Campus Ministry
September 29 - October 1, 2026 chhung khan Centenary School, Dawrpui Church-ah Crusade neiin hun an hmang a. He hunah hian Campus Ministry atangin, Rev. Johny Lalremfela, Director leh Tv. Lalrinchhana, Counsellor te bakah Resource Person-te, Pu C. John Saiparliana, Upa Jimmy LMS Tluanga, Tv. Lalrinmawia leh Tv. Lalrindika ten hun an hmang.
Mizoram Christian College (MCC)
October 1, 2026 (Ningani) khan Mizoram Christian College chuan Synod Campus Ministry thawhpuiin One Day Retreat Mission Vengthlang Kohhran Golden Jubilee Hall-ah hman a ni.
Chawhma hun hi Upa Dr. Tawnenga, Principal, MCC-in a kaihruai a, Dr. Lalhlimpuii, Assistant Professor in hunserh a hmang. Rev. Dr. H. Lalnunmawia, Assistant Professor, ATC-in thu sawiin, Thalaite tan thil dang zawng aia Isua neih hmasak a pawimawhzia a sawi a.
Chawhnu hun hi Lallawmkima, Assistant Professor, MCC-in kaihruaiin, Rev. Johny Lalremfela, Director, Synod Campus Ministry-in thu a sawi a. Pathianin a thilsiam mihringte a ngaih hlutna chu a ropuizia leh Pathian vawn tlat chu mihringte tih tur a nihzia a sawi bawk.
October 5, 2026 (Thawhtanni) kha Mizoram Christian College din champhaphak vawi 6-na a ni a, hemi pual hian Devotion-ah hun hman a ni.
Programme hi Lalmuansanga, Asst. Professor, Department of Sociology-in a kaihruai a. Upa Dr. Tawnenga, Principal, MCC-in thu sawiin; Mizoram Christian College bul tan dan leh lo din chhoh dan chanchin ngaihnawm tak a sawi a. Mizoram Christian College-a zirlaite chu an nungchang uluk tur te, College-ah chauh ni lo chhungkua leh khawtlangah pawh mi entawn tlak ni turin a chah a ni.
Tunah hian Mizoram Christian College-ah hian thawktu 41 leh zirlai 365 an awm mek a ni.
Mission Board
Synod Mission Board leh Mizoram Football Association (MFA) ten April 20, 2026-a MOU an ziah angin Mission Board rawngbawlna hmun hrang hrangah Chanchin Tha hrilna hmanrua atana Football hmanga rawngbawlna kalpui nana SMB hnuaia Missionary te tana ‘AIFF ‘D’ License Coach Training’ chu October 3, 2026 zan khan YRC, Falkland-ah Rev. Dr. Rosiamliana Tochhawng, Executive Secretary i/c Mission-in Pathian hnenah training hlanna a nei a, he hunah hian SMB Office staff te, MFA OB leh Executive Committee member te, Falkland Peniel Kohhran Committee te leh training tur missionary 25 nen mi 52 an kalkhawm a ni.
He AIFF ‘D’ License Coach Training’ hi October 5-9 chhungin Chite field-ah neih a ni a, Mission field hmun hrang hrang atanga thlanchhuah mi 25 ten training an nei a, training an zawh hnuah MPL club hrang hrangah practical an nei leh dawn a ni. (insert pic..mission 1,2,3)
MSSU
October 3, 2026 (Inrinni) khan Sunday School Zirtirtu Training neihpuiin Trainer-te hetiang hian an chhuak:
Hliappui Bialah Upa Lalthanchhunga, Upa Lalsiammawia Pachuau leh Upa Lalliantluanga
Ramhlun Sports Complexah Upa K. Vanlalnghaka, Upa John Lalnunthara leh Upa Lalrinawma Ralte
Social Front
October 3-4, 2026 chhung khan Nisapui Bialah Ruihhlo ngaite pual Awareness Campaign neiin campaigner-te, Upa Lallianmawia, Upa C. Chawngthantluanga, Upa H. Lalnghinglova, Dr. Robert S. Halliday leh Pu Lalremruata te an kal.
October 4, 2026 (Pathianni) khan Chanmari West Bialah Ruihhlo chungchang Awareness Campaign neiin campaigner-te, Rev. Dr. Lalawmpuia Hauhnar, Rev. H. Lalbiakhluna, Rev. Zaithanmawia Pachuau, Upa H. Ngurthansanga leh Upa Dr. J. Lalramchhuanga te an kal.
October 3-4, 2026 chhung khan Bungtlang Bialah Intodelh Seminar neihpuiin Rev. Dr. K. Lalchhuanawma, campaigner a kal.
Chhim Bial
* September 29, 2026 (Thawhlehni) khan chhim lama Home Mission School Vaseikai School Building thar chu hawn a ni. He Building thar hi Rev. H. Lalhmingmawia, Administrative Secretary, Chhim Bial leh Synod Office, Lungleia Staff engemaw zatin an hmanpui a. Hawnna inkhawmah hian Rev. Ramnghinglova Ralte, Damdep Bial vawngtuin a kaihruai a, Pu Lalawmpuia Lungen, Headmaster, Synod Home Mission School, Vaseikai chuan Report a pe a. Rev. H. Lalhmingmawia leh khawtlang hruaituten thusawina hun hmangin zirlai naupangten Special items chi hrang hrang an entir a, tlai lamah Building thar lawmna ruai kil ho a ni.
Vaseikai hi chhim lam, Lawngtlai District huam chhunga Damdep Pastor Bial huamchhunga sumdawnna khua lian leh langsar tak mai a ni a. In 376 awmin mihring 1409 an cheng mek a. Sawrkar Primary School pakhat leh Home Mission School tih bak lo chu zirna in dang a awm lo. Vaseikai Home Mission School hi a tir takah chuan Sponsored School niin ni 17.4.2014 khan din tan a ni a. Kum 2019 khan SMB chuan enkawl zuiin tunah hian KG atanga Class VIII thleng zirna a awm mek a ni. Zirlai naupangte hi Vaseikai khua chauh ni lo, a chhehvel khaw hrang hrang atanga hnam hrang hrang Bru, Rakhain, Meitei, Pang leh Chakma ten an pan khawm mek a. Kuminah hian Missionary (Evangelist Teacher) mi 12, Local Teacher 1, KG Helper 1 leh Chowkider 1-ten an enkawl mek a, zirlai hi mi 220 awmin Kristian 86 leh Kristian ni lo mi 136 an kal mek a ni.
Vaseikai khuaah hian Presbyterian Kohhran hi April 11, 2025 khan din tan chauh a ni a, tunah hian Kohhran chhungkaw hlang awmna 29 awmin inawmpawlhna chhungkua 9 an awm mek a, Dan zawh kim mi 61 awmin Member zawng zawng hi 97 an awm mek a ni.
* October 2, 2026 (Zirtawpni) khan YMA Sub Headquarters, Lunglei huaihawtin “Ruihhlo do” kawng zawh chu Lunglei khawpui chhungah neih a ni a. Chhim leh hmar atangin kawng zawh hi neih a ni a, Chhim lam atangin AOC Square-ah bul tanin Pu K. Vanlalhruaia, Treasurer, YMA Sub Headquarters, Lunglei-in a kaihruai a, Rev. Thanhnuna, Mizoram Presbyterian Church, Lunglei Venglai Bialtu Pastor-in hunserh a hmang a. Hmar lam atanga kawng zawhten Kikawnah bul tanin Pu H. Lalhmingthanga, Asst. Secretary, YMA Sub. Headquarters chu hruaitu a ni a, Rev. K. Vanlalhruaia, District Treasurer, UPC (NEI) chuan hunserh a hmang. Hmun hniha kawng zawhte hi MIZOFED dawr kawtah intawkin hetah hian Pu Zothanzuala Hamte, Vice President, YMA Sub Headquarters hruaitu a ni a, hunserh hi Rev. Vanlalmuankima, AGS, Service, Mizoram Baptis Kohhran chuan a hmang a, Pu K. Lalfakzuala, President, YMA Sub Headquarters, President, MHIP Sub Headquarters te, Chairman, Lunglei Municipal Council ten thu an sawi a. Nl. Vanrammawii leh Zaipawl, YMA Sub Headquarers te an zai bawk.
* Family Guidance & Counselling Centre Committee, Synod Office, Aizawl huaihawtin October 3, 2026 (Inrinni) khan Lunglei Chanmari Kohhran biak inah Lunglei khawpui huam chhung Pastor Bial 4-te, Lunglei Chanmari, Lunglei Venglai, Zobawk Bial leh Lunglei Bazar Veng Bial huam chhunga Kohhran hrang hrangte pualin Chhungkaw Kehchhia Zirhona Seminar buatsaih a ni.
Seminar-ah hian Kohhran aiawh mi 144 an kal thei a, hun hi Session hnihah then a ni a, session khatna hi hruaitu Rev. H. Lalhmingmawia, Administrative Secretary-in a kaihruai a, Rev. Lalthangpuia Fanai, Director, FG & CC-in inlawmna leh inhmelthriattirna a nei a. Keynote Address Rev. Dr. H. Vanlalruata, Committee Member, FG & CC-in a sawi a. Paper hi Upa Lalnunsiama Khalthang, Committee Member chuan Power Point Presentation hmangin ngaihnawm takin a sawi a, chawhnu lamah sawi hona neih a ni.
Synod Relief Fund
Tun hnaia harsatna hrang hrang tawkte hnenah hetiang hian Synod Relief Fund pek a ni.
Airfield Vengthara damlo leh khawsak harsa mi paruk hnenah Rs.60,000/-, Thingsulthliah khuaa in kang chhungkaw pakhat hnenah Rs.20,000/-, N.E. Khawdungsei Venghluna leimin tuar chhungkaw pakhat hnenah Rs.15,000/-, Maubawk Sikul Venga damlo mi pakhat hnenah Rs.10,000/- leh Rengdil Hmunthaa damlo mi pakhat hnenah Rs.10,000/- pek a ni.