C.S.I. PUITHUIR SPECIAL SCHOOL(Vocational Training Centre for Differently abled)
He School hi Suzanne-i leh a thiante din a ni a. Suzanne-i hian fanu, dawn syndrome natna vei a nei a, chutiang fa neive a thiante mi 6 nen kum 1971-ah he School hi bul an tan a ni. A tirah chuan naupang 7 chauh enkawl an ni a, tunah erawh chuan mi 106 lai, kum 4-18 inkar enkawl an ni. Tunah hian thawktu 17 an awm a, an zirlaite hmel leh awmdan thlirin hna namai lo tak an thawk tih a lang chiang hle. A relbawl hna hi C.S.I. Kohhranin thawk mahse, German ram atangin tanpuina an dawng.
An naupangte hi an tih theih tawk a zir zelin training chi hrang hrang an pe a. Kan va tlawh lai pawh hian Bati, Chalk leh Envelope an lo siam mek a, hengte hi an hralh leh thin. He School atanga zir chhuak, a bik takin mipa engemaw zat chuan sawrkar leh mimal hnuaiah thawkin mahni an inchawm a. Hmeichhiate erawh chu dik lo taka sumdawn nan hman an nih leh thin avangin a huhova an awm theih nan in thar sak tum mek a ni.
An rawngbawlna kan hriatpui ve nan Synod hmingin Rs. 1000/- kan pe a, Hmeichhe School tlawh tur kan la nih avangin hmanhmawh takin kan kalsan leh ta a ni. A hma ang bawkin engemaw chen kan bo hnuah kan zawng hmu leh thei hram.
BETHANY CENTRE FOR WOMEN
He Centre hi kawng hrang hranga hmeichhiate zirtir leh kaihhruaina hmun atan kum 185 daih kal tawha din a ni a, thawktu 13-in an enkawl mek. Kan va tlawh hian He Home-a an hotu, Bishop nupui leh thawktu dangten min lo dawngsawng tha hle a, an centre chanchin min hrilh bakah Training nei mekten zaiin min awi. He Centre-in a tih ber chu training chi hrang hrang – Hriselna leh faina chungchang te, Sum leh pai vawn leh khawl dan te, Pre-School teachers’ Training buatsaih te a ni a, kan va tlawh lai hian thingtlang lama thawk Pre-School zirtirtuten ni hnih awh training an lo nei nghe nghe.
Hengte bakah pawh hian Tuition Class te hawngin, thingtlang lama thawktute tan Special healing programme an buatsaih thin a, Bible Women-te tan training buatsaih thin a ni bawk. Tin, he Centre building chungah hian hmeichhia, chhungkaw inrelbawl fuh loh avang leh chhan dang dang avanga awmna haihchhamte chenna (Women shelter) an nei bawk a. tunah hian mi engemaw zat an awm. Heng mite hi Counselling mumal tak pek thin an ni a, Social Welfare Dept. atangin Counsellor an pe a ni. An thiam zawng tur thil chi hrang hrang puanthui leh pangpar siamte zirtir an ni.
He hmunah hian lunch kan ei a, min thleng hneh hle.
FAREWELL FUNCTION
He Farewell function, dar 6:30 p.m.-a tanah hian C.S.I. Kohhran hruaitute an Bishop hovin an lo tel tha hle a. Anni ho bakah hian Rev. Laldawngliana, P.C.I. Administrative Secretary, Miss Elizabeth Joy, CWM secretary bakah Pu P.C. Lallawmsanga te nupa leh Gurukul Theological College-a Mizo zirlaiten min tawiawm bawk a. Anni lo tel ve hian min timawi takzet a ni.
He Farewell function programme pum pui hian Mizoram leh Mizoram Synod an ngaihsanzia a tarlang chiang hle a, programme tan hma darkar khat atangin screen lian takah Mizorama an lokal laia an thlalakte vedeo-in an chhuah a, Mizo music mawi tak nen hetianga an lo buatsaih vek hi a mak zawk hle. Bishop The Rt. Rev. Dr. V. Devasahayam pawhin a thusawinaah Mizorama an lokal a kan lo dawnsawn danah an lawmzia a sawi rualin an hawn thlak hnu hun engemaw chen phei chu a thusawina apiangah Mizoram leh kan Kohhran chanchin a sawi tel ziah thu uar takin a sawi nghe nghe. Thusawi engemaw zat leh C.S.I. Staff Zaipawl zai mawi takte ngaih thlak a ni a, chhimtu aiawhin Pu P.C. Lalawmsanga thusawi tir a ni bawk a. Ani’n a sawi zawh veleh hian Bishop chu lo ding chhuakin kalkhawmte hmaah, ‘Niminah kan theihai huanah tute emawni an kal a, theihaiengemaw zat an ru a, rukrute hi man chhuak thuai turin I.G.P hi kan ngen e’ tih a sawi chuan kan vaiin kan nui a, kan farewell boruak chu a nuam hle.
Keimahni lam atangin mi pahnihin lawmthu sawina leh kan cham chhunga kan thil tlawh leh hriat takte kan review a. Kan phur bawk aniang, chawpchilh taka relin C.S.I. Charity Fund-ah Synod hmingin Rs. 10,000/- kan pe a. Mahse kan pek ve aia nasa zawk daih thilpek chi hrang hrang, cheng tam tak man tur min pe theuh a, kan lawm em em rualin phulo kan intihna chuan min titim deuh bawk a. Kan hotute ngei kalin heng duhsaknate hi dawng zawk se kan ti theuh mai. Tin, he hunah hian Mizoram leh kan Kohhran chungchang thu mawi taka phuah chu chhiar chhuah a ni a, a ngai ngaiin he report tawp lamah hian tarlan a ni. Hun hmangtu apiangin kan duhthawh em em vek mai a, chuvangin kan programme-a tel pakhat, Vedeo show chu mumal tak pawhin kan ti hman ta lo a ni.
Programme kan hman zawh hnuin zanriah tui tak kan kilhova, zan dar 10:00 ah kan haw thei hram. Lawmthu sawi tawngtai hona kan nei a. A tuka haw tawh tur kan nih avangin hmanhmawh takin kan insiam a, kan meng rei tlang hle.
21.3.20079(Nilaini) : Dar 7:30 a.m.-ah breakfast hnuhnung ber kan ei. Kan eikham veleh motor 2-in Rail Station panin kan kal a, Rev. Manuel S. Titus-a leh Dr. J. Samuel Cornelius-a ten Rel Station thleng min kalpui a, kan chhuah dawnah tawngtaiin min thlah. Inngai takin kan inchibai liam liam a, duhsakna inhlan chungin kan in mangtha. A hun tak dar 9:00 a.m.-ah Chennai, ni li lai duat leh duhsakna tinreng kan hlawhna khawpui chu kan chhuah san a, rawngbawl tura Pathianin min dahna hmun kan rawn pan leh ta a ni. Tluang taka kal zelin 22.3.2007(Ningani) 12:30-ah Kolkata kan rawn thleng leh a, Synod Guest House-ah bawk kan awm leh thei a, kan lawm hle.
Kan rawn haw hma ni engemaw zat chu Flight cancel a ni a. Amaherawh chu Pathianin min hruai a, kan tum ni taka kan rawn haw mai piah lamah Group hniha inthena ni hran ve ve hawna tur ticket kan neih chu a ruala haw theih tur tihfelsak kan ni leh zel a, a lawmawm dan a thuah hnih hle.
C.S.I. Chennai Diocese rawngbawlna hmun hrang hrang tlawha ni li kan cham chhunga kan thlir dan tlangpui lo tarlang ila :-
1. C.S.I., Chennai Diocese-ah hian Kristian tlemte chauh awm mahse, kawng hrang hranga an rawngbawlnate hian mipuiah nghawng a nei lian hle a, kalna lam apiangah kristian sakhaw kaihhnawih thil chi hrang hrang hmuh tur a tam hle.
2. Kan hmuh leh hriat chin tam lo mahse Mizorama harhna kan tih ang tak hi chu hmuh tur a vang hle a. Chuti chung chuan kristian awm chhunte hi an nghetin an titak tak hle.
3. Mizorama kan rawngbawlna tlawm tak-Buhfaitham leh Sunday School rawng bawlnain nghawng a neih nasatzia leh a hnehzia a lang chiang hle a. Buhfaitham phei chu Mizorama an lo kal atang khan bul an tan ve nghe nghe.
4. Hmun hrang hranga an rawngbawlnate thlirin, an hma laknate hi chanchin tha puan darhna remchang atan an hmang thiam hle.
5. Mizote hi zai thiam leh rimawi ngaina hnam niin kan insawi thin a, mi tam tak min hriat dan pawh a ni. Mahse Kohhran hrang hranga kan inkhawmnaah keini aiin Biak inah an zai taima zawka, an inkhawm zai a ngaihnawm tak meuha ni.
6. C.S.I. huam chhunga Kristiante hi tlemin chak lo viauin lang lo mahse, an kristian chen hi kristian ve ta ila, Mizote hian tuna an dinhmun ang hi kan thleng phak angem tih hi ngaihtuah tham tak a ni.
LAWMTHU SAWINA
1. A hmasa berin kan zin chhung zawnga min hruaia, dam lohna leh harsatna dang dang laka min vengtu Pathian hnenah lawmthu awm mawlh rawh se.
2. Synod hruaitute chungah lawmthu kan sawi a. Thawktute hmakhaw ngaia hetiang programme an siam avang leh keini kher min thlang hi kan lawm a ni.
3. C.S.I. Chennai Diocese Bishop leh a thawhpuite chungah lawmthu kan sawi seng lo. Kan thlen tirh atanga kan haw dawn thlenga min enkawl dante, kan cham chhunga kan mamawh tinreng min ngaihtuahsak bakah duhsakna thilpek hlu tak tak min pek avangin kan lawm takmeuh a ni.
4. Chennaia Mizo awmte chungah, a bik takin Pu P.C. Lallawmsanga te nupa leh Gurukul Theological College-a zirlaite chungah kan lawm takmeuh a ni. Kan cham chhunga min duhsaknate, a tul hun apianga min tawiawmna avangin mawi takin kan lang ve thei niin kan hria a, lawmthu kan sawi a ni.
5. Kan zin chhunga min lo tawngtaisaktute zawng zawng mimal, chhungkua leh Kohhrante chungah lawmthu kan sawi a. An mi tawngtaipuina avangin a tira kan ruahman aia tha mahin hun kan hmang thei a, lawmthu kan sawi a ni.
THUBELH (Chawng khum dan, tlang huat loh)
I. Chanvo kan siam tharte :-
1. Zunin incharge : Pu Lalzawngliana (Kan kalna apiangah a hmuh hmasak ber chu zunin a ni a, zun chhuak ve te tan a thlamuan thlak hle.
2. Tui incharge : A chuana chuang kim Upa Lalchangliana (Kan thlennaah tui kan nghei a, Pu Changa’n a zuk dil a. Tui… Pani…water…an la hre chuan lo. A tawpah zaizirin tui kan nei lo tih a sawi a, an lo pe chiang hle. Zo leh zo lovin a rawn pu chho par par a, ‘Duhthusamin tawngte hi kan thiam tawk mang si lova, a buaithlak khawp mai. Mahse tui a awm loh chuan min hrilh zel tawh rawh u’, a ti a, kan thlamuan phah vak chuang lo.
II. Kan zin chhunga a ber kaite :-
1. Thlalaknaa lang hnem ber – Upa Changa
2. Rangkachak zawng nasa ber – Pu Lalzawngliana
3. Vanlal......a zai dan zir thiam ber - Rev. Dr. C. Lalhlira
III. Sorry…! Ka tihpalh
1. Bishop kawngkapui darthlalang fim takah Rev. Zothansanga’n kal tlang a tum a, a chal thla a hnutchhiah chu vawiin thlengin hmuh theihin an la vawng tha.
2. Sunday-a Christ Church-a inkhawmte chu mi din rualin an ding lova, mi thut hnuah an la ding veng veng a, Chairman hovin an hrih a hai tlang hle.
3. Rel mutna chung sang atangin Pu S. Laltluanga a tla palh a, a hnuaia vainu lo mutui lai chu a zu delh a, an thawm a tha hle.
4. Pa pakhat daikal pawh kawngka alo kalh si lova, tumah an awm lo emaw tiin Pi Rami’n a hawng phut a, an chiai dun nasa hle.
IV. Enge an sawi ?
1. “Tunah chuan ‘Ka tlin ta ngang love’ pawh ti ila, lungawi takin ka kal thei tawh ang” – Pu Changa (Lawnga a chuan zawha a sawi)
2. “Tunah chuan thil chuan theih zawng zawngah ka chuang kim ta” – Pu Tluanga
3. “Marina Beach-a Sap nulaho nena han intheh thil meuh chuan in lam ngaih a reh chiang hle”
- Rev. R.C……..?
4. “Kawthat loh laia ekina thiante ek tum tha leng lawng han hmuh chu rualawh a na duh ngei mai”
- Pu Mamawia
5. “Mafak, sawlaia bus chhawng saw a chung zawkah a khalhtu a awm ve miah lo nia !”
- Pu Valaa
6. “European Comode-ah khan ka tla tak tak miah lo ania aw..” – Pu Sawmtea.
7. “Saw laia vainu chungah sawn ka va bawkkhup zan teh ang” - Rev. Dr...........?
(Vainu mutna chungah a va mu ta zar a)
FELICITATION TO OUR MIZO DELEGATES
On 20-03-2007 at 5:00 p.m.
In Mizoram, where the breeze is cold
There is a prestigious church, look very old
The Presbyterian Church, it is by name
Has already won a great fame
You can sing with a sweet voice
And prayer is your first choice
The little children glorify flowing
The crowd of believers overflowing
As Pastors and leaders you share wisdom
And your mission always extends the kingdom
The hospitality was great and warm
You did it with pride but calm
Our stay may be days but looked a year
Though short but brought us near
At this time of reception and reciprocation
We are proud under our Bishop’s dedication
- Rev. S. Christopher Rathnaswamy
C.S.I. Diocese of Madras
