Vawiin (June 17, 2026) khan Synod Ramthar Board meeting vawi 189-na chu J.M. Lloyd Hall, Synod Office-ah an thu a, Aizawl khawpui chhung atangin member 27 leh Aizawl khawpui pawn atangin member 54, an vaiin member 81 an kal.
Meeting hi Synod Moderator, Rev. John Raldosanga’n a kaihruai a, Rev. R. Lalhmingsanga, Board Secretary-in report a pe a, report-ah hian Masihi Sangati Evangelist 8 leh Contract Missionary mi 20 tirhchhuah thu te, Presbyterian Hindi Bible School, Bawngkawn-a 76th Batch zirchhuak mi 14 te pualin Khatla Kohhran Hall-ah Graduation Day hman a nih thu te, Beauty Culture as a Mission thupui kalpui zelnaah Training Centre atan Lash Studio, Chanmari, Aizawl nen kum 3 chhung atan inremna thuthlung siam a nih thu te, Lucknow Mission Field-a thawktu 2, Anti-Conversion Law hmanga thubuai an siamsak te chu an zalen tawh thu te, Ramthar Board 187:9 of 23&24.10.2025-in Children Education Allowance ruahmanna thar a duan chu April 2026 atanga hman tura rel leh circular tihchhuah a nih thu te, Synod Executive Committee-in a lo rel tawh angin Mawdun, Shillong-ah Kristian Thlanmual atan ram lei a nih thu te, Synod Home Mission School, Zomuantlang chuan Mizoram sawrkar hnen atangin School Permission an hmuh thu te, Karbi Anglong Mission Field chhunga School 7 ten School Permission/Recognition an hmuh thu te, Synod Mission Board-in Professional Ministry a kalpui mekah kum 3 chhung atan Mizoram Football Association (MFA) nen inremna an ziah thu te, MTC hnuaia B.Miss zir zo mi 14 te pualin Graduation Day, Mission Vengthlang Kohhran Golden Jubilee Hall-ah neih a nih thu te, SMB hnuaia School 19 te HSLC result 2025-2026 ah zirlai 94% pass an neih thu te, May 12-22, 2026 chhung khan Field Secretary leh Field Pastor tharte puala Orientation Training, MTC, Mission Venthlangah neih a nih thu te, EFI sawmna angin Asia Conference on Church & Mission 2026 programme, Phillipines-ah June 9-12 chhung khan Rev. Dr. Rosiamliana Tochhawng, Executive Secretary leh Rev. B. Zohmangaiha, Synod Secretary an tel thu leh Cambodia-a SMB hmalakna awm mek (Kohhran hrang hrang hmun khata lawi ho chungchang)-ah Kohhran hruaitute nen inkawmna hun an neih nghal thu te, Contract Missionary mi 341-te June 2026 atangin dah ngheh an nih thu te, Upa Lalfakawma s/o Tlangthangluaia, Mualkhang chuan Masihi Sangati rawngbawlna atan a ram Mualkhang a mi a pek chu April 16, 2026 khan ram inhlanna neih a nih thu te, May 28-31, 2026 chhung khan Central Region Missionary Retreat chu Luangmual Kohhran Biak Inah tluang taka neih a nih thu te tarlan a ni.
Tun tumah hian thu ngaihtuah tur 10 chhawp chhuah a ni a, Presbyterian Hindi Bible School kaihhruaina 2026 chungchang te, SMB hnuaia School Staffing Pattern chungchang te, Presbyterian Hindi Bible School zirlai award chungchang te, Mission Pastor Bial thar chungchang te leh Asia Chhimchhaka Pastor rawngbawl dan tur chungchang te chu a langsar zual te an ni.
For more Pics Click Here