Synod Multipurpose Training Centre (SMTC) buatsaih Lay Leaders’ Training vawi 239-na chu July 13, 2026 (Thawhtanni) zan khan tan a ni.
Training hawnna inkhawm hi Rev. H. Lalmuanchhana, Director-in a kaihruai a, inlawmna leh report te ngaihthlak a nih hnuah Rev. R. Lalrinsanga, Director, Masihi Sangati-in training hawngin thuchah a sawi. Rev. R. Lalrinsanga chuan, "Midangte thlarau lama kaihruai tur chuan keimah pawh zirtirtu dinhmuna ka din a ngai a, midangte Lal Isua hnena hruai thleng turin kan inbuatsaih a ngai. Lal Isua Krista khenbeh thu, la hre lo te hnena hril a, a hnena thlarau bo hruai tura a koh chhuah Upate kan ni a, kan ni tin nunah kan nungchang leh kan awm dan kan fimkhur a pawimawh hle a ni", tiin kalkhawmte a fuih a ni.
Tun tum training-ah hian Presbytery 18 – Tuivai, Champhai North, Hmarchhak, Chhimthlang, Aizawl Chhim, Aizawl West I, Aizawl West II, Aizawl East, Tuivawl, Chhimtuipui, Tuirini, Aizawl Chhimthlang, Sakawrhmuituai, Serlui, Bairabi, Dampa, Chhimtawp leh Zoram pawn atangin Kohhran Upa 51 an tel a ni.
Kohhran Upate tana Lay Leaders’ Training hi kum 1996 atang khan neih tan a ni a, training-ah hian Kohhran Upate tan Kohhran enkawl dan leh inrelbawlna lam atana pawimawh chi hrang hrang bakah Kohhran thlarau lam nun enkawl dan te zir thin a ni.
Training hi July 17, 2026 (Zirtawpni) zanah kharna inkhawm neih a ni ang a, Rev. Dr. Rosiamliana Tochhawng, Executive Secretary i/c SMTC-in training chhuakte hnenah Certificate hlanin thuchah a sawi ang.
Synod Multipurpose Training Centre (SMTC) hi January 12, 1996 khan din a ni a, a tira a hming chu Christian Multipurpose Training Centre tih a ni a, kum 2001 Synod Inkhawmpui chuan Synod Multipurpose Training Centre (SMTC) tiin a thlak leh a ni. SMTC hnuaiah hian training chi hrang hrang (Vocational Training) buatsaih thin a ni bawk a, tunah hian trade chi hrang panga – Tailoring (Mipa leh Hmeichhia), Computer, Mobile repairing, Beauty Culture leh Electrical te kalpui mek a ni a, zir chhuak tawh mi 2208 awmin, tunah hian zirlai 107 an awm mek a ni.
For more pics Click Here