Rawngbawlpui duh tak te u, a hmasa berin kan Lalpa Isua Krista hmingin chibai ka buk theuh che u a ni.  Zanin hun ka chang ve thei hi lawmawm ka ti khawp mai.  Ka tan chuan hun hnuhnung lam a lo ni ta a.  Kohhranhote hnenah  hian sawi tur ka ngah hle a ni.

1.

 Lawmthu : Min hriat theuh angin kei chu rawngbawltu Pastor duhawm tak takte zingah pawh a te berte zinga mi ka ni.  Mahse, Pathian leh a Kohhranhote duhsakna avangin chanvo pawimawh tak takte min chan tir ve thin a.  Hetianga chanvo pawimawh tak tak ka chan chhung hian rawngbawlpuite leh Kohhranhote duhsakna tam tak ka dawng a, ka lawm em em thin a ni.

1) Kum 1981-ah Lunglei-ah Home Mission South-a Field Secretary ni turin min ruat a.  Office lama ka la thawh ngai loh avangin a ngaihna ka hre lo hle mai a.  Ka Office kal hmasak ber ni chuan lehkha pawimawhte ka dawhkanah peon-in a rawn dah a, dilna leh thil hrang hrang a lo ni a.  Tihngaihna ka hre lo khawp mai a.  Kan Office hotupa ka ko lut a, a hnenah chuan “Engtinnge ka tih dawn?” tiin ka zawt a.  A ni chuan “Heng lehkhate hi bawhzui dan tur i rawn ziak ang a, kei nin a tul angin kan lo bawhzui dawn a lawm” tiin min hrilh a.  Mahse, thu haw lam leh kal lam ka hriat loh avangin Minute bute, File an lo vawn zawng zawngte chu ka hriat vek a ngai tih ka ngaihtuah a, chungte chu ka zir ta ngar ngar mai a.  In sakna tura Sanction an lo pek tawh dan te, Account an kal pui dan zawng zawngte chu  ka thawhpuite hnen atang chuan ka zir a, taima takin min hrilh zel a.  A hnu thla khat vel atang chuan thil kal hmang ka hre thiam ve tan chauh niin ka hria.

Tun thleng hian Office-a ka thawhpuite ka rawn reng thin a.  An inpekna leh an thawhrimnate avangin kan Synod Office-ah hian pending leh thil tihkhawtlai a awm ngai lovin ka hria a, ka thawhpui zawng zawngte chungah lawm thu ka sawi a ni.

2) Committee Member-te chunga lawm thu : Kan hriat theuh angin kan Kohhran chu Committee hmanga inkaihruai kan ni a.  Committee Member-te taihmakna leh inpekna hi a ropui hlein ka hre bawk thin a ni.

Synod hnuaia Department hrang hrangte enkawlna kawngah  leh hmasawn zelna chungchangah Committee hi a pawimawh hle a ni.  A hminga Department-a mawhphurhna kan neihin hmasawnna tur kawng hrang hrang kan ngaihtuah thin a.  Chung kawngah chuan theih tawpin kan sawiho thin.  Tha ngei tur nia kan hriatte tam tak Committee-in min pawmpui thin a.  A chang erawh chuan rawtna tha tak nia kan hriat, kan phurpui em emte pawh min han hnawl sak bawk thin a.  Thil then khat pass mai awma kan ngaihte pawh a tlang mai theih loh chang a awm bawk.  Kan ngaih dan ni hauh lo lama a kal vak chang pawh a awm thin.  Mahse, Committee-in kan rel a nih avangin bawhzui a ngai a.  Heng zawng zawngah hian Committee member-te an fakawm hle thin a ni.  An dawhtheihna te, an inpekna ropui takte avangin kan Kohhran hi hmalam panin kan kal zel thin niin ka hria a, ka lawm em em thin a ni.

3) Kan hotute chunga lawmna : A hmingin Synod hotute zingah hian kum 8 lai  chu ka lo awm ve ta a.  Kan Moderator-te, kan Synod Secretary leh kan Finance Officer-te leh kan Statistician-te leh kan Executive Secretary-te an fakawm hlawm hle thin a ni.  Thawhpui an nuam a. Mahse mawhphurhna  chelhtu kan inthlak reng avangin a chang chuan harsatna te kan tawh phah lek lek thin niin ka hria a.  Thu inhlan chhawn fel tak leh tha tak leh inkaihhruaina tha tak kan nei hi a lawmawm hle a ni.  Moderator  hna leh tih tur te, Synod Secretary-te hna leh tih turte, Finance Officer-te hna leh an mawhphurhnate, Senior Executive Secretary hna leh tih turte ziaka kan nei vek hi a tha hle mai a.  Hei hian mi chak lo deuh leh chak deuhte a khai rual thin a, a tha em em a ni.

Kan sawi tawh angin kan Kohhran chu RORELNA hmanga inkaihruai kan ni a.  Chuvangin rorel pawh kan thiam hle thin a ni.  Pathian leh  a Kohhrante tana rorel kan nih avangin RORELNA DIK leh tha kan neih hi a pawimawh hle a.  Chutiang bawkin kan ram pawh mipui aiawhtute rorelna (Democracy) a nih avangin RORELNA DIK leh tha neih hi a pawimawh hle a ni.

Rorelna Dik kan ngaihtuah ho atana kan Synod-in a thlang hi  “a hun tak a ni” a tih theih awm e.

Kan ramah Rorelna dik a awm theih nan Kohhran leh Tlawmngai Pawl ten theih tawpin tan an la a.  Inthlanna fel leh thianghlim kan neih theih nan Mizoram People Forum (MPF) hmangin theihtawpin tan kan la a.  Kohhranhote nasa takin kan tawngtai bawk a.  Inthlanna fel leh thianghlim, duhthusam chu kan nei pha lo chungin, hmasawnna tam tak kan nei a, India ram a deng chhuak hial a ni.  A va ropui em!!

Pathianin sawrkar thar min pe a, kan sawrkar chuan Dik tak leh fel taka rorel an duh avangin ram thuvawnah pawh “Rorelna Dik” tih chu an thlang a.  Rorelna dik a awm theih nan theih tawpin tan an la nghal ni pawhin a lang a, a lawmawm hle a ni.  An tan tawngtaiin, tanpui zel ila.

Tin, Kuminah hian Kristian Thalai Pawl chuan Kum Puan atan “Rorelna Dik” tih an thlang a.  Kum puan Kaihhruaina siamin, “Rorelna Dik” tih thupui an zir mup mup bawk a.  Tin, Sunday School-ah Kristian Nun dan Tha “ tih kan zir a, rorelna dik pawimawh ziate pawh  kan zir tel a.  Tin, Nilai Thupuiah “Thianghlimna” tih kan zir  bawk a.  “Politics thianghlim” tihte kan zir zel bawk a, a ropui hle mai.  Nakumah hian “Kum Zabi 8-na Zawlneite” tih kan zir leh dawn bawk a.  Mi thenkhatin kan Sunday School zirlai leh kan Nilai Zan Thupuite Pathianin a hman thin dan an chhut ang deuh hian, a hun takah kan zir thin nite pawhin a lang a, a lawmawm hle a ni.  Nakuma kan Sunday School zir tur pawh hi Kum Zabi 8-na B.C. hun lai a thil thlengte ngun taka zirin, “Rorelna dik” thupuia neih chungin zir ila a tha hlein ka ring.

2.

Rorelna Dik awmzia :

Rorelna dik awmzia hi thu kam khat chauha sawifiah chu a harsa hle awm e.  Kum 2009-a KTP zir tur buatsaihtu chuan Rorelna dik awmzia chu  “Taksa, rilru leh thlarau lam mamawh, thatnate, nun khawchhuahnate, hmasawnnate, mi mal, chhungkua leh khawthlang, ram leh hnam tana thatna tluan tling thlentu hi a ni” tiin a sawi a.  Tin, June, 2009-a an zir tur ziaktu chuan “Rorelna diklo leh Corruption hi thil inzawm tlat, thliar hran harsa a ni” tiin a sawi a.  A sawi zelnaah chuan “Mi mal emaw, pawl emaw, party emaw hlawkna tura thuneihna (power) hman dik loh te, mi mal zalenna (liberty) zah lohna te, mihring hlutna (human rights) palzutna te hi rorelna dik lo rah a ni” tiin a sawi bawk a.  Tin, August thla zir tur siamtu chuan “Rorelna dik awmnaah chuan ram a ding chhuak a, dan leh hraiin awmzia a nei a, thiamna (merit)-in awmzia a nei a, thawhrim leh taihmakin awmzia a nei a, mi tin tan beisei tur a awma, inrin tawnnate a awm” niin a sawi bawk.  October, 2009-a KTP zir tur buatsaihtu chuan ngaihnawm takin pa pakhatin a fate chhang inchuh tehkhinna a hmangin rorelna dik awmzia a sawi a, a ngaihnawm hle a ni. Hetiang hian a sawi :-

Naupang pahnih hi chhang inchuhin an insual dawn a.  An pa chuan an chhang inchuh chu laksakin dawhkanah a dah a.  “Tunah a upa zawkin a phel ang a, a naupang zawkin a duh a thlang hmasa ang” a ti a.  A upa zawk chuan lawm takin chemte a la a, a inlen hleiha a phel chuan a nauvin a thlang dawn tih hre rengin a intia thei ang berin a phel a.  A nau pawh chuan a lian zawk nia a hriat chu lawm takin a thlang a.  A u pawh chuan a nau thlan loh zawk chu lawm takin a la ve ta a ni” tiin a sawi a.  Rorelna dikah chuan hlimnate, lawmnate, engthawlnate a awm thin a ni.

3.

Israel ram roreltute Pathianin a dem :

Deuteronomy bung 1:9-18 kan chhiarah khan Pathianin Mosia hmanga rorelna a din dan leh roreltute a ruat dan kan hmu a.  Tin, ro an rel dan turte pawh kan hmu bawk.  Israel-te chu an lo pung a, an lo tam ta hle a.  Mi pakhat tan an buainate, an phurrit te, an in nghirnghonate chu tihfel chi rual a ni lo.  Chuvangin, sang chunga hotute, za chunga hotute, sawmnga chunga hotute, sawm chunga hotute an awm a ngai a.  Chung an chunga hotute chu mi fing hmang chang hre mi, chinchang hre mite an THLANG chhuak tur a ni a,  chung an thlan te chu Pathian pawhin a pawmpui bawk a ni.

Roreltute chuan unau kara thu te, ram dang mite nena an inkar thu te ngun takin an ngaihthla ang a, fel takin ro an relsak tur a ni.  Rorelnaah thlei bik an nei tur a ni lo va,  mi-te leh mi lian in ang rengin an en tur a ni a, tumah an hlau tur a ni lo.  Rorelna chu Pathian ta a ni si a.  An tana thu khirh lutuk erawh chu Mosia hnenah an thlen tur a ni a, a nin a lo ngaithla thin dawn a ni (Deut. 1:16-18).

Heng Bible chang atanga kan hriat reng tur chu -

1) Rorelna h i Mihringte tana Pathian siam a ni.

2) Roreltu atan Mifing leh hmng chang hria thlan tur a ni.

3) Roreltute chuan dik takin ro an rel tur a ni.

4) Thu khirh leh harsa bikah chuan Mi thiam zawkte rawn thin tur a ni.

Kan hriat theuh angin Lal Isua pian hma Kum Zabi pariatna kha Israelte tan chuan “Hun Rangkachak” (Golden Period) a ni.  An ram a ralmuang a, ei leh barah an hniang hnar a, an ram a hausa hle a ni.  Mahse, he lai hunah hian mipuite’n nun an thlahdah a, mi hausa ten miretheite an rap bet nasa hle a ni.  Heng miretheite tawrhna leh harsatnate hi Zawlnei ten an vei a, a dik loh zia leh a that loh ziate an au chhuahpui a.  “Rorelna dik chu lui angin luang se la, felna chu luipui kang ngai lo angin luang rawh se” (Amos 5:24) tiin an au a ni.

Dik lotaka sum an lakluh hmang te chuan in leh lo tha tak tak leh mawi tak tak te sa in, Grep huan nuam tak takte siam mahse a rah an seng lovang a, an in nuam leh mawi tak tak chhungah chuan an cheng hek lo vang (Amos 5:11).  Kawtlai zau zawng zawngah tah vak vakna a awm ang a, kawtthler zawng zawngah a va pawi em, a va pawi em tiin an tap ang a, Grep huan zawng zawngah pawh an tap vak vak dawn a ni.

Heng thilte hian Rorelna dik lo pawizia a tar lang a.  Hlawkpui leh hlimpui tura an ngaihte chuan tahna mai a thlen thu kan hmu a ni.

Kan ramah Rorelna Dik a awm hi kan duh ber chu a ni.  Rorelna dik lo hi mi rethei ten an tuar ber thin.  Chuvangin miretheite hre reng turin Pathian chuan Israel mipuite a chah a ni.

Kan ram a rethei a, kan chhiah tling khawm atangin kan in tung ding zo ve lo.  Chuvangin  Central atangin sum tam tak kan dawng thin a, kan vannei hle a ni.  Mahse, heng sum kan dawn te hi a hmanna tur dik takah kan hmang em?  Police Modernization Scheme-te,  Bamboo Link Road kan  tih te, PMGSY hmanga kawng kan laih te leh thil tam tak, hmasawnna tura kan Project siam leh kan tihhlawhtlin dan te hi chhut tham a awm awm e.

Kan Pathian thu chuan A chhe laite kan siam that a, thang thar lo awm zel turte tana tih tak zeta hna kan thawh chuan ram dang mite chu kan leilettu leh kan Grep huan enkawltu an nih tur thu a sawi a.  Tin, “hnam tin sum in ei ang a, an ropuina chu in inchhuan phah ang” tiin a sawi a ni (Is.61:4-6).  Sum leh pai kan neih chhun chhunte hi dik takin hmang ila chuan kan ram tan hian sum hman tur hi a awm zel dawn ni awm tak a ni.  Heng  hi kan Sawrkar hian hre reng se a duhawm khawp mai.

Tin, ram dang mite kan enkawl dan hi ngun taka kan ngaihtuah that leh a tha hle a ni.  Khawvel a lo thang zel a, mahni leh hnam bil chauhvin a awm theihloh va, kan khawsa ho ta zel a ni.  Mizote tan Mizoram hi Pathianin min pek a ni a, chutih rualin khawvel ram dangte pawh kan chenna hmun atan min pe tho a ni.  America ram te, England leh Europe khawmuala ram hrang hrangte, Asia ram leh Africa ram te, Australia leh thliar kar ramte pawh kan chenna tur leh hna kan thawhna hmun atan Pathianin min buatsaih sak tho a ni.  Chutiang bawkin Mizoram hi hnam dangte chenna tur leh an thawhna hmun tur a ni tho a ni.  Kan mawhphurhna theuh erawh chu CHENHONA tlaka kan awmna ram buatsaih hi a ni.  Hetiang hi Pathianin khawvel a buatsaih dan a nih chuan hnam dang leh ram dang mite chungah engtinnge kan khawsak tak ang le?

India Hmar Chhak ramah hian hnam te nau, tlem te te tam tak kan awm a, tawng hrang leh culture hrang hrang, inhlat vak silo tam tak kan awm a ni.  Hetiang hi a nih avangin harsatna tak tak kan tawk mek a.  Heng kan harsatnate hi in hrethiam tawn a, thiam taka kan khawsak a, in unauna tha kan neih theihna tura tan kan lak a tul hle a ni.  Mizoramah pawh hian Mizo hnam hrang hrang- Lusei, Hmar, Ralte, Paihte, Pawi, Mara leh hnam dang tam tak kan awm hova.  Chakma leh Bruhnamte pawh an awm bawk.  Tin, heng bakah hian vai hnam hrang heng engemaw zat an awm bawk.  Heng hote hian tawng hrang hrang leh hnam dan hrang hrang kan nei bawk.  Heng zawng zawngte hian khawsak hova, chenho dan kan zir a tul hle a ni.

Mi ram leh hnam dang zinga kan awm chuan an khawsak dan anga kan khawsak thiam a tul thin.  An tawng pawh kan thiam theih chuan a tha leh zual.  Mizote phai ramah kan awm a, Mizo Service te kan neiin kan intanpui thin a, a tha em em a ni.  Mahse, hnam dangte khawsak dan leh an nunte kan zah thiam a, hawihhawm taka kan  awm chuan kan Mizo nun dan mawi tak hian an nun a hnehin kan zinga rawn tel ve an chak ngei dawn ani.  Hnam dang tan kan hnawksak ngai dawn lo a ni.

Kan ramah pawh hian hlim tak leh thlamuang taka kan awmho dial dial dan tur hi kan ngaihtuah reng a ngai a.  Kan unaute harsatna chu kan harsatna a ni a.  An tuarna pawh kan tuarpui a tul thin.  Kan ramah Pathian ram a lo thlen a, Pathian duhzawng tih a nih theih nan kan tawngtai thin a.  A hlawhtlin theih nan rawng kan bawl bawk a ni.  Kan ramah rethei leh hmeithaite rahbehin awm lo sela, dik tak leh fel takin rorel nise a va nuam dawn em!! Chu mi chu a awm theih nan Kohhran hote Pathianin a din a, rawng a bawl theih nan Thlarau Thianghlimin a tichak mek a ni.

4.

Kohhranah Rorelna Dik a pawimawh :

Israel mite chu an sakhaw mi em em a ni.  Pathian duh loh zawngte ti thin mahse, Pathian  hnenah inthawi leh halral thil hlante an hlan tho thin.  Inkhawmpui urhsunte pawh an nei zel a.  Rimawi chitinrengin Pathian an fakin an chawimawi thin.  Mahse, hei hi Pathianin a duh lova, an inthawina leh thilhlante, an inkhawmpui urhsun te, an chawimawina rimawite chu Pathianin a hnawl vek a ni.  “Ka hnen ata la sawn rawh u” (Amos 5:23) a ti a ni.  Pathian biakna leh kan nitin nun leh khawsak dan hi a inrem a pawimawh hle a ni.

Kan sawi tawh angin kan kohhran hi Rorelna hmanga inkaihruai kan ni a.  Chuvangin Rorelna dik hi kan tan a tul leh zual a ni.

Kan Kohhranah hian Rorelna dik hi kan duh hle thin in ka hria a, lawmawm ka ti hle thin  a ni. A hminga kum 8 chhung kan kohhran hruaitute zinga ka tel ve chhung hian theih tawpa dik leh tha-a rorel hi kan tumin ka hre thin.  Mahse, tihsual leh tih dik loh chu kan nei tho vang.  Mahse, kan tum vang leh kan duh vanga rorelna dik lova rorel chu kan ni lo in ka hria a, kan thlin tawk lohna avang leh kan hriat fuh tawk lohna avanga kan rel sual chu a awm thei a ni.

Hna lak chungchangahte  hian insawiselna a a nasa hle thin a.  A latu nih pawh a harsa hle thin. “Pastor fate an duhsak bik,” “Upa fate an duhsak bik” tih te a awm thin.  Hei hi ngun taka kan ngaihtuah zui ka duh hle a ni.  Kan hna lak danah hian Pastor fa an ni emaw Upa fa an ni emaw kan ngaihtuah a tha lo va.  A tling leh a fel, Pathian leh a Kohhran hote tana tha tur hi kan ngaihtuah ber a ni fo tur a ni.  Pathian-in a kohhranhote hmanga mawhphurhna (power) min pekte hi dik tak leh fel takin kan hmang tur a ni.  Pastor fa an ni emaw Upa fa an ni emaw Mirethei fa an ni emaw, ang khat rengin kan en tur a  ni.

Tin, Inkhawmpui rorelnaah hian kan Dan Bu (Constitution) chuan Thalai leh Hmeichhia an tel ve theih dan tur kawng a siam a.  Synod Committee hrang hrang- Ramthar, Music, Sunday School leh Family Guidance and Counselling Centre (FG&CC) Committee-ah te aiawh pakhat ve ve an tel kan phal sak a.  Tin, Synod Inkhawmpuiah hian Leader leh Secretary-te chu Inkhawmpui Palaiah kan telh bawk a ni.  Hei hi kan Constitution-in a tum a ni mai lovin a lang a.  Tun Synod-a kan sawiho kha a ni a.  Awmze nei leh zuala kan  Synod Inkhawmpui leh Committee hrang hranga an tel ve theih dan kan la ngaihtuah chhuah ngei pawh a beisei awm a ni.

5.

Hmeichhe Nemngheh chungchang :

Hmeichhe Nemngheh chungchang hi kan sawi ve ta fo a.  Mahse, ngun thluk leh zuala kan ngaihtuah a ngai niin a lang.  Hmeichhe Nemngheh thu hi kan Bible pawm dan te, kan hnam nun (culture) te a tawk a, kan Theology pawh a rawn nghawng pha bawk a ni.

Kan hmeichhiate hi an fel em em a.  Chutih rualin kan Pastor-te leh Upa-te an tha em em vek a  ni.  Hmeichhiate hi thiam takin kan thawhpui thei ang tih a rinawm a.  Tuna kei ni, Pastor fello tak takte pawh kan Upa leh Kohhran member fel tak tak leh thahnem ngai tak takte hian min thawhpui thiamin, kan tlin lohna leh fellohnate min thup-puiin, mualpho hauh lovin min siam thei zel a.  Hmeichhia an nih avanga kan thawhpui theih lohna tur hi a awm hauh lo vang.  Mahse, an tuarna leh Pathianin a koh dante kan la hriat thiam pui loh vang maite pawh niin a lang.  Dik tak chuan kan ram kohhran anga kohhran tha, awmze nei leh rawngbawlna kawnga thawk tak tak te hian kan thawhpui theih lohna tur hi a awm lo.  Kohhran thil pawimawh zawng zawng Committee hmangin kan ngaihtuah a.  Mi chak lo leh fel lo deuhte tan pawh kan kohhran hi belh tlak a ni a.  Hmeichhe tan pawh harsatna tur a awm tak tak lo a ni.

Heng thute hi ngun takin ngaihtuah ila.  Pathian hnenah nasa leh zualin tawngtai ila.  Kan hnenah eng thu nge sawi a duh tih te hi ngun takin ngaithla ila.  Lalpa hian mipate anga rawngbawl a, kohhran upa leh Pastor atana a duh tak tak a nih chuan kan dal thei lovang.  Chuvangin Pathian duh zawng a ni em tih hi ngun thluk leh zualin i ngaihtuah thin ang u.  Kohhran hi Pathian ta, Pathian siam, Pathian ram he khawvela a thlen theihna tura Pathian bel ruat a ni.  Chuvangin ngun takin i ngaihtuahho zel ang u.

Khaikhawmna : Rorelna hi Pathian siam a ni a.  Mihringte tan a siam a ni.  Roreltu atan mi fing leh hmangchang hria, hma thlir (vision) tha tak nei te an pawimawh a.  Chung mite chu Roreltu atan Pathianin a duh a ni.  Chuvangin kohhran upate, kohhran hmeichhia leh Kristian Thalai Pawl hruaitu thlan leh ruat thu-ah te kan fimkhur a ngai a.  Politics thil emaw, chhungkhat laina tih emaw te hian hmun a chang tur a ni lo.  Chutiang bawkin ram hruaitu thlan chung changah pawh kan fimkhur deuh deuh a tul bawk a ni.

Tin, roreltu ten dik tak leh fel takin ro an rel tur a ni.  Mitin ten kan chanvo tur dik taka kan chan a, thlamuang tak leh hlim taka kan awm theih nan rorelna tha leh dik kan nei ngei tur a ni.  Chutiang taka rorelna dik leh tha kan neih chuan Malsawmna tam tak kan dawng thei ngei ang tih a rinawm.  Rorelna dik chu lui angin luang sela, Felna chu luipui kang ngai lo angin luang rawh se.

Lalpan mal min sawm sak theuh rawh se.

AMEN.