2.

THAWKTU NGHET LAK BELH:

Thawktu nghet Doctor pahnih Staff Nurse pariat, X-ray Technician pahnih lak thar an ni.

3.

RETREAT :

March 20–23 khan Rev. Challianngura Speakera hmangin thawktute pual Retreat neih a ni a; Nurse zirlai leh PTS, Covenant Year-te tan retreat buatsaih a ni bawk.

4.

MOBILE CLINIC:

Nikum Hospital Sunday leh tun inkâr chhungin Pastor Bial leh Kohhran hrang hrang 12-ah Mobile/Free Clinic neih a ni a, damlo 6,463 en an ni. Sawmna kan dawng hnem hle a, sawmna zawng zawngah kan kal thei lo erawh chu pawi kan ti hle.

5.

CHARITY FUND:

Kum 2006–2007 chhunga Charity Fund atanga sum kan hmuh zawng zawng chu Rs. 15,48,133/- a ni a, damlo 529 hnenah sum hmuh hi hman zawh vek a ni.

6.

HEPATITIS ‘B’ VACCINATION:

Nikum Hospital Sunday leh tun inkarah Aizawl Veng chhung leh thingtlang khaw hrang hrangah Hepatitis ‘B’ Vaccine mi 6,112 hnenah pek a ni.

7.

BLOOD DONATION:

Nikum Hospital Sunday leh tun inkarah KTP Member leh tlawmngai pawl hrang hrangte hnen atangin thisen unit 2,419 kan dawng a, hetiang thilpek hlu tak kan dawng hi kan lawm hle a ni.

8.

THILPEK:

KTP, Kohhran Hmeichhia leh pawl hrang hrang hnen atangin hmunphiah, Thutthlengsei leh thil dang dang kan dawng thin a, Damdawi In mamawh nasa takin min phuhruksak a, a lawmawm em em a ni.

9.

PLASTIC SURGERY CAMP:

A vawi 8-na atan Interplast Germanyten February 18–17, 2007 khan kan Damdawi Inah Plastic Surgery Camp an rawn nei leh a, damlo 300 chuang an en a, mi 147 an zai. Kuminah hian Surgery Camp hi Champhaiah February 5–7, 2007-ah neih a ni a, damlo 200 an en a, mi 17 an zai bawk.

10.

EYE CAMP:

1) Outreach Camp : (a) Kolasib (b) Saiha (c) Saitualah neih a ni a, damlo 1397 en a ni a, mi 95 zai a ni bawk.

2) Damdawi inah Base Hospital Eye Camp vawi 15 neih a ni bawk a, mit naute paw (cataract) 492 zaisak an ni.

11.

ZIR LEH:

Tunah hian Doctor pathum leh thawktu dang pahnihin zirna sang zawk an zir leh mek.

12.

NURSING SCHOOL:

Tunah hian zirlai 91 kan nei mek a, Covenant Year 31 an awm bawk. Nursing School tluang takin a kal zel a, result pawh a tha thin hle a, kan lawm em em a ni.

13.

HIV/AIDS ENKAWLNA:

Rev. Tudor Loyd, Wales rama mi chuan kan Damdawi Ina HIV/AIDS veite enkawlna atan £ 21,000.00 (Rs. 1,700,000/-) min rawn pe a. Wales ram Kohhrante nen tunah hian HIV/AIDS veite enkawl chungchangah hma lak mek zel a ni a, Mizoram Health Minister kaihhruaina hnuaiah Co-ordination Forum on HIV/AIDS din a ni a, he Forum hian HIV/AIDS veite enkawlna kawngah hma a la thin dawn a ni.

14.

MILLENNIUM CENTRE CLINIC HAWN:

Millennium Centre, Aizawl Bazar-a Clinic hmun tur Rs. 57.2 lakhs-a kan lei chu Feb. 16, 2007 khan Synod Moderator Rev. Vanlalchhungan Pathian hnena hlanin a hawng a, March 1, 2007 atangin he Clinicah hian zing leh tlaiah damlo inentir theihin Doctor Specialist an thu thin a ni.

15.

CMAI BUL TUMA WORKSHOP NEIH:

Christian Medical Association of India bul tumin February 26 - 28 leh March 1 & 2, 2007 khan ngawl veite enkawl dan leh rilru leh taksa tihdamna chungchang zirhona neih a ni a, pawl (NGO) hrang hrang aiawh leh Kohhran aiawhten he Workshop hi an rawn hmang a, kan hlawhtling hlein kan hria

16.

ENT CAMP NEIH:

RIMS, Imphal atangin ENT Department Professor leh Assistant Professor (Dr. T.H. Ibohal Singh leh Dr. T.H. Sudhiranjan) te lo kalin March 2 & 3, 2007 khan ENT Camp hlawhtling taka neih a ni a, damlo 60 an en a, 24 an zai. Doctor thiam lo kalte hian kan Damdawi In Charity Fund atan Rs. 10,000/- ve ve min pe a, kan lawm hle a ni.

17.

MARPARA PHC, PPP SCHEME HNUAIA ENKAWL:

Marpara Primary Health Centre Synod-in PPP Scheme (Public Private Partnership) hnuaia enkawl SEC-in a remtih chu hma lak zel a ni a, tunah hian Sawrkarah ruahmanna thlen mek a ni.

18.

CHAPEL THAR:

Hospital Chapel thar chu March 19, 2007 thawhtanni zing atangin luah tan a ni.

19.

ICU TAN TANPUINA PE:

Presbyterian Hospital-a ICU (Intensive Care Unit) tihchangtlun nan NEC atangin tanpuina Rs. 229.52 lakhs hmuh a ni a, 1st Installment atan Cheng nuai 90 dawn a ni tawh a. NEC leh Sawrkar lam hotute telin Purchase Committee dinin anni hian he sum kalpui zel dan tur hi an ngaihtuah dawn a ni. Aw le, tunah chuan thlarau lam thupui awm sa, ‘Damlo tidam ula’ (Lk. 10:8-10; Jakoba 5:14- 16) tih hi tlemin han sawi ve ila:

1. DAMLO ENKAWL HI PATHIAN RAWNGBAWLNA, LAL ISUA RAWNGBAWLNA CHHUNZAWMNA A NI:

Kan Bible-ah hian Thuthlung Hlui atanga Thuthlung Thar thlenga kan hmuh pawimawh tak chu damlo tihdamna hi a ni. Damlo enkawlnain a tum chu tihdam a ni a, chumi atan chuan damdawite a tul a, chu mai bakah chuan damna tak tak thlen tur chuan rilru leh thlarau a dam tel a ngai a ni. Kan Pathian hian mihring nun pum pui damna hi a ngai pawimawh em em a ni tih kan hre theuh âwm e. Chuvang chuan kan Lal Isua ngaih pawimawh damlo enkawl hi rawngbawlna pawimawh tak a ni a, kan thlahthlam thei lo. ‘Damlo tidam ula’ tia min duh avangin tihdam hi kan tum bul pui a ni. He rawngbawl hna hi Lal Isua rawngbawl hna chhunzawmna a ni tih hriain Mizoram Synod pawhin Presbyterian Hospital tan hian theih tawk a chhuah mek reng a, Kohhran mipui pawhin kan ngaih pawimawh a tul hle.

2. PATHIAN RAWNGBAWL TURIN DAMNA KAN MAMAWH:

Eng hna pawh thawk dawn ila hriselna tha neih a ngai a, hrisel loh chuan hna a thawh that theih loh a ni tih kan hre chiang theuh âwm e. Pathian rawngbawl tur pawhin mi hrisel tha kan mamawh a ni. Pathianin kan that lai, vanglai leh hrisel that lai hun hi ama tana hmang turin min duh a ni.

Pathian rawngbawl turin damna kan mamawh a, kan dam theihna tura Kohhranhoten Damdawi In kan nei hi a pawimawhna lantirna a ni tih pawh kan hre thei âwm e. Chuvang chuan Kohhranhoten he kan Damdawi In thanna tur leh hmasawnna turin mawh kan phur theuh a ni tih kan hriat thar leh a pawimawh âwm e.

3. DAMDAWI LEH DAMDAWI IN HI PATHIANIN MAL A SAWM:

Pathianin mihring ama anpuiin a siam a, finna leh remhriatnate a pe a ni. Pathianin mihringte hai chhuah turin finna a pek atangin damdawi chi hrang hrangte hi hmuhchhuah a lo ni ta a ni. Heng damdawite hi Pathianin mal a sawm chuan damna hmanrua pawimawh tak a ni a, mal a sawm loh chuan turah pawh a chang hlauh theih a ni tih chu a hretute kan ni theuh âwm e. Kan Damdawi In pawh hi Pathianin nasa takin mal a sawm a, kum 79 lai kal taa kan Missionary- ten an lo tan tawh a ni a, vawiin thlengin hma a la sawn zel. Thawktute pawhin Pathian malsawm zel tlaka kan thawh a tul a; Kohhranhote pawhin tawngtaina nen bang lova kan dil a ngai a ni. Damlote damna hman- ruaah Pathianin amah ringtute a hmang thin a, kan tawngtai leh thilpek hmangin tihdamna hna thawh a ni a; Damdawi Ina thawktuten kan aiawhin anmahni kt ngeiin an thawk. Damlo tihdam hi Kohhranho rawngbawlna pawimawh tak a ni tih hriain kan theih ang kawngah tan la sauh sauh turin kan inngen a ni e.