Rawngbawlna lam : Moderator ka ni ve dawn tih ka hriat atangin kan Synod-in Committee a ngaih pawimawh em em hi kei pawhin tih tur pawimawh No.1-ah ka dah ang ka ti a, vawi 193 Committee kan nei a, tum 5 emaw chu thil dang pawimawh avangin ka tel thei lo a, ka tel theih dan tur ngaihtuahin Committee hun pawh kan siam rem hram hram thin.

Synod-in Moderator hna atâna a dah pawimawh ber pakhat chu Kohhranhote tlawh a ni. Synod duh dan hi ka theihtawpin tihpuitlin ka tum ang tiin tan ka la ve a, Kohhran 180 ka tlawh hman a. Tin, Moderator-ten an la tlawh loh tlawhchhuah chu pawimawhah ngaiin chutiang Kohhran chu 43 ka tlawh a. Chung zinga Kohhran thenkhat chuan an Centenary-te an lawm a, Diamond, Golden leh Silver Jubilee lawmte an awm a, kum 80 chuang te pawh an awm nual a. Tlawh tura min sawm tlawh hman tak lohte ka nei a, pawi ka ti khawp mai. Mizoram leh a pawnlama ka zin kualna zawng zawng hi, boruak leh lei lamah Km 26400 vel a ni a. Accident leh tawhsual tawk lovin ka tluan chhuak thei a, ka lawm hle a ni.

Kan Synod Choir-te nen tum engemawzat kan zin hova, an inpekna ka fak hle a ni. Bial zaipawl leh kohhran Zaipawlin min lo dawnsawn lohna chu tlemte a ni a, naupang zaipawl engemawzat an zai bawk- A lawmawm hle a ni. BSI kum 200-na lawm kum a ni hlauh a hun min pe ve a, ka lawm khawp mai. Kohhran engemaw zatin Centenary, Diamond, Golden leh Silver Jubilee an lawmna ka hmanpui a. Souvenir Message pawh thahnem tak ka ziak a. Manipur rama Chanchintha luh kum 100-na lawmna Aizawl leh Churachanpur-ah Synod aiawhin Mei dêttu-ah ka tang a. Zoram Hmeichhe Inkhawmpui Lianin Buhfaitham Centenary lawmna kan nei a, Missionary Training College leh Media Ministry kan hawng bawk a. Synod Office Building ropui tak kan hawng bawk a, a hawngtu ka ni hlauh hi vannei ka inti takzet a, senior zahawm tak takte ka hmuhin hawngtu zâwk âwm an tamin ka hria a, phûlo pawh ka inti a, ka lawm hle a ni. Biak In 4 tha tak tak ka hawng bawk.

Presbytery Inkhawmpui hmasa ber atangin kumin hi a vawi 100-na Presbytery Centenary a ni a, kan sawilang lo hle a, mahse kumin hi Presbytery Centenary kum a nih avangin a ropui zualin ka hria. Heng zawng zawng hi Pathian khawngaihna avanga kan chan a ni tih ka hria a, ka lawm hle a ni. MKHC-a kan thawhhonaah Kohhran pawl dangte nan inlungrual takin hma kan la ho thei a, MPF pawhin Aizawl Municipal Council (AMC) leh Lai Autonomous District Council (LADC) inthlanah ram tan tangkai takin hna an thawk a, thil lawmawm tak a ni. 

Kohhran ka hmuh dan : Moderator programme-a Kohhran ka tlawh kualna atanga Kohhran ka hmuh dan tlem han tarlan hi ka chak a, ka lawmna pawh a ni. Rampuma kan Kohhrante inpumkhatna hi a tha hlein ka hria, Moderator an lo lawm dan hi sawi châkawm, sawi hman si loh a tam hle mai. A mimala an lo lawm ni lovin Moderator kha an lawm a, an ngaisang a, chu chuan Synod-a an rilru put dan a tarlang chiang hlein ka hria. Synod-a kan inchhunkhawmnaah hian kan la lungrual hle tih a lang a, a lawmawm a ni.

Thlarau Thianghlimin ram pumah kohhranhote min chenchilh a, harhna ziain min tuam deuh vek a, tualchhung kohhranten mahni kohhran nuam kan ti theuh in a lang a, kohhran tlawhtu nih a nuam em em a ni. Thlarau Thianghlimin Iptepui ban nan min la hmang duh tih han hmuh hi a lawmawm a, a thlamuanthlak a ni.

Kohhran Upaten an Kohhran enkawlte an hmangaih theuh mai tih hi hmu chiang hlein ka inhria, ka thinlung tilawmtu ber pakhat pawh a ni. Anmahni tana sum lama hlawkna tur ngaihtuah lova Kohhran thatna tur ngaihtuah chu an rilru lian ber a ni vek maiin a lang a, an thahnemngaihna hi sawi uar tawk a awm lovin ka hria. Synod-in engemaw a sawi sep a han tawh ve lai tak hian Kohhran chhiat an duh lohzia leh an rilru nat si zia te ka hmuhin harsatna kan han tawk ve zauh thinte pawh hi Kohhran hmangaihtute inthup hmangaihna rawn par chhuahtirtu ni hialin ka hria a, mittui ti tla khawpa lawmna min thlentu a ni.

Hmun tlawh thenkhatte : Mizorama Chanchintha lo luhna chhan bul ber chu Mizo pasalthaten Cachar phaia thingpui huan sap James Winchester an that a, a fanu Mary Winchester (Zoluti) an man a, Mizo salah an hawn ta kha a ni a. Kan ram kohhran leh kan hnam dinhmunah hei hian hmun pawimawh tak a luah avangin an sulhnu han tlawh chhuah ve hi tulin ka hria a. Zoluti an manna hmun Alexandrapore leh Zoluti pa James Winchester thlan, Silchar khawpui chhunga Kristian thlanmuala saphoin an siam te ka tlawh a. Hachhek tlangdunga Mary Winchester hriatreng nana Synod-in School a din Winchester School-te ka tlawh a. Heng hmunah hian Synod-in neitu nihna kan chang thui hle a, a enkawl leh humhalh thuah pawh kan Missionary-ten hma an la tha hle a. Hei hian min tilawm a, kan vawn nun reng pawh a thain ka hria. Zoluti lak let lehna hmun chungchangah sawi dan chihnih kan nei ta tlat erawh hi chuan lu a tihai a, tawng dan pawh thiam a har a, kohhranin humhalh tur pawhin min ti tim ta erawh hi chu a pawi ka ti a, lungrualna awm theih hun a nghahhlelhawm hlein ka hria.

Central Jail-a tangte Moderator Programme-in ka tlawh a, Synod Choir-te nen kan kal a. Jail hotuten hun tha tak min lo siam sak avangin lawmthu ka sawi a. Jail chhungah hian Jail kohhran tha tak a lo awm a. Pathian thu-ah harlhna chang thahnem tak an awm a, anmahni hla phuah ngei Jail tangte zinga mi Jail kohhran zaipawlin mittui tla zawih zawiha an sa han hmuh chu a lawmawm hle a. Synod Moderator Programme anga tlawh vawikhatna a lo ni a, Synod Choir-in hla, nung tak maiin an sa bawk a. Synod-in kan ngaihsakna an han hmuhin an lawm hle a, an lawmzia an sawi nasa hle a ni. Krismas an hman nan Synod Relief atangin Rs. 10000/- kan hlan nghe nghe a ni. Jail chhungah hian Pathian thuin hmun a chang thuk hle hi a lawmawmna ber chu a ni. Kan rawngbawlna pawimawh tak, Synod rawngbawlna ni mahse Moderator Programme a la tlawh loh a nih avangin Hmangaihna In, Durtlang ami chu Central Hmeichhe hruaitu thenkhatte nen kan tlawh a. Kan hmalakna chinah chuan a lawmawm hle a. Amaherawhchu kum 4 an tlinin lak chhuah ngei ngei an ngai a, an nu leh pa te kaihruaitu tha awm chuang si lo hnenah dah luh leh tho an ngai hi ngaihtuah chian a ngai hlein ka hria. Sum tam tak senga kan lo enkawl tawh te kha awmze nei lovin an tal leh mai mai thin a, rahbi tleu dinhmunah an luh leh tho kha an hmabak a, puitling zawka dawmchhuah dan ngaihtuah theih nise a tul hle in ka hria.

Mission Field 11 ka tlawh a. Kan Missionary-te inpekna leh thahnemngaihna in min tilawm hle a. Lawmthu sawina tur leh fak tur ka hmu tam khawp mai. Kawng leh lamah erawh chuan Missionary kan tir chhuak hnem a, tuna kan thawh dan aia hlawk zawk leh, kohhran nghet zawk din tur chuan kan hmalaknate hi enthat deuh a ngai em aw tih a awl hle. Contract Missionary 56 lak turah diltu 300 vel lai an awm a, Interview pawh buaithlak tham a ni a, Pro.Pastor 17 lak turah 83 an interview bawk a. Mitha tak tak rawngbawl duh kan la seng si lo hi a hrehawm duh khawp mai.

Harsatna leh Vanduaina : Mamit Bazar Veng lei tlahniamin In tam tak a tichhia a, kan kohhran Biak In leh S.S. Hall pawh a tichhe vek a. Synod hmingin thlamuan tur leh relief pe in ka kal a. An lainatawm khawp mai. Ngopa khaw chhunga lei khi pawh Hmarchhak Presbytery Inkhawmpui kal pahin ka tlawh a, Silpaulin bandle 1 Synod Relief atangin kan pe nghal bawk.

Leiminin In a hnawl leh kangmei tuarte engemawzat hnenah Synod relief kan sem a, thihna hial tuarte an awm a, ralna kan pe bawk. Pawl thliar chuang lovin kan sem a, tanpuina dawngtu tam takte hi kohhran pawl dang mi an ni. Rev. R. C. Zokhuma, Zemabawk Bialtu leh Pro. Pastor Tv. V. Lalmuanpuia, Chhiahtlang Biala mi te chuan chatuan ram min pansan a, Missionary 4-in chatuan ram min pansan bawk, a vanduaithlak khawp mai. 

Lawmthu Sawina : Moderator hna kumkhat chhunga ka thawh ve chhung hian Pathian hruaina ropui tak ka dawng a. Kohhranhote duhsakna leh tawngtaina tam tak ka dawng a, ka chan phak loh tur thil tam tak ka chang a, ka lawm tak meuh a ni. Pathian leh kohhranho chungah lawmthu ka sawi e.