Synod Bookroom chuan vawiin (July 13, 2026) atang khan, kum danga an lo tih thin angin mipui tam zawkin man tlawm zawka bungrua an lei theih nan Reduction Sale an buatsaih leh mek a, July 18, 2026 (Inrinni) thleng a awh ang.
Reduction Sale hi Mizoram puma Synod Bookroom Branch hrang hrang bakah Distribution Centre pahnih leh Churachanpur-a Tuithaphai Branch Synod Bookroom-ah te neih a ni.
Reduction Sale-ah hian Synod Bookroom-a lehkhabu zawng zawng, Bible, Kristian Hlabu, Communion thil, Kohhran mamawh chi hrang hrang, Stationery Item zawng zawng leh School Naupang mamawhte 5% - 80% discount-in hralh chhuah a ni.
Synod Bookroom Reduction Sale hi a rualin Mizoram pumah vawiin (July 13, 2026) zing dar 9:30 khan tan a ni a. Branch hrang hrangah Branch Committee ruahmannain hawnna hun hman a ni. Bookroom Headquarters Mission Vengah chuan Rev. John Raldosanga, Synod Moderator-in Reduction Sale hi Pathian hnenah hlanin Kohhran mipuite’n tangkai taka an hman theih nan a hawng a, Moderator chuan hun rei tak ata tawh lehkhabu tha tak tak, kan finna ti zualtu tur chhawpchhuah thin a ni a. Mi tam takin Synod Bookroom kal tlangin finna an lo neih phah tawh thin. He reduction sale, chawlhkar khat chhung awh tur hi nasa leh zuala chhawr tangkai turin kohhran mipui te a sawm a ni.
Synod Bookroom Reduction Sale hi mipuiin lehkhabu tha leina hun remchangah hmangin an hlut hle thin a. Sorkar Office leh Kohhran leh Mimal Library neite pawhin a hlawma lehkhabu leina hunah an lo hmang tawh thin a ni.
Tun dinhmunah Synod Bookroom hnuaiah hian Branch 16 leh Distribution Centre 2 a awm mek a ni.