Nimin (October 6, 2026) khan Jordan Centre, Sethawn chu Rev. John Raldosanga, Moderator, Mizoram Synod chuan Pathian hnena hlanin a hawng.
Programme hi Rev. Dr. K. Lallawmzuala, Executive Secretary i/c Synod Social Front chuan a kaihruai a, Rev. Lalrinmawia, Director, Jordan Centre chuan report a pe. Rev. John Raldosanga, Moderator chuan tawngtaiin Jordan Centre chu Pathian hnenah a hlan. Moderator chuan Jordan Centre chu a hlawhtlinna tak tak tur chuan taksa lam leh thlarau lam a tan kawp a ngaih thu a sawi a. Chumi tihlawhtling tur chuan theihtawp chuah a nih dawn thu sawiin, he centre enkawl tura Sorkarin Mizoram Synod a ring tawk chu lawmawm a tih thu a sawi bawk. Moderator chuan Mizoram Synod hmalakna sawi zuiin, Synod-in ruihhlo ngai enkawlna hmun pathum a neih tak thu te, Mizoram chhunga Home hrang hrang tanpui nan Synod-in cheng nuai 80 a pek chhuah dawn thute a sawi bawk. Jordan Centre hlawhtlin theih nan tawngtai leh thil peka theihtawp chhuah turin Kohhran hote a sawm bawk a ni.
He huna khuallian Lalrinpuii, Minister i/c Social Welfare, Women & Child Development chuan thu sawiin, Jordan Centre chu thlarau bote hmangaihna nena enkawl ngai a nih angin sorkar aiin Kohhranin enkawl se tha zawka an rin thu a sawi a. Kohhran chuan mi puitling tam tak a chhuah theih zawk dawn thu a sawi. Sorkar chuan Public-Private Partnership (PPP) mode-a hmalakna hlawhtlinzia, YMA leh Kohhran te nena tanghoa Hulhliap Short Stay Centre kalpuinaah an hmu tawh tih sawiin, Jordan Centre-ah hian kan hmu chho zel dawn a ni, a ti. Mi beidawngten beiseina an neihna hmun, nun tleu tawh ten Lal Isua chhandamna an channa hmun a nih theih nan Jordan Centre chu duhsakna a hlan bawk.
Programme-ah hian Thingdawl Pastor Bial Zaipawlten Pathian fakna hla an sa a, Pu Lalchhungliana, Co-ordinator, Synod Social Front-in lawmthu sawiin, Rev. Lalbiakchhunga, Director-in malsawmnain hun a khar a ni.
Jordan Centre hi March 18, 2026 khan Mizoram Sorkar leh Mizoram Synod ten Memorandum of Agreement ziakin, kum 15 chhung atan Mizoram Synod enkawl tura hlan a ni tawh a. Tun dinhmunah Director hoin thawktu ni 28 an awm mek a ni. Jordan Centre, Sethawn-ah hian October 7, 2026 (Nilaini) atangin admission hawn a ni dawn a. October 20, 2026 (Thawhlehni) atangin luh tur a ni dawn a ni.
Jordan Centre, Sethawn hlanna hunah hian Kolasib Presbytery leh Serlui Presbytery huam chhunga Pastor Bial tin aiawh te, MKHC Kolasib hruaitute, Sethawn Kohhran mipuite leh sawm bik mi eng emaw zat an tel a. Social Welfare Department atangin Commissioner & Secretary hoin thawktu eng emaw zatin an telpui bawk a ni.
For more Pics Click Here