Mizoram Presbyterian Kohhran leh Baptist Church of Mizoram tangkawpin an buatsaih Kristian Hla Bu thar (19th Edition) chu August 14, 2026 (Zirtawpni) chawhnu dar 1 khan Mission Veng Kohhran Biak Inah Rev. John Raldosanga, Mizoram Synod Moderator-in Pathian hnenah hlan.
Hla Bu thar hlanna inkhawm hi Rev. Dr. K. Lallawmzuala, Executive Secretary, Mizoram Synod-in a kaihruai a, Rev. Dr. Rosiamliana Tochhawng, Executive Secretary, Mizoram Synod-in Hla Bu buatsaih dan report a pe a, Rev. John Raldosanga, Synod Moderator chuan Pathian thu Sam 96 : 1-4 a chhiar a, Kristian Hla Bu thar chu a hmangtu apiangten Pathian aw an hriat a, Pathian ropuina puan chhuahna a nih theih nan Pa leh Fapa leh Thlarau Thianghlim hmingin a hlan a ni. Hun tawpah Rev. Dr. C. Lalhungliana, Executive Secretary, Aizawl Area, BCM-in malsawmnain inkhawm a tin a ni. Hemi hunah hian Mizoram Synod Choir leh Aizawl Area Baptist Choir te an zai bawk.
Kristian Hla bu thar chungchangah hian Synod 2019 Inkhawmpui thurel SEC bawhzuina kal zelah Baptist Kohhran nen ruahmanna siamin Joint committee din a ni a, September 1, 2023-ah committee hmasa ber thut a ni a, hemi hunah hian Hla Bu Ennawntu Sub Committee din a ni a, an ni hian chak takin hma an la nghal a ni.
Kristian Hla Bu tharah hian hla 650 a awm tawh dawn a, hla thar 70 belhin hla awm sa 20 paih a ni thung. Hla bua dah tharte hi Mizo hla hlui, tunlai hla leh thalai lamin an sak uar deuhte a ni ber.
Hla bu thar hi a len zawng (size) chi thum siam a ni a. A man tlawm ber Rs. 250 leh a to ber Rs. 800 a ni ang.
Kristian Hla Bu chhuak hmasa ber chu kum 1898 khan Eureka Press, Calcutta-ah chhut a ni a, hla 18 chauh awmin copy 500 chhut a ni.