmte induction/installation tluang taka neih a nih thu te, PCI 46th Biennial General Assembly tluang taka neih a nih thu te, Jordan Centre, Sethawn tlawh a nih thu te, Synod Office leh Synod Office Annex buildinga lei (steel bridge) siam tur chungchang te, Synod Trust hnuaia building hrang hrang sak mek report te, Synod Hospital panna kawng siam chungchang te, MUHCS hman mek chungchang te, Central Region Missionary Retreat neih a nih thu te, Womens Ordination chungchanga Consultation neih a nih thu te, Synod hnuaia zirna school hrang hrang report te, RC leh RL pek chhuah dan te leh April 2025-March 2026 inkara Synod sum dinhmun te tarlan a ni.
Tun tumah hian thurel tura chhawp chhuah 60 a awm a, chung zingah chuan Kristian Thalai chanchinbu agent kum 10 tangte chawimawina pek chungchang leh chawimawina hming atan mimal hming hman chungchang te, Kolasib-a Counselling Centre hmun tur lei rawtna te, India rama sakhaw zalenna a awm theih nana hmalak chungchang te, Sipai Pastor-a lut an awm theih nana buaipuitu siam chungchang te, SMTC tihchangtlun dan tur chungchang te, Presbyterian Bible School inkaihhruaina dan enthat chungchang te, Jordan Centre, Sethawn kalpui zel dan tur ruahmanna te leh Synod Press kalpui zel dan tur ruahmanna te a tel a ni.
For more Pics Click Here