August 17-24, 2026 chhung khan Family Guidance & Counselling Centre (FG&CC) buatsaih Church Leaders’ Pastoral Counselling Training vawi 43-na neih a ni.
Training-ah hian Bial Pariat - Mission Veng, Maubawk, Bawngkawn, Himali, Falkland, Zemabawk North, Salem Bial Aizawl leh Kolasib Diakkawn atangin kohhran aiawh mi 27 an tel.
August 17, 2026 (Thawhtanni) zan khan SMTC Hall, Mission Vengthlangah training hawnna neih a ni a. Inkhawm hi Rev. Zothansanga, Resource Person-in a kaihruai a, Rev. Lalthangpuia Fanai, Director-in inlawmna neiin report a pe a, Rev. B. Zohmangaiha, Synod Secretary-in training programme hi hawngin thuchah a sawi a ni.
Training kharna hi August 24, 2026 (Thawhtanni) zan khan SMTC Hall, Mission Vengthlangah neih a ni a, Rev. R. Vanlalnghaka, Resource Person-in a kaihruai a, inlawmna leh lawmthu sawina Rev. Lalthangpuia Fanai, Director-in a nei a, Rev. Dr. K. Lallawmzuala, Executive Secretary-in training chhuakte hnenah Certificate semin thuchah a sawi. Rev. Dr. K. Lallawmzuala chuan Upa te chu an thil zir te hre reng a, mi dang tanpui tura ngaihtuahna seng tam tur te, in chhiar belh zel a, mi dang tlansan zawng ni lova, tanpuitu ni zawk zel turin a chah a ni. Trainee-te hian an hlawkpui dan a lema an ziak chu entirin an hrilhfiah a, trainee-te aiawhin Upa J. Lalzamliana’n thu tawi a sawi bawk. Rev. R. Lalremruata, committee member-in tawngtaisakna hun a hmang a, he hunah hian Luangmual Bial Zaipawl te an zai bawk.
Synod hian Counselling Centre 10 - Mission Veng, Bawngkawn, Vaivakawn, Champhai, Serchhip, Kolasib, Lunglei, Mamit, Khawzawl leh Saitualah te a nei a, heng Counselling Centre pakuaah hian May 28, 2026 thlenga pantu (client) an neih tawh zat chu 75,454 a ni a, kumin 2026 bikah mi 1,767 an nei tawh a ni.
FG&CC hian Pastor leh Kohhran hruaitute puala Counselling Training a buatsaih thin bakah Kohhran mal, Bial huap, Presbytery huap leh District khawpuiah te Kristian Chhungkaw Seminar, Campaign leh Awareness Campaign te a buatsaih thin a ni.