Vawiin (Feb. 19, 2016) chawhnu dar 1:00 khan Hmangaihna In, Durtlang kum 30 tlin lawmna neih a ni.
Programme hi Hmangaihna In Recreation Room-ah hman a ni a, Management Committee Chairman Pi Rinchawiin programme a kaihruai a. Superintendent Pi Laldawnkimi hnen atangin Inhmelhriattirna leh Reports ngaihthlak a ni a, Home Naupangten Special Item ngaihnawm leh hmuhnawm tak tak an entir a, Durtlang Kohhran Female Voice te an zai bawk. Rev. P.C. Pachhunga, Executive Secretary in thusawina hun a hmang a, Pu James Lalthangmawia, DCPO, Aizawl District hnen atangin thusawi tawi ngaihthlak leh a ni a, a duh apiang thusawina hun hawn a ni bawk. Programme hman zawh hian a lawmna zanriah an kilho nghal a ni.
Hmangaihna In hi kum 1980 Synod Inkhawmpuiin, Synod huapa Nau Hnuchham Enkawlna neih nise, SEC in chak zawkin lo bawhzui rawh se, tiin a rel a, Sub-Committee siamin hma lak zui nghal a ni a, Synod Hospital Compound-ah a Building hi sak niin, February 15, 1986 ah hawn a ni. Kum 2011 atang khan naupang 50 awm theihna tura siam a ni a. A tirah chuan kum 2 hnuai lam tan a ni a, kum 4 chin tan tih a ni leh a, kum 2011 atangin kum 6 thleng enkawl theihna a ni. A din tirh atanga naupang admit tawh zawng zawng zat chu mi 396 an ni a. Naupangte hi hnam hrang hrang - Mizo, Vai, Chakma leh Bru an ni ber a, Kristian Kohhran pawl hrang hrang leh Hindu, Muslim leh Buddhist te an ni. Tunah hian mipa 9 leh hmeichhia 16, an vaiin 25 an awm mek a ni.