September 11, 2026 (Zirtawpni) khan Synod Lay Workers Fellowship Annual Meeting (Lay Day) vawi 50-na chu Youth Recreation Centre (YRC), Falkland-ah hman a ni.
Lay Day programme hi hun hniha then a ni a, chawhma lamah ‘Hun urhsun’ hman a ni. Upa Lalduhawma, Chairman, SLWF-in programme a kaihruai a, Secretary leh Treasurer report ngaihthlak a ni. Rev. John Raldosanga, Synod Moderator-in Lay Day Address a sawi a. Lay Day vawi 50-na Zaipawlpui an zai bawk. Kum 2025-2026 chhunga Lay member 2 thite sunna hun hman a ni a, SLWF Chairman-in kum 2026-2028 chhunga SLWF hruaitu tharte Pathian hnenah a hlan a ni.
Kum 2026-2028 chhunga SLWF Puipa turte -
Chairman - Dr. Vanlalchama, Synod Hospital
Vice Chairman - Upa F. Lalfakzuala, Prescom
Secretary - Pu John Lalhruaitluanga, Synod Office
Asst. Secretary - Upa Rodingliana, Synod HSS
Treasurer - Pi Lalbiaksangi Ralte, P.C. Girls
Finance. Secretary - Pu H.L. Chalbuanga, ATC
Chawhnu lamah ‘Hun hlimawm’ hman a ni a, host Nl. Lalremruati Ngente, MCC-in programme a kaihruai a, member pension-a chhuak mi 30 hnenah ngaihhruina thilpek hlan a ni. Lay Day vawi 50-na Souvenir (Lay Photo Directory) tlangzarh a ni a, Nl. H. Lalremruati (Maruati) hnen atangin hla 2 leh Department hrang hrang atangin solo, duet, games bakah thiam thil chi hrang hrang ngaihthlak a ni. Hemi bakah hian thawktuten Lay Day puala Hospital Charity Fund atana an thawhkhawm Rs.1,93,300/- pawh Hospital hotute kutah hlan nghal a ni a, Sports result puanna leh lawmman semna nei zuiin tlaiah zanriah kil ho a ni bawk.
Synod Lay Workers Fellowship (SLWF) hi Synod hnuaia thawktu, Pastor ni lo zawngte intel khawmna a ni a. Lay Day hi kum dangah chuan May thla Zirtawpni hnuhnung berah hman thin a ni a, Synod Executive Committee (SEC) 312-nain a rel angin kumin 2026 atangin September thla Zirtawpni vawi hnihnaah hman a ni ta a ni. Tun dinhmunah Synod Lay Workers’ Fellowship (SLWF)-ah hian member 1023 an awm a, 2025 atangin Lunglei Branch hawn a ni bawk. Kumin Lay Day hi a vawi 50-na a nih avangin SLWF Committee-in an thleng a, Unit hrang hrang atangin mawhphurhna chanvo siam a ni.