1. Thawktu dinhmun
| (1) Thawktu nghet | : | (a) Doctor | 18 |
| (b) Nursing Staff | 87 | ||
| (c) Thawktu dang | 98 | ||
| A vaiin | 203 | ||
| (2) Thawktu nghet lo | (a) Doctor | 4 | |
| (b) Nursing staff | 30 | ||
| (c) Thawktu dang | 37 | ||
| (d) Covenant year | 27 | ||
| A vaiin | 98 | ||
| Thawktu zawng zawng | 301 |
2. Thawktu nghet lak belh
Thawktu nghet doctor 3 leh Laboratory technician 2 lak belh an ni a, an zinga mi Dr. Lalthlamuana Pachuau chu MD (Medicine) a ni a, Hospital-in kan changtlun phah hle a ni. Dr. R. Lalrindiki erawh chu CBM sponsor-in D.O. (Ophthalmology) zir turin Joseph Eye Hospital, Tiruchirapalli-ah tirh nghal a ni.
3. Retreat
Kum danga kan tih thin ang bawkin March 14-17, 2006 chhungin Hospital-a thawktute pualin retreat neih a ni a, Pastor C. Chanchinmawia, Bawngkawn chu Speaker atan hman a ni a, thawktuten kan hlawkpui hlein kan inhria.
4. Mobile Clinic
Nikum Hospital Sunday leh tun inkar chhungin Pastor bial hrang hrang 42-ah Mobile/Free clinic neih a ni a, damlo 11,235 en an ni. Heti chung hian sawmna tam tak tihhlawhtlin theih loh kan nei a, pawi kan ti hle a ni.
5. Charity Fund
Kum 2005-2006 chhunga Charity Fund atanga sum kan hmuh zawng zawng chu Rs. 19,93,309/- a ni a, damlo 464 hnenah sum hmuh hi hman zawh vek a ni.
6. Hepatitis ‘B’ Vaccination
Nikum Hospital Sunday leh tun inkarah Aizawl veng chhung leh thingtlang khaw hrang hrangah Hepatitis ‘B’ vaccine mi 22,180 hnenah pek a ni.
7. Blood Donation
Nikum Hospital Sunday leh tun inkarah K.|.P. member leh tlawmngai pawl hrang hrangte hnen atangin thisen unit 1,732 kan dawng a, damlo mangangte tana thil thlawnpek hlu tak kan dawng thin hi Pathian malsawmna a ni tih kan hria a, kan lawm em em a ni.
8. THILPEK
Kohhran Hmeichhia, K.|.P. leh pawl hrang hrang hnen atangin thilpek chi hrang hrang kan dawng reng a, damdawi in mamawh hrang hrangte min phuhruksak nasa hle a, hei vang hian damdawi in pawh tluang takin a kal thei a, kan lawm hle a ni.
9. Diabetic Camp
January 12, 2006 khan damdawi inah Diabetic camp neih a ni a, Vellore damdawi in atangin Dr. Jubin Jacob, Deptt. of Endocronology leh Miss Mercy Jesudoss, Diabetic Educator an lo kal a, damlo 58 an en a ni.
10. Plastic Surgery Camp
February 10-27, 2006 chhungin Plastic Surgery Camp vawi 7-na tluang takin neih a ni a, damlo 202 zai an ni.
11. Eye Camp
Nikum Hospital Sunday leh tun inkarah Eye Camp - Aizawl leh thingtlang hmun hrang hrangah vawi 20 neih a ni a, mi 706-te mit zaisak an ni.
12. Zir leh
Tunah doctor 3-in P.G. course an zir leh mek a, P.C. B.Sc. zir 2 leh Diploma course zir 1 kan nei mek bawk a, tha taka an zirlaite an rawn zawh theih ngei kan beisei.
13. Hma inchhawp
1) Wales ram nena thawh ho : Ifan Rh. Roberts, General Secretary, Presbyterian Church of Wales chuan HIV/AIDS dona chungchanga thawh ho dan tur sawi ho turin Dr. Lalremthanga, Director, Presbyterian Hospital a rawn sawm a, sawmna bawhzui hian Dr. Lalremthangan April (2006) thla tawp khan Wales ram a zu tlawh a, HIV/AIDS dona chungchanga thawh ho dan tur leh hmalak zel dan turte an sawi ho va, hei hi a hlawhtlin theih chuan Mizoram tan thil chhenfakawm tak a ni ngei ang.
2) Beng tha lote enkawlna hmun : Christoffel Blindenmission (CBM), Germany nen beng tha lote enkawlna hmun buatsaih tum mek a ni a, hetiang thil hi Mizorama la awm lo a nih avangin tihhlawhtlin theih a nih chuan a tangkai hle dawn a ni.
3) Mother NGO : Mizoram sawrkar hnuaia Health & Family Welfare Department chuan kan damdawi in hi Mother NGO hnathawk turin min rawn thlang a. Hei hian a tum chu Health Department hnathawh tihlawhtling tura thingtlang leh khaw kilkhawr zawk leh kal harsa zawkte hnena hriselna kawng hrang kawhhmuh leh an mamawh phuhruksakte a ni a, he hna hi Aizawl leh Champhai district huam chhunga thawh tur a ni. Huphurhawm hle mah se, rawngbawlna pawimawh tak a nih avangin he scheme hi tihhlawhtlin tum mek a ni.
Aw le, tunah chuan thlarau lam thupui tarlan sa, ‘Taksa leh thlarau damna’ tih hi tlem han sawi zui ila :-
1. Lal Isuan taksa mai ni lovin, thlarau damna pawh a ngai pawimawh
“I sualte ngaihdam a ni tawh” tiin zeng pawh a tidam. Chanchin |ha Marka ziak 2:3-12 kan chhiar chuan mi pali in zeng pakhat an rawn zawn thu leh Lal Isua hnen an hruai thlen dan kan hmu a ni. In chung rek pawpin Isua ke bulah an thlak thla a ni. An rin zia Isuan a lo hmuhin “Ka fapa, i sualte ngaihdam a ni ta e,” a ti a ni.
Helai thu hi kan hmuh chuan zeng hnena sual ngaihdamna han puan daih mai chu mak kan ti mai thei a ni. Isua hun lai Palestina ramah chuan sualna leh natna hi inzawm tlat niin an hria, mi an damloh chuan sual eng emaw tal neiin an ring (Job. 4:7) Rabbi-ho sawi danah chuan damlo tu mah a sualte ngaihdam a nih phawt loh chuan an dam thei lo a ni, an lo ti a ni. Juda-te ngaih dan chuan damlo chungah Pathian a thinur thin niin an ngai a ni. Sual ngaihdamna leh taksa damna hi inzawm tlat niin an hria a ni. Taksa leh thlarau damna ngai pawimawhtu Pathian kan nei hi a vanneihthlak em em a ni.
2. Isua hnenah damna famkim a awm
A pantu apiangte a thlawnin a hawtir ngai lo (Matthaia 15:29-31). Helai changah hian Isua khawngaihna leh ngilneihna nasa taka a lantir dan kan hmu a ni. Taksa pianphunga rualbanlote a tidam. Kebai te, piangsual te, mitdel te, tawngtheilote a ke bulah an rawn hruai a, a lo tidam vek. Isua hian khawvel mihringte taksa damlohna hi a ngai pawimawh em em a ni. Mite hriselna atana tihdamna hnathawktute chuan Isua Krista hna an chhunzawm zel a ni. Chanchin |ha buah hian damlo natna tinreng tuartu Isua hnen rawn pante a lo tidam vek a ni tih kan hmu.
3. Isua rawngbawlna chhunzawmin taksa leh thlarau tihdamsak hi kohhrante mawhphurhna a ni
He mawhphurhna hi tihdam rawngbawl hna (Hospital) hmangin kan thawk mek a ni. Chanchin |hain a ken tel chu tihdamna hi a ni. Kan Lal Isua hun lai atangin Chanchin |ha hril leh tihdam rawngbawlna hi a kal kawp zel a ni.
Kan kohhran damdawi inah hian damloten taksa leh thlarau damna an chan ngei theih nan theih ang tawka rawngbawl hna chhawp chhoh zel a ni a, taksa damna thlen ngei turin doctor leh nurse, thawktu dangten theihtawp an chhuah mek a, thlarau damna an chan ngei theih nan Chaplain pahnihte kaihhruainain rawngbawl mek a ni bawk. He rawngbawlna pahnih kan Lal Isua ngaih pawimawh em em tihlawhtling tur hian kohhran mipuite pawhin mawhphurhna kan nei theuh a ni tih hriain theihtawp chhuah zel turin kan inngen a ni.
Mi tam tak ten taksa leh thlarau damna an lo chan tawhna, kohhranhoten a huhova rawngbawlna kan neih chhun pawimawh em em hi Zoram chhung leh ram pawna awmten malsawmna kan channa hmun a nih ngei theih nan kan damdawi in hi Pathianin malsawm zel rawh se.
| sd/- | sd/- |
| (Dr. LALREMTHANGA) | (REV. CHANCHINMAWIA) |
| Director & Secretary | Moderator & Chairman |
| Presbyterian Hospital Board | Presbyterian Hospital Board |