April 12, 2007-ah Aizawl chhuahsan turin  confirmed ticket (ok) advance takin min rawn thawn a. April 11-ah thlawhna cancelled anih avangin a zam awm duh hle a. Mahse vanneih thlak takin ni 12-ah chuan thlawhna Lengpui Airport-ah a lo tum thei hlauh mai a. Amaherawh chu nimin lama thlawhna cancelled sak te chu ko hmasain kan thlawhnaah chuan an hnawh khat a, Flight ticket ni 12 atana pek te chu kan chuang zawk ta tlat mai a. A thinrim thlak hle mai. An thlawhna an cancelled sak avanga mi thlawhna luahlan ngawt mai chu passenger lam thiam loh pawh ani bikin ka hre lo. Airport-a hnathawkho tena an ruahman a ni a. A diklo hul hual a ni. Ni 12 atana confirmed ticket nei, a thlawhna pawh lo kal ngei, ni 11-a an thlawhna cancelled te thun vek mai kha khawvel khawi hmunah mah an tih ka ring lo. Additional flight pek an nih loh chuan ni 12 atana ticket neite baka seat chuang a la awm chuan chutah chuan dah chauh tur ni awm tak a ni. A buai lo tur chu kan buai a ngai ta a. Travel Agent lam te, Ministry lam te, Civil Aviation lam te be kual zelin a tawpah Guwahati flight-ah mi 4 chu min hnawhin engemaw ti ti chuan Kolkata chu kan thleng ta hram a. Guwahati flight-ah pawh leng ta lo, a tam zawkte chu a tuk lamah buai namen lovin an rawn buai tih ka hre zui a. Ka vannei ka intih rualin ka rilru chu a dam hauh lo mai. Chu lam chu duh tawk ila.

Dr C Lallawmzuali, Nepal-a kan Missionary nen Singapore Airlines in Bali kan pan a. Singapore Airport-ah Wales rama kan Pastor te pahnih Rev Sangkhuma leh Rev John Malsawma Colney te nen kan inhmu nawlh a, kan kalho ta a. Denpasar Airport (Bali) kan han thleng a, Visa on Arrival (VoA) counter-a kan intlar lai chu a ram mi emaw min tiin counter dang min rawn kawhhmuh sek mai a. A tawpah kan Indian Passport kan en tira min tibuai ta lo chauh anih kha. Pawisa kan han thleng a, India Rs 1/- chu Indonesian Rupia 200/- hu lai a lo ni mai a. US $ 1 chu Rupia 9000/- vel zet a lo ni a, a nuai telin kan ak ta tun mai a. A thlamuan thlak viau mai. Mahse, thei tui no khat kan han in a Ra 24,000/-(singhnih sangli) man zet a ni mai a. A ral chak hle thung. Pencil tlawn khat pawh Ra 1000/- man a ni zel bawk. Jakartaa ka hotel room pawh zan khatah Ra 3,50,000/-(cheng nuai thum leh sing nga) man zet chauh a ni!!

Retreat-ah hian tuktin Bible study-a bul tanin nitin session 4 kan nei thin a. Thu ngaihthlak bakah group-a in siamin sawiho leh practical/ workshop te kan nei thin. Kei min sawi tir ve chu ‘Evangelism’ (Chanchin tha hril) tih a ni a. a subject hrim hrim aimahin kan Kohhran Ramthar rawngbawlna lam sawi tam tura min duh avangin chu lam chu ka sawi tam ber a. Chanchin tha hril tur hian hausak a ngai lova, mithiam nih a ngai ber lo: chanchin tha neitu nih leh Lal Isua thupek awiha hrilh darh duhna thinlung neih a pawimawh ber a ni tih sawiin, Mizote hi hnam rethei tak, thiamna leh theihnaah la hniam tak kan ni. Chuti chung chuan Mizoram Synod hnuaiah chuan mi 500 in missionary pakhat kan thawh chhuak zel ang a ni. Chanchin tha hrilna tur sum pawh kum 1932-ah Rs 26/- a tanin kum 2006-ah chuan Rs 202,608,600/- a lo nih tak thu te. Heng sum tuakna atana kan thawh dan ki hrang hrang, thingfak missionary, Ramthar fehchhuah leh thil dang tam tak sawi langin hausak avang leh thiamna neih that avanga thawh tur ni se kan thawh phak loh tur hi kan dawn hi pek chhawn zel kan duh avangin Pathianin kawng min buatsaih sak zel thu te ka sawi ber. Hemi hun bakah hian Ordained Minister-ho puala Seminar/ workshop min hruai tir bawk a. Minister 13, keimah tiamin kan awm a. Hmeichhia 3 an tel bawk. Bawhzui ngaia kan ngaih thil hrang hrang zingah Mizoram Kohhrana hmeichhe nemngheh chungchang a tel.

He Retreat hian thupui a nei a, “Take Home the Gospel” tih a niin Luka 8:26-39, Ramhuai Nuaia chanchin kha, changthlan a ni. Missionary te an hnathawh anga group-a inthenin kan chang innghahna hi lemchanin an rawn entir hlawm a. Zirtirtu Group chuan ‘Lal Isua hun leh tunlai Solomon Island’ tih rawn changin hmana Lal Isua tawktu Nuaia ang kha tunlaiah hian kan zirlaite (students) zingah pawh an awm a ni tih lantir thei turin thiam takin an chang a. Medical lam ho chuan tihdam rawngbawlnaah hian Pathian hmanrua chauh kan ni a. Kan thiamna te hian tlin loh chin leh tih theih loh chin a nei thin. Mahse, kan tih theih bak ti theitu chuan vawiin ni thlengin a thiltih theihna a la lantir reng a ni ti zawngin an rawn chang a. Social workers ho chuan ruihhlo te, inhnehchhiahna te, in bumna te, hleih neihna te hian mi tam tak salah siamin ramhuai angin hna a thawk mek ani tih lam hawiin an rawn chang thung a. Pastor ho chuan hring hran takin lem an rawn chang a Rev John Malsawma Colney chu Nuaia lema changin Rev Sangkhuma leh Rev Rodingliana te pawh vawk 2000 lemah an chang a, an ngek ring nasa hle.

Thawhlehni (Apr 17, 2007) tlaiah tualchhung lamin an hnam lamin min rawn awi a. Zo ho chuan vai chheng chheng kan ti leh pek deuh nain an che tha kher mai.

Nilaini (Apr 18, 2007) ni khan Bali khawpui fangin kan chhuak a, Bus 3 hire-in heng hmun te hi kan tlawh: Sari Amerta Batik, Tohpati – puan (handloom) leh themthiamna chi hrang hrang(handicrafts) lam siamna hmun a ni. Adi Wood Carver- thing hmanga mihring leh thil lem chi hrang hrang siamna hmun a ni a. Heti lamah hian an sang hle mai. Monkey Sanctuary-Zawng chitin awm khawmna ramhnuai a ni a. Zawng leh mihring kan leng za dual dual a ni ber. Petruk Arts- Lemziakna hmunpui a ni ber mai. Lemziak (painting) lamah pawh an sang hle. Hindu khawpui ani bawk a vai pathian lem leh Hindu sakhua nena in kaih hnawih a tam hle. Putri Kayangan- Balinese traditional house leh rangkachak leh tangkaraw siamna hmun dangdai tak a ni. Guang khaw bazar- Balinese thil zawrhna bazar-ah kan tawp a, lei tur kan in hriat hleih hlawm hle mai.

Mizo kan ni kan lawm e tih ang khan a bikin kan hlawk leh pek hle. Programme zawng zawng zawh hnuah zan tin Mizo Fellowship hun kan hmang thin a. Tawngtaihona leh rawngbawlna reports te nen hun kan hmang ziah a. Kan hun neih dan azirin Rev Zaidarhzauva Chinese thingpui sen/hring (Green tea) kan inho thin bawk, a va han manhla tak em!! Mizo zaipawl vawihnih kan zai bawk. Group-a inthen dan chi hrang hrangin kan inthen thin a. Hnathawh a zir te, ram hrang hrang ang te pawhin kan in then thin a.Group tur nei ve ta lo chu Mizo awm lohna group-a tel tumin ka zawng thin a, a awm thei miah lo nia.

He Retreat-a tel ve tur ka nih an hriatin Wycliff International hovin Jakarta hmuna an hnathawh te hmuhpui turin min sawm a. Chuvangin Retreat Farewel Meeting tel hman lovin Jakarta lam ka pan ta a. Kuala Lumpur atangin min dawngsawng turin Rev Elisha Chua, Regional Director a lokal a, Jakarta Airport-ah kan in hmu a. Hotel Mega Anggrek-ah Supper Delux room min pe a, zan khat riah man cheng nuai thum leh singnga ani leh ngei bawk. Ka cham chhungin Kartidaya Mission Foundation te, SIL Mission te, Bible League Indonesia te, Indonesian Bible Society te ka tlawh a, a hlawk thlak hle. Indonesia ram hi Muslim ram (85%) an ni a. Kristian Biak In hal leh Kristian tihduhdah leh thahna te a awm reng a ni. Chuvangin he ram hi Missionary Retreat neihna atan chauh nilovin rawngbawlna tur hmun tul tak leh Pathian ram chi tuhna tur ngawpui vah leh hal darh ngai tak a niin a lang. ‘CWM hian Kristian ramah rawngbawl a Muslim rama retreat kar khat a hmang mai thin dawn anih chuan a duh tawk awm lo mange aw’ tiin a ngaihtuah theih. Muslim ram lamah ralmuin Kristian ramah Retreat nei thin tur zawnga hmalak a tul zawkin kei chuan ka ngai.

Pathianniah Jakarta Praise Community Church-ah ka inkhawm a. Ka rilru a hlimin lawm avangin ka mittui a tla hial mai. He Kohhran hian Car Parking Tower chhawng sawm zet chunga chhawng (Floor ) hnih chu a lei a. International standard stadium siamin, a hmingah pawh ‘The Upper Room’ (Pindan Chungnung) an ti a. Chutah chuan Pathianni apiangin inkhawm vawi thum an nei a. Hun dangah chuan a remchan dan angin hire theih ani. Hire na sum hi an in leina rulh nan hian an hmang mek a ni. Biak In hawn hmain inkhawm tur kan intlar nasa hman hle. Kan han lut a, Ushers ho hna chu hna hautak zet ani. Mi 1200 vel thutna awm sa a ni a, thutthleng rem belh tur pawna awm sa chu an la fai hneh awm hlein ka hria. An worship Team te an fak awmin an phur hle a, English leh Indonesian hla in kar thlakin an sa a mi zawng zawng an lam suau suau mai. Ka han hawi vel a, a upa pawl ka ni ve mai awm mange tih turin thalai leh nu leh pa valai lam vek an ni a. Min hruaitu Pu Jim-a leh Pi Peggy te hnenah chuan ‘Thalai pual deuh em ni?’ tiin ka zawt hial a. Mahse thalai pual inkhawm chu tlai lama neih tur a la ni chauh zawk a lo ni a. America lamah chuan Biak Inah thalai hmel hmuh tur an la awm zeuh zeuhin zaipawl te pawh thalaiin an la pawlh pheuh pheuh a, Europe lamah phei chuan Biak Inah thalai hmel a lang miah lo tih theih khawpin tar kohhran tih mai tur an ni. Chuvangin tun atanga kum 25 vela Europe ram kohhran awm dan tur hi thlir lawk a har hle mai. Kha Pathianni inkhawmah khan kum 25 hnua Indonesian kohhran tur a lang uar uarin ka hre thung. ‘Hetah lo thiat mahse hmun dangah a din thar’ tih angin a dinthar zinga tel zel pawh a tul hle mai.

Jakarta khawpui hi ka lo suangtuah aiin a ropui hle mai a. Khawvel khawpui hmingthang ber ber te nen khai khin tham tak niin ka hria. Khawpui thang lai ani bawk a insak a mawiin architech lamah an sang hlein ka hmu. Tin, khawpui a fai a, mottor bal leh hlui lam hmuh tur a awm lo. Shopping center (Mall) lian tak tak a tam hle a, inchhawng a sang hlawm hle mai.

Indonesia-ah hian Sorkar inchhiarna lamah chuan Muslim 85% vel niin sakhaw dang bia hi 15% ang vel an ni a. Mahse kan Kristian unaute chuan Kristian 15% aia an hniam an rin loh thu min hrilh a. Rawngbawlna lam erawh a hautak hle a, sorkar atangin enthlak leh dan rinchhan chunga Kristiante chunga hlei lenna remchang dap reng a ni ber mai. Rawngbawltu pawl hrang hrang ka tlawh te hian Indonesia rama Pathian lehkhabu sem chhuah leh tawng hrang hrang hmangte hnena anmahni tawng ngeia Bible pek an buaipui ber a. SIL International hian zirna sikul (Education) leh vantlang hriselna (Community Health) lam hawia rawngbawlin thingtlang leh hnam hnufual zingah an thawk a. Sorkar lam pawhin a hrethiam hle a, an mamawh ang mi chaw lut turin visa pawh an sponsor thei nghe nghe a, thawhpui an chakawm khawp mai.

April 25, 2007-ah Pu Elisha Chua nen bawk Jakarta Airport kan pan a. Ani Kuala Lumpur a pan a, keiin Kolkata kal turin Singapore ka pan thung a. Tluang takin Apr 26, 2007 tlai dar 4 velah Aizawl ka lo thleng leh ta a ni. Ka zin chhungin Pathian hruaina ka dawng nasa hle a. Kan Kohhran chanchinte sawiin kan intodelh thu te chhuang takin kan han sawi ve thin na a, zan khat riah man emaw, vawikhat chaw eiho man emaw pawh ‘ka lo tum ve ang e’ kan han ti ngam ve lo thin erawh chu a zahthlak lek lek thin!